Sosial şəbəkələrdə və KİV-də yayılan məlumatlara görə, son iki-üç ildir ki, Tovuz rayonunda sakinlər ciddi su qıtlığı ilə üzləşiblər. Yay mövsümü başlayandan sonra onlar bu problemi daha dərindən yaşamağa başlayıblar.
Yazılanlara görə, yalnız rayon mərkəzində deyil, kəndlərdə də analoji vəziyyət yaşanır, camaat həftədə 20-30 manat verib maşınla su gətizdirirr. Bir sözlə, tovuzlular həm suvarma, həm də içməli su qıtlığından əziyyət çəkir, problemin çözümü ilə bağlı isə hələ də hər hansı bir addım atılmır.
Tovuz sakinləri problemin aradan qaldırılması üçün həm əlaqədar qurumlardan, həm də mediadan kömək istəyirlər.
“Hazırda Tovuz camaatının əksəriyyəti maşınla su gətizdirir, amma vəzifəlilərin, “böyük müəllimlər”in təsərrüfatlarına, əkin sahələrinə gen-bol su verilir”
Əslən Tovuzdan olan sosioloq, “Altay” Sosial – İqtisadi Araşdırmalar Mərkəzinin rəhbəri Elçin Bayramlı “Bakı-Xəbər”ə bildirdi ki, mediada və sosial şəbəkələrdə yayılan məlumatlar həqiqətdir.
E.Bayramlının sözlərinə görə, nəinki Tovuz şəhərində, eləcə də Tovuzun aran kəndlərində bu problem tam çılpaqlığı ilə özünü göstərir. “Tovuzun mərkəzində, eləcə də aran kəndlərində uzun müddətdir ki, sakinlər həm içməli, həm də suvarma suyunun qıtlığından əziyyət çəkir. Son günlər vəziyyət daha da kəskinləşib. Tovuzla tez-tez əlaqə saxlayıram, su ilə maraqlanıram, deyirlər ki, güclü istilər başlayandan bu sahədə daha acınacaqlı mənzərə yaranıb. Camaat həm içməli, həm də suvarma suyu tapmır. Quraqlıq başalayandan bu özünü daha kəskin büruzə verir. Camaat 20-30 manat verib hər həftə maşınla su alır, bu da insanların büdcəsinə ziyandır. Tovuzun bəzi yerlərində su çatışmazlığı kritik həddə çatıb. Şəhərin Qəhrəmanlar parkının ətrafındakı ərazilərdə, bir çox aran kəndləridə bu problem özünü göstərir”.
“Azərsu”nun Tovuz bölməsinin problemə çözüm tapmamasının səbəblərinə gəlincə, E.Bayramlının bildirdiyinə görə, dəfələrlə quruma müraciət edilib, lakin qurumdan camaata bildirilib ki, yay mövsümü ilə əlaqədar olaraq suya tələbat artıb, bu səbəbdən də çatışmazlıq var.
Tovuzu sussuzluqdan yandıranların kimliyinə gəlincə, E.Bayramlı qeyd etdi ki, normalda Tovuzda su problemi olmalı deyil, amma bunu yaradanlar var. Tovuzda vəzifəli şəxslərin, bəzi məmurların təsərrüfatlarının olduğunu deyən E.Bayramlının sözlərinə görə, camaatın suyunu kəsib məmurların təsərrüfatlarına yönəldirlər: “Camaat danışır ki, rayonda vəzifəli şəxslərin böyük təsərrüfatları var, camaatın suyunu kəsib gen-bol onların təsərrüfatlarına yönəldirlər. Suyun çoxunu onlara, azını isə camaata verirlər. Tovuzda su ədalətlə bölünərsə əslində su qıtlığı olmaz. Ölkə başçısının tənqid etdiyi ədalətsiz su bölgüsü prosesi Tovuzda “tam qüvvəsində” gedir. O tənqiddən sonra heç bir dəyişiklik, nəticə çıxarma və sair yoxdu, əksinə, keçən illə müqayisədə bu il problem daha kəskin xarakter alıb. Hazırda Tovuz camaatının əksəriyyəti maşınla su gətizdirir, amma vəzifəlilərin, “böyük müəllimlər”in təsərrüfatlarına, əkin sahələrinə gen-bol su verilir. Özü də bir çox təsərrüfatlara su sayğacdan kənar verilir, sonra özləri haqq-hesab edirlər. Vəzifəli şəxslərin təsərrüfatına sayğacdan kənar verdikləri gen-bol suvarma suyunu “su itkisi” kimi qeydiyyata alırlar. Guya bu, buxarlanma və borularda su sızması nəticəsində baş verib”-deyə E.Bayramlı vurğuladı.
İradə SARIYEVA
