Ölkəmizdə yoluxma sayının günü-gündən artması pandemiyanın üçüncü dalğasının başlamasını tezləşdirdi. Bu gün Azərbaycanda koronavirus pandemiyasının üçüncü dalğası bütün çılpaqlığı ilə özünü göstərir. Demək olar ki, iki-üç ailədən birində koronavirusa yoluxanlar var. Elə ailələr var ki, orada hamı yoluxub.
Heç şübhəsiz, koronavirusa yoluxanların ilk yolunu saldığı yer apteklərdir. Üçüncü dalğa başlayar-başlamaz apteklərdə ciddi bahalaşma yaşanır. Çox təəssüflər olsun ki, ilkin yardım üçün lazım olan bütün vəsaitlərin qiymətini iki-üç qat artırıblar. Koronavirus xəstəsinə hava-su kimi lazım olan tempraturölçənin, vitamin “C” və başqa ilkin yardım vasitələrinin qiymətinin 2-3 qat artması narahatlıq doğurur. 50-90 qəpiyə olan sadə tempraturölçənin qiymətinin birdən-birə 2 manat 60 qəpiyə, 3 manata qaldırılması adamı təəccübləndirir. 1 manat 50 qəpiyə olan “C” vitamini az qala 10 manata qaldırılıb. Koronavirus xəstələrinin müalicəsində istifadə edilən dərmanlara isə ümumiyyətlə yaxın düşmək olmur. Bir orta koronavirus xəstəsinin müalicəsi az qala 500 manata başa gəlir. Apteklərə rəhbərlik edənlər bilir ki, camaat çarəsiz qalıb, borc-xərclə də olsa, o dərmanları alacaq, ona görə də süni şəkildə qiymət artımı edirlər.
“İstehlakçı, vətəndaş əgər görsə ki, bu dərman vəsaitini apteklər Tarif Şurasının müəyyən etdiyi qiymətlərdən çox baha satır, o zaman...”
Sosial-iqtisadi sahə üzrə tanınmış mütəxəssis İlqar Hüseynli süni qiymət artımından təəssüfləndiyini bildirir. Ekspert hesab edir ki, insanların ölümlə, ağır xəstəliklə mücadilə etdiyi bir vaxtda apreklərin qiymət artımına getməsi narahatedicidir. “Ümumiyyətlə, əczaçılıq praktikasında “koronovirs dərmanları” deyə bir bölgü yoxdur. Yəni orada antibiotiklər, vitaminlər, antivirus preparatları, müəyyən köməkçi vasitələr var və sair. Burada iki kateqoriyada bölgü var. Müəyyən molekullar var ki, onların hər biri Tarif Şurası tərəfindən konkret qiymətləndirilib. Qurumun saytında bu qiymətlər yerləşdirilib. İstehlakçı, vətəndaş görsə ki, bu dərman vəsaitini apteklər Tarif Şurasının müəyyən etdiyi qiymətlərdən çox baha satır, o zaman Tarif Şurasına və İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə müraciət edə bilər. Güman edirəm ki, molekulların qiymətinin artırılması ilə bağlı çox da ciddi praktikaya rast gəlinməyib. Qiyməti Tarif Şurası tərəfindən müəyyən edilən bütün preparatların qiymətləri üzərində olmalıdır. Əgər istehlakçı hüququnu bilib bunu tələb edirsə edir, etmirsə, burada artıq istehlakçı özü günahkardı. Amma bir də bioloji aktiv dərmanlar var ki, artıq onların qiymətini Tarif Şurası müəyyən etmir. Bu, termometrlərə də aiddir. Yəni Səhiyyə Nazirliyinin qeydiyyatı tələb olunmayan ölkəyə gətirilən dərman preparatlarının, bioloji aktiv əlavələrin, o cümlədən də köməkçi vasitələrin, sarğı materiallarının - bint, yod və sairin qiymıətlərini artıq sərbəst şəkildə apteklər özləri qoyur. Təbii, apreklər indiki situasiyadan sui-istifadə edirlər ki, bir qədər daha çox pul qazansınlar”-deyə İ.Hüseynli bildirdi.
İradə SARIYEVA
