Turizm iqtisadiyyatın ən gəlirli sahələrindən biridir. Artıq bunu dünya təcrübəsi də sübut edib. Azərbaycanda da turizm istiqamətində məqsədyönlü işlər görülüb. Turizm obyeklərinin sayı artıb, ölkəyə turist axını güclənib. İstirahət üçün regionlara üz tutan əcnəbi və yerli turistlər, qısa müddət də olsa, şəhərin səs-küyündən ayrılıb, kənd həyatını yaşamağı arzu edirlər.
Son vaxtlar rayonlarda, kəndlərdə evini turistlərə təklif edənlərin sayı artıb. Başqa sözlə, ev turizmi şəbəkəsi genişlənib.
Onu da qeyd edək ki, rayonlarda evlərin qiyməti ötən illərlə müqayisədə artıb. Belə ki, İsmayıllı rayonunun dağ və dağətəyi kəndlərində 50-70 manatdan aşağı ev tapmaq mümkün deyil. Qəbələdə isə qiymət günlük 80-100 manat arasında dəyişir.
Araşdırmalara görə, bölgələrdə olan otellərin qiyməti ilə evlərin qiyməti eynidir. Ancaq burda bir fərq var. Ev sahiblərinin təklif etdiyi xidmət otellə müqayisədə bir neçə dəfə aşağı olur. Bu tip evlərdə turistlərə heç vaxt gigiyenik vasitələr təqdim olunmur. Evlərdə istirahət edənlər əsasən internetə çıxış imkanının müşkülə çevriməsindən narazılıq edir. Qiymətlərin bu qədər baha, xidmətin keyfiyyətinin aşağı olmasına səbəb nədir? Maraqlıdır, Azərbaycanda ev turizmi niyə inkişaf etmir?
“Turistlər kənd həyatını dadmaqla yanaşı, müvafiq səviyyədə xidmətin olmasını da istəyirlər, bizim kənd evlərində isə əksər hallarda bu cür şərait olmur”
Turizm sahəsi üzrə ekspert Elçin Rüstəm bildirdi ki, ev turizminin inkişaf etməməsinin əsas səbəbi turizm ənənələrinin olmamasıdır. Bu bazar tədricən formalaşır: “Turistik bölgələrdə texnologiya da aşağı səviyyədədir. Ümumi götürsək, turizm sahəsində təklif az, xidmətin keyfiyyəti isə aşağıdır. Əhalinin turistik mədəniyyət ənənələrinin yeni formalaşması lazımi keyfiyyətin əsas götürülməsinə imkan vermir”.
Həmsöhbətimizin sözlərinə görə, kənd turizmi yalnız biznes növü deyil, eyni zamanda ictimai diplomatiya vasitəsidir. İnsanlar hotellərdə qapalı şəkildə qalmaq istəmirlər, onlar yerli sakinlərlə münasibət qurmaq, yerli məişət və adət-ənənələrlə tanış olmaq istəyirlər: “Bu səbəbdən ev sahibləri xarici turistlər üçün ölkənin xoş simasını təbliğ etməli, digər regionlardan gələnlərlə isə sıx daxili əlaqələr yaratmalıdırlar”.
Ekspert onu da vurğuladı ki, ölkəmizin iri sənaye mərkəzlərindən və xaricdən gələn insanlarda adi kənd evində yaşayıb istirahət etmək arzusu böyükdür: “Belə turistlər kənd həyatını dadmaqla yanaşı, müvafiq səviyyədə xidmətin olmasını da istəyirlər. Bizim kənd evlərində isə əksər hallarda bu cür şərait olmur. Doğrudur, turistlərin istəyinə uyğun şəraitin yaradılması, onlara müvafiq xidmətin göstərilməsi müəyyən maddi xərc tələb edir. Bölgələrdə ev turizminin inkişafı üçün hər cür şərait yaradılarsa, bu sahə daha da inkişaf edər”.
Günel CƏLİLOVA
