Dünyanın bir çox ölkələrində nikaha girən cütlüklərin “Nikah müqaviləsi” bağlaması mədəniyyəti mövcuddur. Qısası, bu müqaviləni bağlamaqla tərəflər gələcəkdə baş verə biləcək xoşagəlməz hallardan bir növ sığortalanırlar.
Şübhəsiz ki, Azərbaycanda bu müqavilənin bağlanmasına ya kağız parçası kimi baxılır, ya da “Əbədi sevgi” mifinə inanan təzə cütlüklər belə bir müqavilə bağlamağa belə təşəbbüs göstərmirlər.
Cütlüklər heç vaxt ağıllarına ayrılmaq kimi fikirlər gətirmək istəmirlər. “Əbədi sevgi” mifi sona çatdıqda isə boşanan tərəflər sadəcə münasibətdən geridə qalan övladlarının gələcəyini təmin etmək üçün 150 manatlıq alimentdən ötrü keçmiş yoldaşının, belə demək mümkünsə, “arxasınca” düşür.
Açıqlanan statistik məlumatlara görə, nikah müqavilələri imzalayanların sayı azalıb. Belə ki, 2019-cu ildə 63869 nikah qeydə alınsa da, onlardan yalnız 129-da nikah müqaviləsi, 2020-ci ildə 35348 nikahdan 151-də nikah müqaviləsi, 2021-ci ilin ilk üç ayında isə 10334 nikahdan yalnız 28-də nikah müqaviləsi imzalanıb.
“…boşanma hallarında mənzillə, əmlakla bağlı çox ciddi problemlər ortaya çıxır”
Ailə quran cütlüklərin nikah müqaviləsinə nə səbəbdən az maraq göstərdiyini öyrənmək üçün “Vəfa” Sosial İctimai Birliyinin sədri Fatimə Hacıbəyli ilə söhbətləşdik.
F.Hacıbəyli bildirdi ki, nikah müqaviləsi məcbiri olmadığına görə bu gün boşanma hallarında mənzillə, əmlakla bağlı çox ciddi problemlər ortaya çıxır. Onun fikrincə, nikah müqaviləsi məcburi olmadığına görə bu gün məhkəmələrdə çox ciddi problemlər yaşanır. “Qadın ailə qurur, uşağı olur. Ayrılanda isə köçdüyü evdən ona əmlak payı verilmir və küçələrdə qalır. Əgər evlənməmişdən qabaq nikaha daxil olan tərəflər əmlak müqaviləsi imzalasalar, qadın da əvvəlcədən daimi olaraq harada yaşayacağını biləcək. Təəssüf ki, Azərbaycan cəmiyyəti hələ Avropa cəmiyyəti kimi yüksək maarifləndirilmiş vəziyyətdə deyil. Avropa ölkələrində bu məcburi deyil. Baxmayaraq ki, Azərbaycanda da nikah müqaviləsi “Ailə məcəlləsində” əksini tapıb. Amma məcburi olmadığına görə formal olaraq qalır”.
Bu gün boşanmaların həddən artıq çoxaldığını bildirən Birlik sədri nikah müqaviləsini bu halların qarşısının alınmasında önəmli faktor sayır. “İndi nikaha girən maddi faktorlar üzərində ailə qururlar. Baxırsan ki, toy edirlər, 3-4 aydan sonra boşanırlar. Bu zaman nikah müqaviləsi lazım olur. Bir də ölkədə gənclər Avropa dəyərlərini səhv başa düşürlər. Əhalinin bir çox hissəsi teleseriallarda gördükləri azadlıqları yaşamaq istəyir. Belə yanlış fikirlər insanları yanlış yola yönləndirir”.
Günel CƏLİLOVA
