Yoluxma sayının artması koronavirus pandemiyasını yenidən alovlandıra bilər. Həkimlər pandemiyanın yeni dalğasının ola biləcəyini deyir. Bir çox qadağaların götürülməsi, kütləvi tədbirlərin keçirilməsi virusun yenidən alovlanmasına səbəb olur. Mütəxəssislər yoluxma sayının aşağı salınması üçün ilk növbədə vətəndaşları həssaslıqla gigiyenik qaydalara əməl etməyə və vaksinasiyaya çağırır.
Qeyd etdiyimiz kimi, son həftələr yoluxma sayı kəskin artıb. Iyulun 11-də 2 396 yeni yoluxma faktı qeydə alınıb, 11 nəfər isə vəfat edib. Üzü payıza doğru getdiyimiz bir məqamda bu rəqəm nikbinliyə heç də əsas vermir. Dünya Səhiyyə Təşkilatının Azərbaycan nümayəndəliyinin rəhbəri Hande Harmancı da bir müddət əvvəl jurnalistlərə açıqlamasında bildirmişdi ki, sentyabr-oktyabr aylarında yoluxma saylarında artım gözlənilir.
Yoluxmanın dördrəqəmli səviyyəyə çatması əhali arasında narahatlığa səbəb olub. Ehtimal edilir ki, yoluxma sayı daha da artarsa, yenidən qapanmalar tətbiq edilə bilər.
“Yoluxma bu templə davam edərsə, karantin qaydalarının sərtləşdirilməsi gözləniləndir”
Həkim Pərvanə Mustafayeva bildirdi ki, xəstəliyin yayılmasında virusun rolu qədər vətəndaş məsuliyyətsizliyi də rol oynayır: “Əsas səbəb vətəndaşlarda arxayınlığın yaranmasıdır. Karantin rejiminin yumşaldılması və qadağaların götürülməsi, açıq havada maska rejiminin ləğvi, şənlik mərasimlərinə icazə, tətil mövsümü və xaricə gediş-gəlişin artması virusun daha geniş yayılmasına və yoluxma sayının kəskin artmasına səbəb oldu. Məlum məsələdir ki, artım bu templə gedərsə qapanma məsələsi yenidən gündəmə gələ bilər”.
Həmsöhbətimiz onu da əlavə etdi ki, son zamanlar insanlar tibbi maska, gigiyena və sosial məsafə məsələsini tamamilə unudub: “Hətta avtobusda artıq gündəlik maskadan istifadə kəskin azalıb. Bu kobud şəkildə pozuntular yoluxma sayını hər gün artırır. Ona görə də yoluxma bu templə davam edərsə, karantin qaydalarının sərtləşdirilməsi gözləniləndir. İş yerlərində işçilərin sayına yeni məhdudiyyətlər tətbiq edilməlidir, bəzi sahələrdə iş onlayn rejimdə davam etdirməlidir”.
Həkimin sözlərinə görə, senytabrın 20-dən sonra yoluxma sayı daha da sürətlə artacaq. O zaman yoluxma sayı beş minə qədər qalxa bilər: “Kütləvi şəkildə toy və yas mərasimlərinin keçirilməsi və heç bir sosial məsafənin gözlənilməməsi, maskadan istifadə olunmaması öz təsirini göstərməli idi. Çünki toyda maskadan istifadə ilə bağlı verilmiş qərar çox absurd qərar idi. Bir sözlə, yoluxma sayının hələ də artacağını gözləyirəm”.
Günel CƏLİLOVA
