Masallı rayonunun Hüseyn-hacılı kəndinin igid oğlu Elçin Novruzov könüllü olaraq İkinci Qarabağ müharibəsinə getdi, torpaq uğrunda yağı düşmənə qarşı qəhrəmancasına döyüşərək 32 yaşında canını canından da artıq sevdiyi Azərbaycana fəda etdir Bu şərəfli ölümlə o, milyonların qəlbinə köçdü, özünə əbədi həyat qazandı. Elçinin müharibədə göstərdiyi şücaət ölümündən sonra dövlət tərəfindən “Vətən uğrunda”, “Xocavəndin azad olunmasına görə” medallara layiq görülür.
Masallı eli öz şəhid oğlu ilə qürur duyur, onun adını həmişə uca tutur. Doğma Hüseyn-hacılı kəndində Elçinin xatirəsinə “Şəhidlər bulağı” abidə kompleksi inşa olunub. Abidə kompleksin açılışı mərasimi keçirildi. Tədbirə Masallı Rayon İcra Hakimiyyətinin başçısı Şahin Məmmədov və icra aparatı, hüquq-mühafizə orqanlarının, idarə və təşkilatların nümayəndələri, şəhid ailələri, Vətən müharibəsi iştirakçıları, kənd ictimaiyyəti qatılmışdı.
Əvvəlcə Vətən torpaqlarının azadlığı uğrunda şəhidlik zirvəsinə ucalan mərd igidlərin xatirəsi bir dəqiqəlik sükutla yad edildi. Ziyarətçilər kompleksin önünə təzə gül-çiçək dəstələri düzdülər. Sonra Masallı RİH başçısı Ş.Məmmədov söz alaraq qəhrəman Vətən oğullarının şücaətindən danışdı. Çıxışının axırında bildirdi ki, Ulu Öndərin siyasi varisi, Ali Baş Komandan cənab İlham Əliyevin rəhbərliyi və qüdrətli Azərbaycan Ordusunun şücaəti nəticəsində ölkəmizin ərazi bütövlüyü təmin edildi. Həmçinin bütün şəhidlərin qisası alındı. Əyilən belimiz dikəldi. Başımız dik oldu… Bunları bizə şəhidlər yaşatdı, həm də bu xalqın qəhrəmanlığını bir daha nəsillərdən-nəsillərə əbədi ötürdülər...
Tədbirdə çıxış edən Hüseyn-hacılı kənd ümumi orta məktəbinin direktoru Yadigar Şəmmədov şəhid Elçin Novruzovun mənalı həyat yolundan, müharibə zamanı nümayiş etdiyi mərdlik və igidlikdən söz açdı. Vətən yolunda iki oğul şəhid vermiş Ziba ana isə dövlət qayğısına və övladlarının qəhrəmanlığını yüksək tutduğuna görə Müzəffər Ali Baş Komandan cənab İlham Əliyevə, Azərbaycan Respublikasının Birinci vitse-prezidenti Mehriban xanım Əliyevaya, eləcə də Masallı icra başçısına minnətdarlığını bildirdi.
Hüseyn-hacılı kənd məktəb şagirdlərinin Vətən, şəhidlər haqqında söylədiyi şeirlər də ilahi bir sevgidən yaranan qürurdan xəbər verirdi.
Zəfər ORUCOĞLU Azərbaycan Jurnalistlər Birliyinin üzvü
