Şəhid ailələri və müharibə əlilləri yalnız təqaüdlə deyil, eyni zamanda digər sosial ödənişlərlə, yəni pensiya, müavinət və sosial proqramlarla da əhatə olunurlar. Belə ki, bu qrupa daxil olanlar birdəfəlik sığorta ödənişi ilə təmin edilirlər. Bu, şəhid ailələri üçün 11 min manat məbləğində nəzərdə tutulub. Bununla yanaşı, I dərəcə əlilliyi olan şəxslərə 8800 manat, II dərəcə əlilliyi olan şəxslərə 6600 manat, III dərəcə əlilliyi olan şəxslərə 4400 manat ödənilir.
Ancaq müharibə əlillərinin heç də hamısı sığorta pulunu ala bilmir. Belə ki, ikinci qrup Qarabağ müharibəsi əlili sığorta pulunu ala bilmir. Bakı sakini Yaşar Cəfərov Birinci Qarabağ döyüşləri zamanı bədəninin bir neçə nahiyəsindən qəlpə yarası alıb və əlil olub.
Y.Cəfərov bildirir ki, xəstəliyi üzündən hərbi qulluqçulara ödənilməli olan sığorta ödənişini almaq üçün Dövlət Sığorta Kommersiya Şirkətinə müraciət edib. Amma həmin şirkət 6600 manat sığorta pulunu ödəməyib.
Qeyd edək ki, tək Y.Cəfərov deyil, Birinci Qarabağ müharibəsi iştirakçılarının əksəriyyəti hələ də sığorta pulunu ala bilmir.
“1991-97-ci illərdə Qarabağ müharibəsində yaralanan qazilərə bu pulun verilməsində problemlər yaşanır”
Hərbi ekspert Rasim İsgəndərov bildirdi ki, 2007-ci ildən bu yana yaralanan və əlil olan hərbi qulluqçulara birdəfəlik sığorta ödənişi verilib, onlar bu vəsaiti alıblar və 27 sentyabrda başlayan Vətən savaşında əlil olanlar da alır: “1991-97-ci illərdə Qarabağ müharibəsində yaralanan qazilərə isə bu pulun verilməsində problemlər yaşanır. Ölkə başçısının tapşırığı ilə Əmək və Əhalinin Sosial Müdafiəsi Nazirliyi şəhid ailələrinə birdəfəlik sığorta pulunu ödədi. Birdəfəlik ödənişin məbləği şəhid ailələri üçün 11 min manat, I qrup Qarabağ əlilləri üçün onun 80 faizi - 8800 manat, II qrup Qarabağ əlilləri üçün 60 faizi – 6600 manat, III qrup Qarabağ əlilləri üçün isə 40 faizi - 4400 manatdır. Onu da hələ tam şəkildə ödəməyiblər. 20 ildir müharibə veteranlarının sığorta pulunun verilməməsi arzuolunmaz haldır”.
Həmsöhbətimiz onu da əlavə etdi ki, I Qarabağ savaşı əlillərindən təxminən 700-800 nəfər məhkəmə yolu ilə bu vəsaiti alıb, ancaq digərləri qalıb. Müharibə iştirakçılarının sığorta pulu onları incitmədən verilməlidir.
Günel CƏLİLOVA
