“Odlar Yurdu” Universitetinin bazasında fəaliyyət göstərən eyniadlı kollecin 3-cü kurs tələbələri ciddi problemlə üzləşib. Onlar şikayətlərində bildirirlər ki, 11 illik təhsil bazası üzrə kollecə qəbul olublar. 3 il ərzində “Peşə təlimi və kompüter şəbəkələrinin və hesablama texnikasının təmiri və servis xidməti ixtisası” üzrə ödənişli əyani təhsil alıblar. Amma universitetin rəhbərliyi subbakalavr diplomunda yalnız “Peşə təlimi” ixtisasının qeyd ediləcəyini bildirir.
Tələbələr yazır ki, 2018-ci il kollecə qəbul ərizəsi yazanda ixtisas seçimində “Peşə təlimi və kompüter şəbəkələrinin və hesablama texnikasının təmiri və servis xidməti ixtisası”nı qeyd ediblər: "Həmin ərizələr hazırda universitetdə saxlanılır və bunu təsdiq edə bilərik. Hər il 900 manat olmaqla 3 il ərzində kollecə 2700 manat təhsil haqqı ödəmişik. Ödəniş kağızlarında da həmin ixtisasın adı eynilə qeyd edilib".
Tələbələr daha sonra bildirirlər ki, 3 il ərzində sözügedən ixtisas üzrə bilik və təcrübəni mənimsəyiblər: "Rəhbərlik 2 il əvvəl “Peşə təlimi”-ni və “Kompüter şəbəkələrinin və hesablama texnikasının təmiri və servis xidməti ixtisası”-nı ayrı-ayrılıqda tədris edib. Yəni bir ixtisası 2 yerə bölərək bizdən sonra qəbul olunan tələbələrə bu qaydada dərslər keçirilib. Biz isə 2018-ci ildə yalnız 1 ixtisas adı üzrə qəbul olunmuşuq və sonradan ixtisas dəyişikliklərinin və qəbul olunmuş qaydaların bizə heç bir aidiyyəti yoxdur".
Şikayətçilərin sözlərinə görə, universitetin rəhbərliyi onlardan diplomlarında “Kompüter şəbəkələrinin və hesablama texnikasının təmiri və servis xidməti ixtisası”-nın da qeyd edilməsi üçün əlavə 1 il təhsil almağı və 1000 manat ödəniş etməyi tələb edib: "Axı kollecdə təhsil müddəti 3 ildir, tələbələrin qəbul ərizələrində kompüter üzrə ixtisas seçimi də qeyd edilib. Biz niyə əlavə 1 il təhsil almalı, 1000 manat ödəniş etməliyik? Bizim buna maddı imkanımız çatmır. Niyə Əhməd Vəliyev istədiyi qaydaları tətbiq etməlidir?" Tələbələr müraciətin sonunda Təhsil Nazirliyindən, nazir Emin Əmrullayevdən xahiş edirlər ki, problemi nəzarətə götürsün və təcili tədbirlər görülsün. Belə vəziyyətdə məsuliyyət kimin üzərinə düşür və tələbələrin problemi necə öz həllini tapmalıdır?
Təhsil məsələləri üzrə ekspert, tarix elmləri doktoru, professor Məhərrəm Zülfüqarlı “Bakı-Xəbər”ə açıqlamasında bildirdi ki, Azərbaycanda keçmiş SSRİ dönəmindən qalan bir psixologiya mövcuddur: “Çalışırlar ki, insanların inamını qazanıb, onları aldatsınlar. İndiki dönəmdə biz belə hallarla daha çox rastlaşırıq. Məsələn, bir də görürsən ki, hansısa provayder gəlib telefon, internet çəkdiyini bəyan edir. Vətəndaşlar müqavilə bağlayır, bir həftə sonra görürlər ki, xətti biri çəkir, modemi başqasının gətirəcəyi vədini verirlər. Bütün bunlar insanları aldadıb, daha çox pul qazanmaq məqsədi üçün edilir. Təhsildə də belə hallar mövcuddur. Deyilən problemi qəlizləşdirən budur ki, ortada müqavilə yoxdur. Yəni tələbə ilə kollec arasında ikitərəfli müqavilə bağlanmalıydı. Belə hallar ortaya çıxanda həmin müqavilə kollec rəhbərliyinin boynuna hüquqi öhdəlik qoyacaqdı. Bizim xalq bir qədər səmimidir və hər şeyə tez inanandı. Bu səbəbdən də tez-tez əziyyət çəkir. Bütün sahələrdə ilk olaraq müqavilə bağlanmalıdır. Onu hansı tərəf pozarsa, məsuliyyəti də o daşımalıdır. Yəqin ki, sözügedən təhsil müəsissəsi də üzərinə müqavilə öhdəliyi götürməyib. Yalnız quru söz verib ki, indi də tələbələrdən əlavə bir il oxumağı və min manatı tələb edir. Vətəndaşlar belə hallardan nəticə çıxarıb ayıq olmalıdırlar. Bu halda yalnız hüquqi mübahisələndirmə ilə nəyəsə nail olmaq mümkündür. Yəqin ki, tələbələrdə kollecin üzərinə götürdüyü öhdəliyi sübut edən sübutlar və faktlar var. Təhsilə aidiyyəti olan şəxslər bunu məhkəməyə getmədən də yoluna qoya bilərlər. Burada kolleclə tələbələr arasında bir ortaq məxrəc tapılmalıdır. İstənilən halda, vətəndaşlarımızın hüquqi maarifləndirilməsinə geniş ehtiyac var”.
Məhəmmədəli QƏRİBLİ
