“Son bir aydır yoluxma diaqnozu qoyulanların sayı 10 dəfə artıb. Yoluxma sayı 2 faizdən 13 faizədək yüksəlib”. Bunu mətbuata müsahibəsində Ümumdünya Səhiyyə Təşkilatının Azərbaycandakı nümayəndəsi Hande Harmancı deyib.
O qeyd edib ki, bu, əhali arasında xəstələrin sayının artdığını göstərir: “Bilirik ki, Azərbaycanda “Delta” ştammı var. Yoluxma sayı da artır. Tədbir görməsək, sentyabrda rəqəmlər çox yüksək ola bilər”.
“Son günlər yoluxma sayı həddən artıq artıb, bu da böyük təhlükədən xəbər verir”
Sağlamlığa Xidmət İctimai Birliyinin icraçı direktoru Pərvanə Vəliyeva bizimlə söhbətində bildirdi ki, son günlər yoluxmanın belə şəkil alması bizi həyəcan təbili çalmağa vadar edir: “Son günlər yoluxma sayı həddən artıq artıb, bu da böyük təhlükədən xəbər verir. Dünən 1796 nəfər yoluxmuşdu, bu rəqəm də çox yüksəkdi. Keçən ilin payızındakı rəqəmlərlə eynilik təşkil edir. “Delta” ştammı çox sürətli şəkildə yayılır. Ancaq onu deyə bilərəm ki, bu ştamma yoluxanlar başqa stammlara nisbətən daha tez sağalır. Sanki insanlar ya vaksinasiya yolu ilə, yaxud yoluxma zəncirində bir az yüngülləşmə olub deyə immunitet əldə ediblər. Daha doğrusu, sanki insanlarda “sürü immuniteti” deyilən immunitet artıq var. Yəni bədən, orqanizm virusu tanıyır və tez sağalırlar. Tanıdığım insanlar arasında da “Delta” ştammı ilə yoluxanlar var, tez sağalıblar. İndi artıq tibb işçiləri üçüncü doza vaksinləri qəbul edir. Çünki yanvar ayında vurulan vaksin öz təsirini itirmişdi. İnsanları qorxmamağa, panikaya düşməməyə çağırıram, amma yenə qaydalara riayət etməliyik. Çünki virusun bu ştammı da öldürücülük qabiliyyətinə malikdir ki, hər gün 10-dan yuxarı insan bu virusdan həyatını itirir. Hesab edirəm ki, gözlənilən təhlükənin qarşısını almaq üçün dövlətimiz lazımı tədbirlər görəcək. Bilirsiz ki, ictimai iaşə müəssisələrində, restoranlarda toy şənlikləri keçirilir, hər gün toy məclisləri, digər şənliklər olur və insanlar da hər gün toylardadır. Pandemiya ilə bağlı tətbiq edilən məhdudiyyətlər zamanı toylar keçirilmirdi, amma yumşalmalardan sonra keçirilməyə başladı. İnsanlar bu məclislərdə kütləvi şəkildə bir-biri ilə əlaqədə, təmasda olurlar, təmas nəticəsində isə virus bu şəkildə yayılır”.
P.Vəliyevanın sözlərinə görə, eyni zamanda yay mövsümü ilə əlaqədar hava soyuducularının, kondisionerlərin hər yerdə çalışması, insanların birdən-birə tərli vəziyyətdə isti mühitdən soyuq mühitə daxil olması və sair infeksion xəstəlikləri artırır. Hazırkı dönəmdə “gün qripi”nin də yayıldığını deyən mütəxəssisin sözlərinə görə, bu da infeksion xəstəlikdir, bir insandan digərinə ötürülürsə, insanlar xəstələnirsə, demək digər infeksion xəstəliklərə də yoluxa bilərlər, çünki həmin anda insanların immuniteti düşür: “İnsanları kütləvi yerlərə, sıxlıq olan məkanlara getməməyə, geniş təmasda olmamağa çağırıram. Qapalı məklanlarda keçirəcəkləri tədbirləri açıq məkanda təşkil etsinlər, yenə də maska taxsınlar, əllərini təmiz saxlamağı unutmasınlar. Başqa vasitələrdən istifadə etməyi və sosial məsafə saxlamalarını, səyahətlər zamanı ehtiyatlı olmalarını tövsiyə edirəm. İndi çox insanlar xarici ölkələrə, xüsusən də Türkiyəyə, başqa ölkələrə gedib-gəlirlər. İnsanlar səyahət və istirahət üçün daha təhlükəsiz yol seçsinlər”-deyə mütəxəssis qeyd etdi.
İradə SARIYEVA
