Ölkənn bütün şəhər və rayonlarında Nazirlər Kabinetinin sərəncamı ilə “Azərbaycan Respublikasında COVID-19 xəstəliyi əleyhinə 2021-2022-ci illər üçün Vaksinasiya Strategiyası”na uyğun olaraq koronavirus əleyhinə peyvəndləmə işləri yeni mərhələyə qədəm qoyub və bu proses davam etdirilir.
Bəşəriyyətə meydan oxuyan koronavirus pandemiyası sıravi tibb işçiləri və sahə həkimlərindən tutmuş, elm adamlarının, tədqiqatçıların, infeksionist və epidemioloqların da işini artırıb. Ekspertlərin fikrincə, virusa qarşı mübarizədə hələ tam qələbə əldə edilməsə də, pandemiyanın sonuna az qaldığını güman edənlər çoxluq təşkil edir.
Məlumat üçün bildirək ki, son bir həftə ərzində dünyada yoluxma hallarının sayı 8 faiz artıb. Koronavirusa 3,8 milyondan çox yeni yoluxma halı aşkar edilib. Eyni zamanda ölüm faktlarının sayı da artıb. Virusa qalib gəlməyin yeganə yolu olaraq əhalinin peyvənd olunması göstərilir. Bildirilir ki, peyvənd vurduran şəxsin imminuteti virusa qarşı güclənir və şəxs yoluxarsa belə, xəstəliyi yüngül keçirəcək.
Məlumdur ki, bu gün ölkəmizdə peyvəndlənmə prosesi uğurla həyata keçirilir. Məlumat üçün bildirək ki, ölkəmizdə Çin istehsalı olan “CoronaVac” peyvəndi ilə yanaşı, digər peyvəndlər – “Pfizer”, “Sputnik V”, "AstraZeneca” da vurulur. Yanvar ayının 18-dən başlayaraq ilk dəfə əhaliyə Çin istehsalı olan “CoronaVac” peyvəndinin tətbiqi başlayıb və hazırda da kütləvi şəkildə davam etdirilir. O da bəllidir ki, Çin istehsalı olan “CoronaVac “ peyvəndi poliknikalarda vurulur. Digər peyvəndlər isə özəl klinikalarda vurulur.
18 yaşından yuxarı olan və əks göstərişləri olmayan hər bir vətəndaş peyvənd oluna bilər. Bunun üçün https://randevu.its.gov.az/ saytına daxil olaraq, “COVID-19 vaksin randevu” elektron xidmətindən istifadə etməklə koronavirus xəstəliyi əleyhinə vaksinasiya üçün onlayn qaydada növbə götürülməlidir. Bunun üçün “COVID-19 vaksin randevu” elektron xidmətində vətəndaş ilk olaraq şəxsiyyət vəsiqəsinin seriya nömrəsini və FİN kodunu daxil edib “Yoxla” düyməsinə basmalıdır. Bundan sonra vətəndaş təqdim olunan siyahıdan peyvənd məntəqəsini, randevü tarixini və saatını seçib, mobil nömrəsini daxil etməlidir.
Qeydiyyat başa çatdıqdan sonra daxil edilən mobil nömrəyə növbənin qeydə alınması ilə bağlı mesaj göndərilir. Mesajda birinci dozanın vurulacağı tarix, saat və məkan qeyd edilir. Peyvəndin birinci dozası vurulduqdan 28 gün sonra ikinci dozanın vurulması üçün təkrar qeydiyyatdan keçməyə ehtiyac yoxdur. Çünki ilkin müraciət zamanı artıq ikinci doza üçün də eyni saat aralığına və məkana avtomatik elektron növbə verilir.
Qeyd etdiyimiz kimi, “Pfizer”, “Sputnik V”, "AstraZeneca” peyvəndləri özəl klinikalarda vurulur. Araşdırmalara görə, hazırda tələbat daha çox “Pfizer” vaksininədir. Özəl klinikalarda vəziyyətdən istifadə edib adıçəkilən vaksini insanlara pulla vururlar. Qiymətin isə nə az, nə çox - 80 manat olduğu bildirilir.
“Bəzi insanlar başqa vaksin vurdurmaq istəyir, ancaq imkanı olmadığı üçün...”
İnfeksionist Mərdan Əliyev bildirdi ki, özəl klinikalarda vurulan “Pfizer” vaksinin qiyməti təxminən 80 manatdır: “Randevü” sistemindən keçmək onlayn növbə götürmək üçündür. Bəllidir ki, “Pfizer”in kütləvi şəkildə vurulması nəzərdə tutulmayıb. İstəyə bağlı olduğu üçün ödənişli əsaslarla da vurulur. Biz istəyərdik ki, vaksinlər pulsuz olsun. Bu, daha yaxşı olardı. Bəzi insanlar başqa vaksin vurdurmaq istəyir, ancaq imkanı olmadığı üçün ayrı vaksin vurdurmalı olur. Yaxşı olar ki, vaksinlər hər kəs üçün əlçatan olsun”.
Günel CƏLİLOVA
