Bir neçə gün əvvəl özünü “feminisr” adlandıran 6 nəfər qadın əllərindəki boyanı Xəzər rayonu Polis İdarəsinin inzibati binasının üzərinə yayıb, bu azmış kimi, Polis İdarəsinin binasına icazəsiz daxil olublar. “Feminist”lər və onların “şirə verənləri” Azərbaycan polisinə şər-böhtan da atıblar. Halbuki, polis onların törətdiyi xuliqanlıq hərəkətlərinə rəğmən onlarla humanist davranıb.
Qeyd edilənə görə, “feminist”lər Polis İdarəsinin qarşısına toplaşaraq əri tərəfindən öldürülən Sevinc Məhərrəmovanın qətli ilə bağlı simvolik olaraq idarənin qapısına qırmızı boya atıblar. Onların iddiasına görə, idarəyə çağırıldıqdan sonra qadınlara qarşı təhqiredici söz və hərəkətlərdən istifadə edilib. Daxili İşlər Nazirliyinin mətbuat xidmətinin şöbə rəisi Elşad Hacıyev isə saytımıza bildirib ki, sözügedən şəxslərin iddiaları əsassızdır: "Bu, həqiqəti əks etdirmir. Heç bir şəxsə bu və ya digər baxımdan təzyiq göstərilməyib".
Onu da vurğulayaq ki, “feminist”lərin bu hərəkətləri ilə bağlı video sosial şəbəkələrdə yayıldıqdan sonra istifadəçilər “feminist” qadınları küçə söyüşləri ilə təhqir ediblər və onların Polis İdarəsinə hücumunu kəskin pisləyiblər. Bir sözlə, o söz qalmayıb ki, bu adamlara yazılmasın. “Feminist”lərin bəzi daxili və xarici qüvvələr tərəfindən maliyyələşdirilərək ortaya atıldıqlarını deyən ekspertlər hesab edir ki, Azərbaycanda ümumiyyətlə feminist hərəkatı yoxdur, o qadınların da feminist adlandırılması doğru deyil. Ekspertlərin fikrincə, feminizm hərəkatı o ölkələrdə olur ki, orada qadınların təhsil, səsvermə və sair hüquqları pozulur, Azərbaycanda isə bu problem yoxdur. Ekspertlərin sözlərinə görə, hansısa bir qadının həyat yoldaşı tərəfindən qətlə yetirilməsi təəssüf doğurur, amma onun günahkarı polis deyil. Bu baxımdan, “feminist” adından istifadə edərək polisə qarşı hər hansı bir iftiranın atılmasının düzgün olmadığını qeyd edən ekspertlərin fikrincə, sosial şəbəkələrdə yazılanlar da “feminist”lərin iç üzünü və mahiyyətini açır.
“Adamda belə təəssürat yaranır ki, bu şəxslərin özünün hansısa psixoloji və əxlaqı problemləri var, onlarda mənəvi məsələlərdə aşınmalar gedib”
“Müasir İnkişaf” Birliyinin rəhbəri Mübariz Göyüşlü “Bakı-Xəbər”ə bildirdi ki, Azərbaycan polisinin qaralanması yolverilməzdir. “Feminist”lərin əməllərinin qətiyyən yolverməz olduğunu deyən M.Göyüşlünün sözlərinə görə, bu gün “qadın azadlığı”, “gender bərabərliyi” adı altında bu “feminist”lər tamam başqa şeyləri təbliğ edirlər: “Mən Azərbaycanda qadın hüquqları məsələsinin ayrıca qabardılmasının əleyhinəyəm. Eyni zamanda, qadınların ailədaxili zorakılığıa məruz qalması məsələsini də qəti şəkildə pisləyirəm. O ki qaldı “feminist”lərə, mən son günlər onların yayılan videolarına, videolarda əks olunan davranışlarına, çıxışlarına, fikirlərinə baxıram, bu məndə böyük təəssüf hissi doğurur. Bizim xalqın, cəmiyyətin bir əxlaq anlayışı var. “Feministəm” deyib insanda ikrah doğuran və etiraza səbəb olan hərəkətlərə yol verənlər yalnız cəmiyyətin qınağına tuş gələ bilərlər. Adamda belə təəssürat yaranır ki, bu şəxslərin özünün hansısa psixoloji və əxlaqı problemləri var, onlarda mənəvi məsələlərdə aşınmalar gedib”.
“Feminsit”lərin əsassız olaraq aqressiya nümayiş etdirməsinin, qadın qətlərinin siyasiləşdirməsinin qəbuledilməz olduğunu deyən M.Göyüşlü hesab edir ki, bu davranış feminizm əlaməti deyil. “Feminizm anlayışı bizim cəmiyyətə xas deyil. Bizim cəmiyyətdə qadınlar dövlət qurumlarında, seçkili orqanlarda kifayət qədər təmsil olunurlar. Qadınların kişilərlə bərabər həm qanunda, həm də real fəaliyyətdə hüquqları tanınır və qorunur. Təbii ki, zorakılıq olursa, hansısa bir problem ortaya çıxırsa burada birmənalı olaraq qadın hüquqlarının pozulmasından danışmaq düzgün deyil” - deyə ekspert vurğuladı.
İradə SARIYEVA
