Nazirlər Kabineti yanında Operativ Qərargahın son brifinqi keçirilən zaman bir sıra yeni qərarlar qəbul edildi. Lakin teatr və kinoteatrların fəaliyyətinin məhdudlaşdırılması qərarı qüvvədə qalıb. Belə ki, uzun müddətdir səhnədən uzaq düşən sənətçilər Operativ Qərargahın teatr və kinoteatrların yenə də qapalı saxlanması qərarına etirazlarını bildiriblər.
Bir qrup sənət adamı öz etirazını “Facebook” vasitəsilə çatdırıb.
Aktyor və ssenarist Azər Aydəmir kinoteatrların bağlı qalmasının bu sahənin insanlarına böyük zərbə vurduğunu bildirib. O, ölkənin kinoteatrsız olmasını absurd hesab edir. Onun fikrincə, bu, insanlara böyük zərbədir. Aktyor əlavə edib ki, yeni çəkilən filmlər yığılıb qalıb, heç yerdə göstərilmir. Bu sahə zəncirvari bir-birinə bağlıdır. Filmlər göstərilməlidir ki, qoyulan sərmayə götürülsün, aktyorlar qonorar ala bilsinlər: “Bu sahənin adamları artıq işlərini dəyişməyə başlayıblar. Çünki dediyim kimi, kinoteatrlar qapalıdır, bu sahə iflic vəziyyətindədir. Sahibkarlar fəal olmalı, haqqını tələb etməlidir. Necə olur, toylar və digər sahələrə icazə verilir, amma kinoteatrlar bağlı qalıb? Özəl film sektoru boğulur. Kinoteatrlar həm də insanın rifahını, emosional stabilliyini saxlayan mənəvi alətdir. Ona görə vacibdir!”.
Əməkdar artist Sənubər İsgəndərli sosial şəbəkədə bunları yazıb: “Əgər COVİD-19 pasportu ilə hər yerə getmək olarsa, niyə teatrlara, kinoteatrlara həmin pasportla getmək olmaz?”.
Operativ Qərargahın son brifinqindən sonra əksər səhnə adamları teatr və kinoteatrların açılmamasına etiraz etməkdə davam edir. Ancaq unutmaq lazım deyil ki, koronavirusa yoluxma sayı günü-gündən artır. Açıqlanan rəqəmlərdə həm virusa yoluxanların, həm də vəfat edənlərin sayının artığını müşahidə edirik. Belə bir ərəfədə qapalı məkan sayılan teatr və kinoteatrların açılması nə dərəcədə düzgündür?
“Teatr və kinoteatrlar qapalı yerdir, salonda əyləşən şəxslər arasında bir neçə nəfər virus daşıyıcısı olarsa, bu fəlakətə səbəb ola bilər”
Sosioloq Aytəkin Kamranqızı bildirdi ki, son günlər ölkəmizdə, eyni zamanda, bütün dünyada COVID-19-a yoluxmada artım müşahidə edilir. Bunun səbəblərini bir neçə faktorla əlaqələndirmək olar: “İlk olaraq, yay fəsli ilə əlaqədar insanların daha çox turistik səfərlər etməsi, yəni ölkələr arasında qarşılıqlı gediş-gəlişin baş verməsi yoluxmaların artmasına səbəb olur. Digər tərəfdən, dünyada “Delta” ştammının sürətlə yayılması virusun arealının genişlənməsində mühüm rol oynayır. Biz əvvəldən də bilirdik ki, bu ştammın yoluxuculuq qabiliyyəti COVID-19-a nisbətən daha yüksəkdir. “Delta” ştammının hesabına dünyada virusa yoluxma halları kəskin şəkildə artıb”.
Həmsöhbətimizin sözlərinə görə, virusun yayılmasında toyların rolu az deyil: “Bu danılmaz faktdır. Belə bir ərəfədə teatr, kinoteatrların açılmasını tələb etmək düzgün deyil. Nəzərə almaq lazımdır ki, teatr və kinoteatrlar qapalı yerdir. Bir salonda ən azı 70-100 nəfər olur. O da bəllidir ki, bu cür yerlərdə sosial məsafə qorunmur. Salonda əyləşən şəxslər arasında bir neçə nəfər virus daşıyıcısı olarsa, bu fələkətə səbəb ola bilər. Bu səbəbdən də virus tam yox olana qədər həmin müəssisələrin açılması düzgün olmaz”.
Günel CƏLİLOVA
