Azərbaycan Ordusunun sentyabrın 27-də işğalçı Ermənistan silahlı qüvvələrinə qarşı başladığı əks-hücum əməliyyatında əldə etdiyi möhtəşəm qələbələr haqqında bundan sonra kitablar yazılacaq, filmlər çəkiləcək. Canını Vətən üçün qurban verən şəhidlərimizin, sağlamlığını itirən qazilərimizin haqqını heç vaxt ödəyə bilmərik.
Müharibənin ağır sınağından çıxıb gələn əsgərlərimiz var ki, döyüşlər zamanı aldığı psixoloji travmalardan həyatına qəsd etdi. Asan deyil, yaxın dostunun, səngər yoldaşının mərmilərdən parçalanmış bədənini görmək, yanmış vücudunu izləmək... Onları başa düşürük.
Əslində qazilərin intihar etməsinin səbəbi onların yaşadığı psixoloji travmalar da deyil, müharibədən qayıtdıqdan sonra qazilərə göstərilməli olan qayğının bəzi qurumlar tərəfindən əsirgənməsidir. Məlumatlara görə, qaziləri narazı salan qurumlar əsasən Əmək və Əhalinin Sosial Müdafiəsi Nazirliyi, Müdafiə Nazirliyi yanında Hərbi Hospital və rayon icra hakimiyyətləridir. Qeyd edilən qurumlar qazilərin qayğıları ilə maraqlanmır, onların problemini görməzdən gəlir. Nəticədə psixoloji və sağlıq problem olanlar qazilər son çarəni intiharda görür.
Psixoloq Könül İsmayılova bildirdi ki, bu gün hansısa qazi özü gedib müraciət, xahiş etməsə, valideyni onu psixoloq yanına gətirməsə heç birinə psixoloji yardım göstərilmir. Ümumiyyətlə, Azərbaycanda psixoloji yardım göstərilməsi bir ənənəyə çevrilməyib: “Bəzən psixoloji durumu pisləşən insanlar düşünür ki, üstünə psixoloq gəlirsə, deməli dəlidir. Bəzi qazilərin psixoloji durumları o qədər ağırdır ki, mən düşünürəm, bu könüllülük prinsipinə əsaslanmamalıdır, bir az məcburiyyət şəklində olmalıdır ki, artıq qazilərin yaşayış ünvanına psixoloqlar göndərilsin və onlarla birmənalı şəkildə psixoloji iş aparılısın. Bu seanslar qazilərimizlə onlayn şəklində də aparıla bilər. Mənim fikrimcə, qazilərimizlə nə qədər çox seanslar keçirilsə, bir o qədər onların psixoloji durumunda müsbətə doğru dönüş yaranacaq”.
Həmsöhbətimiz onu da əlavə etdi ki, bəzi qurumlar qazilərin problemini həll etmək əvəzinə, onları sıxışdırmaqdan, bezdirməkdən sanki həzz alır: “Azərbaycanda qazilərin narazılığının əsas mənbəyi, onları incidənlər Əmək və Əhalinin Sosial Müdafiəsi Nazirliyi və rayon icra hakimiyyətləridir. Onu da deyim ki, qazilərimizi ağrıdan məsələlərdən biri onların adi qəza nəticəsində, iş yerində, təbii şəkildə əlililik alanlarla eyni cür qiymətləndirilməsidir. Bu isə düzgün deyil”.
Günel CƏLİLOVA
