Koronavirusa yoluxanların sayının 2300 nəfəri keçməsinin cəmiyyətdə ciddi narahatlıq və əndişə yaratdığı faktdır. Yoluxanların sayının son həftələr daha da çoxalması bir sıra suallar yaradır. Yoluxmanın artma səbəbinə görə kim daha çox məsuliyyət daşıyır? Qaydaları yumşaldan, toyların təşkilinə, restoranların, ictimai iaşə müəssisələrin açılmasına icazə verən TƏBİB, yoxsa bu yumşalmadan sui-istifadə edərək məsuliyyətsizliyə yol verən vətəndaşlar günahkardır?
Ekspertlərin, həkimlərin, ictimai xadimlərin böyük əksəriyyəti hesab edir ki, bu məsələdə vətəndaşların məsuliyyətsizliyi daha çox öz sözünü deyib. Mütəxəssislərin sözlərinə görə, virusa yoluxanların statistikası aşağı düşər-düşməz vətəndaşlar sosial şəbəkələrdə və s. yumşaldılmaya gedilməni, məhdudiyyətlərin götürülməsini istədilər, eləcə də yumşaldılmanın tərəfdarı olduqlarını bildirdilər və bu baş verdi, amma açılımların, yumşaldılmaların nəticəsi olduqca mənfi oldu, yoluxmalar atdı, ölüm sayı çoxaldı. Bütövlükdə, ayrı-ayrı şəxslər qaydalara əməl etməməklə məsuliyyətsizliklərini ortaya qoydular. Qapalı yerlərdə maskadan istifadə etməyən, toylarda, məclislərdə qaydaları pozan vətəndaşın bu addımları yoluxma dimanikasının artmasına səbəb oldu. Gizlin deyil ki, hələ də cəmiyyətimizdə koronavirusa inanmayanlar var, onların yanlış bilgisi və yanlış davranışları da mövcud vəziyyətə təsirsiz ötüşmədi. Bir sözlə, ekspertlər deyir ki, hər bir vətəndaş öz üzərinə düşən məsuliyyəti dərindən hiss edib ona əməl etsəydi, vəziyyət bu qədər kritik olmazdı.
“…Burada insanlarımızın özünün də fərdi məsuliyyətsizliyi…”
“Novoye vremya” qəzetinin baş redaktoru Şakir Ağayev hesab edir ki, açılımların, yimşaldılmaların, toylara, şənliklərə icazə verilməsinin bu cür nəticələnməsi təəssüf doğurur. Ş.Ağayevin sözlərinə görə, bütün açılımlar yaxşı idi, amma gərək insanlar, vətəndaşlar onlara verilən fürsətdən sui-istifadə etməyəydi. Ş.Ağayevin sözlərinə görə, toylar da, şənliklər də lazım idi: “Bu artımda, təbii ki, hər iki tərəfin məsuliyyəti var. Amma bəzi yumşalmalar test üçün lazım idi ki, görək insanlar bu yumşalmadan, açılımdan, bu fürsətdən necə istifadə edəcək. Yəni insanlar az qala iki ildir ki, öz ənənəvi həyat tərzlərindən uzaqlaşmışdı, bunlar ona görə lazım idi ki, vətəndaşlar heç olmasa əvvəlki həyat tərzlərinin bir hissəsini yaşasınlar. Bunlar həyat əhəmiyyətli vacib işlər idi. Xüsusən də toy şənlikləri lazım idi, bunu uzun müddət gözələyənlər var idi. Amma çox təəssüflər olsun ki, vətəndaşlar arasında səhlənkarlıq hallarına yol verənlər çox oldu və məsuliyyətsizlikləri bu cür nəticələndi. Birinci səhlənkarlıq odur ki, TƏBİB-in, Opertiv Qərargahın qoyduğu şərtlər daim nəzarət altında olmur və heç kimə sirr deyil ki, bəzi məclislərdə heç bir yoxlanma olmur. Bəzi restoran, şadlıq evləri sahibkarları verilən fürsətdən sui-istifadə edirlər. Təbii ki, burada insanlarımızın özünün də fərdi məsuliyyətsizliyi var, onlar Operativ Qərargahın tələblərinə əməl etmir. Toylarda vaksinasiya olunan insanlardan əlavə, vaksinasiya olunmayanlar, hətta xəstə insanlar da gəlib iştirak edirlər. Bu isə toy sahibinə kömək deyil, həm ona, həm də qonaqlara problem yaradır. İnsanların məsuliyyətsiz hərəkətləri diqqətdən yayınmır. Problem təkcə toylarla, şənliklərlə məhdudlaşmır, parklarda, bulvarda, ictimai nəqliyyatda, iri supermarketlərdə qətiyyən ara məsafəsi gözlənilmir. Bu da, təbii ki, vətəndaşların məsuliyyətsizliyinin bir işarəsidir.
Bilirsiz, vətəndaşlarımıza verilən bu fürsətdən sui-istifadə edənlər olmasaydı, bu qədər yoluxma da olmazdı, heç qaydaların sərtləşdirilməsinə də ehtiyac qalmazdı. Hər bir insan öz fərdi məsuliyyətini dərk etsəydi, vəziyyət bu həddə çatmazdı”-deyə Ş.Ağayev qeyd etdi.
İradə SARIYEVA
