44 günlük müharibənin zəfərini biz canı-qanı bahasına düşmənlə üz-üzə savaşan igidlərimizin sahəsində qazandıq. Torpaqlarımızın erməni işğalçılarından təmizlənməsi yolunda şəhid olan igidlərimizlə bağlı atılacaq hər bir addım dəfələrlə düşünülüb, daha sonra həyata keçirilməlidir. Çünki millət olaraq biz azərbaycanlılar torpaq uğrunda savaşlarda qələbə sevincini yaşadan şəhid və qazilərimizin dəyərini bilib, onların ad və ləyaqətlərinin qorunması üçün əlimizdən gələni əsirgəməməliyik.
Təəssüf ki, hər kəs bu cür həssas məsələdə lazımi davranış göstərmir. Bu günlərdə şəhid leytenant Samir Əliheydər oğlu Əliyevin 21-ci doğum günü qeyd edilib. Suraxanı Rayon İcra Hakimiyyəti tərəfindən şəhidin adının əbədiləşdirilməsi məqsədilə salınan parkın və inşa edilən bulağın açılış mərasimi də keçirilib. Mərasimdə şəhidin fotosu həkk olunmuş tort və tortun kəsilməsi üçün şəhid anasının əlinə bıçaq verilməsi sosial şəbəkələrdə kəskin etiraza səbəb olub. Fotodan da göründüyü kimi, ana şəhid oğlunun şəkli əks olunan tortu kəsə bilmir və ağır sarsıntı keçirir. Xatırladaq ki, bir müddət öncə analoji hadisə şəhid atasına qarşı edildi. Şəhid atası da əlində bıçaq torta yaxınlaşarkən oğlunun fotosunu görüb, sarsılıb hönkürmüşdü.
Hələ o zaman şəhidlərin fotosunu anım və ya ad günlərində tort üzərinə vurmaq və həmin tortun kəsilməsinin onun valideynlərindən tələb etmək ən sərt şəkildə qınanıldı, bu, rüsvayçı hərəkət adlandırıldı.
Onu da qeyd edək ki son zamanlar bu hal çoxalıb. Müxtəlif təşkilatlar və ya şəhid yaxınları üzərində şəhidin fotosu olan tortu Vətən yolunda həlak olmuş qəhrəmanın ailəsinə təqdim edir.
Ümumiyyətlə, tortun üzərinə şəhidin fotosunun yerləşdirilməsi nə dərəcədə düzgündür? Nəzərə almaq lazımdır ki, bu olduqca həssas mövzudur. Şəhidin yaxınına belə bir tortun verilməsi nə məna ifadə edir?
“Şəhidin fotosu qidanın və ya geyimin üzərinə vurulmamalıdır, buna son qoymaq lazımdır”
Psixoloq Könül İsmayılova bildirdi ki, bu gün insanlar şəhidlərin adını, qəhrəmanlığını yaşatmaq üçün müxtəlif yollara əl atırlar. Bəzən insanların bu mövzuda etdiyi hansısa hərəkət xoş qarşılanmaya bilər: “Tortun üzərinə şəhidin şəklini yerləşdirmək onun sağ olan yaxınları üçün ağırdır. Hazırlayan insanın emosiyası bir cür ola bilər, çünki tortu bişirən, sifariş verən şəhidin anası-bacısı deyil, o bunu düşünmür. Ana, atanın tortu kəsməməsi isə çox normaldır. Ağrı-acılı ataya, anaya, bacı və ya yoldaşına bu cür jestlərin edilməsi düzgün deyil. Ümumiyyətlə, son zamanlar bilərəkdən və ya bilməyərəkdən şəhidlərə qarşı hörmətsizlik müşahidə olunur”.
Psixoloq onu da əlavə etdi ki, üzərində şəhid şəkli olan tortu sifariş verənlər bunun nə məna daşıdığını bəlkə başa düşmür: “Tortun üzərində şəhidin fotosu olarsa, o tortu kim yeyər? Vəfat etmiş birinin başını, belini, üzünü kəsib yemək məntiqsizdir. İnsanlar bir-birinin acısına hörmət etməlidir. Yaxşılıq edirmiş kimi kiminsə yarasının közünü qoparmaq ədəbsizlikdir. Şəhidə hörmət etmək, onun yaxınlarına mənəvi dəstək olmaq lazımdır. Şəhidin fotosu qidanın və ya geyimin üzərinə vurulmamalıdır. Buna son qoymaq lazımdır”.
Günel CƏLİLOVA
