Vətən, torpaq uğrunda canından keçənlər, özlərini fəda edənlər ölmürlər. Aylar, illər keçdikcə, onların göstərdiyi igidliklər dillərdə gəzir, nəsillərdən-nəsillərə ötürülür. Beləliklə, xalq öz qəhrəman övladlarına qəlbində əbədi heykəl ucaldır.
Azərbaycanın ərazi bütövlüyü uğrunda gedən döyüşlərdə həlak olan oğul və qızlarımızın adını əbədiləşdirmək, xatirəsini əziz tutmaq üçün ölkəmizin bütün bölgələrində abidələr qoyulur, bulaqlar tikilir, parklar salınır.
Təəssüf ki, şəhid adının əbədiləşdirilməsi məqsədilə qoyulan bəzi abidələrin, tikilən bir sıra bulaqların ətrafında baxımsızlıq ucbatından xoşagəlməz mənzərə yaranıb. Bu mənzərə ilə rastlaşanda çoxumuz, xüsusən də şəhidin yaxınları sözlə ifadə olunmayan sarsıntı keçirir.
Belə bir mənzərə Binəqədi rayonu, M.Ə.Rəsulzadə qəsəbə sakini şəhid Ramiz Aboyev adına Mədəniyyət və İstirahət Parkında mövcuddur. Şəhid adını daşıyan park baxımsızlıq, natəmizlik içindədir.
Parka yaxın ərazidə yaşayan sakinlər bildirir ki, günün bütün saatlarında istirahət üçün istifadə etdikləri, uşaqların oynadığı bu məkanda hava qaralandan sonra oturmaq, gəzmək mümkün deyil. Park qaranlıqdır, karusellərin isə bir çoxu işləmir, uşaqlarını araba ilə gəzdirən analar yolların kələ-kötürlüyündən əziyyət çəkir.
Məlumat üçün bildirək ki, şəhid Aboyev Ramiz Nazim oğlu Qarabağ müharibəsi başlayan zaman, həqiqi hərbi xidmət keçməsinə baxmayaraq, könüllü olaraq özünümüdafiə batalyonunun Şuşa şəhərində ordu sıralarına yazılıb. Kəşfiyyatçı olan Ramiz müharibə zamanı Azərbaycan Respublikasının azadlığı, suverenliyi və ərazi bütövlüyü uğrunda gedən döyüşlərdə fəallıqla iştirak edib.
Onu da bildirək ki, digər ərazilərdə də şəhidlərin adına salınmış park və istirahət guşələrinə biganə yanaşılır.
Məsələ ilə bağlı Binəqədi Rayon İcra Hakimiyyəti ilə əlaqə saxlamağa çalışsaq da, cavab verən olmadı.
“Bəzi yerlərdə baxımsızlıq ucbatından xarabalığı xatırladan şəhid abidələri, parklar və bulaqlar var”
Sosial sahə üzrə ekspert Mayis Əliyev qeyd etdi ki, bəzi yerlərdə baxımsızlıq ucbatından xarabalığı xatırladan şəhid abidələri, parklar və bulaqlar var: “Bəzi yerlərdə baxımsızlıq ucbatından xarabalığı xatırladan şəhid abidələri və bulaqlar var. Şəhidlərin adını daşıyan hər şeyi can-başla qorumaq, sahib çıxmaq lazımdır. Təəssüflər olsun, məsələyə aidiyyəti olan təşkilatlar, qurumlar bu kimi yerləri görməzdən gəlir. Bu laqeydlik isə şəhidlərin ruhuna hörmətsizlikdir”.
Günel CƏLİLOVA
