İşğaldan azad edilən Qarabağ bizim üçün həddindən artıq həssas bir nöqtədir. Nəzərə alsaq ki, illərlə düşmən tapdağında qalan bu ərazimiz başdan-başa minalanıb. Minalar o qədər sıx döşənib ki, hələ tamamilə təmizləmək mümkün olmayıb, heç bir mövcud texnika bunun öhtəsindən gələ bilmir. Heç şübhəsiz, Qarabağ ərazisinin yanğın hadisələrindən mühafizəsi bizim üçün əsas pioritetlərdən biri olmalıdır. Bu da Qarabağın ayrıca bir yanğın təhlükəsizliyi konsepsiyasının əhəmiyyətini, aktuallığını gündəmə gətirir.
Qarabağın ayrıca yanğın təhlükəsizliyi konsepsiyası necə hazırlanmalıdır, burada əsas hansı məqamlar nəzərə alınmalıdır?
“Bu istiqamətdə Ekologiya və Təbii Sərvətlər Nazirliyi, Fövqəladə Hallar Nazirliyi...”
“Polisə Dəstək” İctimai Birliyinin sədri, tanınmış hüquqşünas Şəmsəddin Əliyev hesab edir ki, Qarabağ bölgəsinin yanğından mühafizə edilməsi üçün xüsusi tədbirlər görülməlidir. Ş.Əliyevin sözlərinə görə, bu bölgənin yanğından mühafiəzindən ötrü mütləq şəkildə xüsusi konsepsiya hazırlanmasının tam zamanıdır. “Həqiqətən də minaların basdırıldığı yerlər çox təhlükəlidir və yanğına həssasdır. Ona görə də, ərazilərin minasızlaşdırılması üçün təxirəsalınmaz tədbirlər görülməlidir. Bu ərazilərlə bağlı bizim mükəmməl yanğından mühafizə konsepsiyamız olmalıdır ki, hər hansı bir təhlükə qarşısında çətinə düşməyək. Bilirsiz ki, düşmən işğal dövründə bu ərazilərin hər qarışını minalayıb. Məndə olan məlumatlara görə, bu minalar Ermənistanın öz istehsalıdır. İstehsal etdiyi minaları da Azərbaycan ərazilərinə basdırıb. Bunu ətraf mühitə soyqırım da, transmilli mütəşəkkil cinayətkarlıq, terrorizm, ətraf mühiti tam məhv etmək kimi də qəbul etmək olar. Dünyada yanğın və təbii fəlakətlər qədər təhlükəli heç nə yoxdur. Allahın yaratdığı varlıqlar bunun lokallaşdırılmasında, qarşının alınmasında tam acizdirlər. Ona görə də, insanlar yanğının baş verməməsi üçün diqqətli olmalıdır. Hesab edirəm ki, bu gün Qarabağ bölgəsində yanğın risqinə yol açan ən böyük amil minalardır. Ona görə də, diqqətli olmaq lazımdır. Bu bölgədə hər hansı bir yanğın hadisəsinin baş verməsinə səbəb ola biləcək təhlükələrlə bağlı qabaqlayıcı tədbirlər görülməlidir. Qarabağ bölgəsinin yanğın təhlükəsindən mühafizəsi üçün hökümət tərəfindən xüsusi proqramı, konsepsiya hazırlanmalıdır. Bu istiqamətdə Ekologiya və Təbii Sərvətlər Nazirliyi, Fövqəladə Hallar Nazirliyi, bütövülkdə Nazirlər Kabinetinin tərkibinə daxil olan bütün dövlət qurumları bu sahədə öz fəaliyyət istiqamətlərinə dəyişiklik etməlidirlər. Hansı dövlət qurumunun fəaliyyət istiqamətlərində bunlar yoxdursa hamısı təmin edilməlidir. Hətta bu işdə Daxili İşlər Nazirliyinin də addımlar atmaq imkanları var. Onu da nəzərə alaq ki, Fövqəladə Hallar Nazirliyi yaradılmamışdan əvvəl yanğınsöndürənlər bütün tərkibdə Daxili İşlər Nazirliyinin tərkibində idi. Bu baxımdan DİN-in özünün də bu istiqamətdə kifayət qədər səriştəsi, peşəkarlığı, təcrübəsi var”.
Ş.Əliyevin sözlərinə görə, gələcəkdə ətraf mühiti, insanların həyat və sağlamlığını qorumaq üçün dövlət proqramları, milli fəaliyyət planı, konsepsiyalar lazımdır ki, baş verə biləcək hadisənin qarşısını vaxtından əvvəl ala bilək. Ş.Əliyev hesab edir ki, qismən də olsa, təhlükə doğuracaq səbəbləri aradan qaldırmaq üçün bu konsepsiya çox vacibdir.
Ş.Əliyevin sözlərinə görə, Sovet dğvürndə taxıl zəmilərinin, meşə massivlərinin yanğından mühafizəsi üçün ətrafları şumlanırdı. Müsahibimizin sözlərinə görə, meşə gözətçiləri, meşəbəyilər Ekologiya və Təbii Sərvətlər Nazirliyi tərəfindən lazımı şəkildə təlimatlandırılmalıdırlar, kifayət qədər ayıq-sayıq olmaq lazımdı. Ş.Əliyev onu da vurğuladı ki, bu gün qardaş Türkiyədə və dünyanın digər ölkələrində qarşısıalınmaz dəhşətə çevirilən yanğın hadisələri bütün dünyanı, o cümlədən də Azərbaycanı bu sahədə ayıq-sayıq olmağa vadar etməlidir. Ş.Əliyevin fikrincə, Azərbaycan höküməti Qarabağ bölgəsinin yanğın təhlükəsindən mühafizəsi üçün bütün qabaqlayıcı tədbirləri həyata keçirməli və addımlar atmalıdır.
İradə SARIYEVA
