Azərbaycanda cinayət törətmiş şəxslərin statistikası göstərir ki, bu sırada zərif cinsin nümayəndələri də çoxluq təşkil edir. Rəsmi məlumatlara əsasən demək olar ki, respublikamızda hər il qadınların iştirakı ilə müxtəlif cinayətlər törədilir.
Bu ilin yanvar-iyul aylarında Azərbaycanda cinayət törətmiş şəxslər arasında qadınların xüsusi çəkisi 5,8 faiz, 14-17 yaşda olan uşaqların xüsusi çəkisi isə 1,7 faiz təşkil edib.
Dövlət Statistika Komitəsinin yaydığı məlumatda qeyd olunur ki, ötən ilin müvafiq dövrü ilə müqayisədə cinayət törədən 14-17 yaşda olan uşaqların sayı 18,7 faiz azalıb, qadınların sayında isə 23,5 faiz artım olub.
Açıqlanan statistik rəqəmlərdə də qeyd olunur ki, zərif cinsin nümayəndələri tərəfindən törədilən cinayətlərin sayı artıb. Maraqlıdır, cinayət törədən qadınların sayı nə səbəbdən artıb? Zərif cinsin nümayəndələrini cinayətkar olmağa vadar edən səbəb nədir?
“Cinayət törədənlər arasında qadınların sayı az olsa da, zərif cinsin nümayəndələri cinayət törədərkən daha qəddar olurlar”
“Vəfa” Sosial İctimai Birliyinin sədri Fatimə Hacıbəyli “Bakı-Xəbər”ə açıqlamasında qeyd etdi ki, qadınların bıçağa əl atmalarının müxtəlif səbəbləri var. Onun sözlərinə görə, problemin həlli üçün cinayətlərin səbəbləri araşdırılmalıdır: “Ümumiyyətlə, cinayət törətmək qadınlara xas deyil. Bütün dünyada belədir. Kişilər daha çox cinayət törədir. Qadınların əksəriyyətinin bıçaqlanma, adam öldürmə və digər cinayətlər törətməsi özünümüdafiə xarakteri daşıyır. Burada mən ruhi xəstələri nəzərə almıram. Qadın ən çox əri tərəfindən zorakılığa məruz qalır və sonu cinayətlə nəticələnir. Qadın qadını nadir hallarda öldürür. Qeyd etmək lazımdır ki, ən zəif kişi qadından fiziki cəhətdən güclü olur. Bu zaman da qadın bıçağa əl atmağa məcbur olur. Qadının adam öldürməsinə qəsdən törədilən cinayət demək olmaz. Bu, həmin qadının daha çox özünümüdafiə xarakteri daşıyır”.
Birlik sədrinin sözlərinə görə, ən çox ailə problemləri olan qadınlar cinayət törətməyə məcbur olurlar: “Bəzən müşahidə edirik ki, ailədə problem var, lakin həmin qadının boşanmasına valideynləri imkan vermir. Təbii ki, bu prosesin sonu cinayət hadisəsi ilə nəticələnir.
Onu da qeyd edim ki, qadınlar tərəfindən törədilən cinayətlər daha çox rayonlarda baş verir. Çünki ictimai qınaq səbəbindən rayon yerlərində boşanma ehtimalı daha azdır. Boşanma qadınlar üçün psixoloji problem yaradır, camaatın qınağından çəkindikləri üçün boşanmırlar. Amma bu fədakarlığın sonu heç də həmişə yaxşı bitmir və illərlə yığılmış problemlər qadını hansısa cinayət hadisəsini törətməyə vadar edir”.
F.Hacıbəyli onu da əlavə etdi ki, cinayət törədənlər arasında qadınların sayı az olsa da, zərif cinsin nümayəndələri cinayət törədərkən daha qəddar olurlar. Bunu zorakılıqla əlaqələndirən ekspert hesab edir ki, zorakılığa məruz qalan qadınlar həddindən artıq ağır cinayət törədirlər: “Ailədə qadınlara qarşı təzyiq, işgəncə daha çox olur. Belə olan halda cinayət baş verir. Bəzən ailədə qadın işgəncə və təzyiqə məruz qalması ilə bağlı hüquq-mühafizə orqanlarına müraciət etsə də, həmin qadına müsbət cavab verilmir”.
Birlik sədri hesab edir ki, cinayətkar qadınların sayının azalması üçün vətəndaş cəmiyyətləri, aidiyyəti dövlət qurumları şiddətə məruz qalan qadınları nəzarətdə saxlamalıdır. O ailələrlə mütəmadi görüşülməli, mənfi sonluğun yaşanmaması üçün hər kəs bu işdə aktiv olmalıdır.
Günel CƏLİLOVA
