Hazırda ölkənin ucqar kəndlərində yerləşən təhsil müəssisələrinin bəzilərində kadr çatışmazlığı müşahidə edilir. Gənc müəllimlər rayon mərkəzləri və şəhərlərə can atırlar ki, bu da kəndlərə işləməyə gedənlərin sayına təsir etmiş olur.
Ümumiyyətlə, son zamanlar müəllimlərin işə qəbulunda əsas problemlərdən biri rayonlara getmək istəyən müəllimlərin sayının az olmasıdır. Müəllimlərin işə qəbulunda az bal toplayanlar çıxış yolunu bölgələrdə işləməkdə görür. Bu isə təhsilin keyfiyyətinə təsir göstərir. Ona görə də bölgələrdə yaşayan valideynlər mövcud vəziyyətdən narazıdır.
Valideynlərin fikrincə, imtahanlardan az bal toplayan müəllimlərin çoxu bölgələrdə işləməyə uyğunlaşa bilmir və bu səbəbdən geri qayıdırlar. Bu isə həm uşaqlara psixoloji təsir edir, həm də hər dəfə fərqli metodika onları geri salır.
Qeyd edək ki, bir neçə gün əvvəl Təhsil naziri Emin Əmrullayev canlı yayımda bildirmişdi ki, ölkədəki kənd məktəblərində yüz minlərlə şagird oxuyur: “Biz həmin məktəblərə də müəllimlərimizi göndərmək istəyirik. Başa düşürük ki, bu, xüsusilə ailə vəziyyəti, uşaqlı xanımlar üçün çətindir. Ancaq siz də başa düşməlisiniz ki, biz həmin məktəblərə də müəllim göndərməliyik, kimsə həmin məktəblərdə keyfiyyətli dərs deməlidir”.
“Az bal toplayan müəllimin rayonlara göndərilməsi həmin şagirdlərin bilik səviyyəsinə təsir edəcək”
Az bal toplayan müəllimlərin ucqar ərazilərə işləməyə göndərilməsi ilə bağlı fikir bildirən təhsil eksperti Nizami Hüseynov dedi ki, imtahanlarda yüksək bal toplayan müəllimlər Bakıda qalır, az bal toplayanlar rayonlara göndərilir. Bununla bağlı narazılıqlar yaşanır: “Danılmaz faktdır ki, bu gün bölgələrdə təhsillə bağlı problemlər yaşanır. İmtahanda az bal toplayanlar ucqar əraziləri istəməsələr belə çarəsizlikdə qısa müddətə həmin ərazidə işləməli olur. Bir-iki ildən sonra həmin müəllimlər geri, paytaxta qayıdırlar. Belə olan halda pis vəziyyətə şagird düşür. Həm pedaqoqun dəyişdirilməsi, həm də başqa bir müəllimin fərqli metodika ilə işləməsi şagirdləri çətin vəziyyətə salır. Istənilən halda əziyyəti şagirdlər çəkir. Aidiyyəti qurumlar bu məsələni ciddi nəzarətə götürməlidir. Həmçinin, az bal toplayan müəllimin rayonlara göndərilməsi həmin şagirdlərin bilik səviyyəsinə təsir edəcək”.
Günel CƏLİLOVA
