“Risq qrupuna daxil olan bəzi uşaqlar koronavirusu ağır keçirir. Məsələn, bir yaşdan aşağı, hər hansı xroniki, yəni ürək, böyrək xəstəlikləri olan, serebral iflicdən, xərçəngdən əziyyət çəkən, əvvəldən və ya sonradan yaranan immunitet çatışmazlığı olan uşaqlar digərlərinə nisbətən xəstəliyi ağır keçirə bilər”. Bunu ARB-24-ün “Gündəm” verilişinə açıqlamasında Səhiyyə Nazirliyinin baş pediatrı Erkin Rəhimov deyib.
O bildirib ki, koronavirusa yoluxub sağalan uşaqların səhhətində bəzi problemlər yaranmağa başlayır: “Əvvəl düşünürdük ki, koronavirus yalnız qış aylarında yayılır. Lakin sonradan gördük ki, bu, hər cür havada yayılan xəstəlikdir. Pandemiyanın ilk günlərində uşaqlar çox az xəstələnirdi və xəstəliyi çox yüngül keçirirdi. Ona görə də biz həkimlər deyirdik ki, çox da narahat olmağa dəyməz. Lakin 2020-ci il aprelin sonunda İngiltərədə koronavirusdan sonra kavasaki sindromuna bənzəyən iltihabi proses müşahidə edildi. Onun adı isə “MİS C” sindromudur. O, sağlam uşağın koronavirusa yoluxub sağalmasından sonra əmələ gəlir. Başlanğıcda onun müalicəsində çətinliklər çəkdik”.
Baş pediatrın dediyindən belə aydın olur ki, uşaqlar da koronavirusu ağır formada keçirir. Onu da nəzərə almaq lazımdır ki, bir aydan sonra məktəb və bağçaların açılması gözlənilir. Belə olan halda uşaqları virusdan necə qorumaq olar?
“Bir aydan sonra yeni tədris ili başlayacaq, artıq valideynlər uşaqlarını məktəbə, bağçaya göndərməklə bağlı tərəddüd edir”
Pediatr Xəyalə Hüseynova bildirdi ki, hazırda uşaqlar arasında virusa yoluxma artıb. Evdə, ailədə koronavirus daşıyıcısı varsa uşaqda həmin infeksiyaya yoluxur: “Uşaqlar əvvəllər olduğu kimi yenə parklarda, meydançalarda bir-biri ilə oynayırlar. Onların bir-birindən yoluxub gizli daşıyıcı ola biləcəyini nəzərə alsaq, deyə bilərik ki, uşaqlar yeni növ koronavirus infeksiyasına yoluxmada fəal rol oynayırlar. Ona görə də bu gün uşaqlarımızın COVID-19 xəstəliyindən qorunması məsələsi çox aktualdır”.
Pediatrın sözlərinə görə, uşaqlarda bu xəstəliyin əlamətləri bir qayda olaraq hərarətin yüksəlməsi, baş ağrısı, boğaz ağrısı, qusma və ishalla müşayiət olunur. Uşaqlarda böyüklərdə göründüyü kimi atipik pnevmoniyanın inkişafı nadir hallarda baş verir: “Məlumdur ki, bir aydan sonra yeni tədris ili başlayacaq. Artıq valideynlər uşaqlarını məktəbə, bağçaya göndərməklə bağlı tərəddüd edir. Onların narahatçılığı başa düşüləndir. Uşaqlar biri-birilə daha çox təmasa da olacaq. Beləliklə, virusa yoluxma sayı daha da arta bilər. O da bəllidir ki, payız aylarında immunitet aşağı düşür. Bu səbəbdən valideynlər də diqqətli olmalıdır. Sinifdə bir uşaqda adi narahatlıq varsa o uşaq izolyasiya edilməlidir. Digər uşaqların virusa yoluxmaması üçün onların immunitetinin möhkəmləndirilməsinə diqqət yetirmək lazımdır”.
Günel CƏLİLOVA
