Distant ali təhsil çağımızın prioritetlərindən biridir və dünyanın hər yerində bu yolla ali təhsil alanların sayı durmadan artır. Məlumdur ki, başqa ölkələrdə xarici universitetlərdə distant ali təhsil alanların diplomları maneəsiz tanınır. Azərbaycanda isə xaricdə, xüsusən də qardaş Türkiyə ali məktəblərində distant təhsil alanların diplomları Təhsil Nazirliyi tərəfindən tanınmır.
Türkiyənin müxtəlif ali məktəblərində distant ali təhsil alanların diplomları əllərində qalıb, heç cür təsdiqlədə bilmirlər. Diplomlarını təsdiq etdirə bilməyənlərin sözlərinə görə, nazirlikdən onlara deyiblər ki, beş ildir Milli Məclis distant ali təhsil alanların diplomlarının təsdiq edilməsi məsələsini təsdiqləmir, bu səbəbdən də mövcud problem yaşanır.
Distant təhsil hər yerdə öndə olduğu halda Təhsil Nazirliyi niyə ona biganə yanaşır? Xaricdə distant ali təhsil alanların diplomlarının tanınmamasına qanunvericilik imkan vermir, yoxsa başqa amillər var?
Vüsalə Ağabəyli: “Distant təhsillə bağlı qanunvericilik layihəsi hələ təsdiqlənməyib, yoxdur”
Filologiya üzrə fəsləfə doktoru, dosent Vüsalə Ağabəyli “Bakı-Xəbər”ə bildirdi ki, Azərbaycanda təhsilalmanın digər formaları kimi distant təhsil forması da qəbul edilib: “Distant təhsillə bağlı qanunvericilik layihəsi hələ təsdiqlənməyib, yoxdur. Ona görə də hansı ölkədə distant ali təhsil almasından asılı olmayaraq, bu formada təhsil alanın diplomunu Təhsil Nazirliyi təsdiqləmir. Dəfələrlə deyiblər ki, nə olsun ki, qanunvericilikdə təhsil forması kimi distant təhsil var, amma diplomlar qəbul edilməyəcək. Mən bu halla bağlı bir neçə dəfə yazı yazmışam. Necə olur ki, təhsil formalarından biri kimi qəbul olunur, amma distant təhsillə bağlı heç bir sənədləşmə, heç bir qanunvericilik, proqram tərtib olunmayıb, yoxdu. Ona görə də hazırda bizim ölkəmizdə təşkil olunan onlayn təhsildi, distant təhsil deyil. Bunu distan təhsil adı ilə təsdiq etsələr, gərək onda diplomu təsdiq etsinlər. Amma nazirlik distant təhsillə bağlı olan heç bir diplumu qəbul etmir”.
İlqar Orucov: “Başlıca problem qanunvericiliklə əlaqədardır”
Gənc Alim, Doktorant və Magistrlər Cəmiyyətinin sədri, fizika-riyaziyyat üzrə fəlsəfə doktoru İlqar Orucovun bildirdiyinə görə də, təkcə Türkiyədə deyil, dünyanın hansı ölkəsində distant təhsil almasından asılı olmayaraq, distant təhsil diplomları Azərbaycanda tanınmır: “Bununla bağlı başlıca problem qanunvericiliklə əlaqədardır. Həm də, sözün açığı, distant təhsilin bu qədər önəmli olmasını şərtləndirən bir mühit də yox idi. İnsanlar gedib təhsili ənənəvi alırlar və gəlib diplomları da təsdiq etdirirlər. Distant təhsil alanların diplomlarının tanınmaması qanunvericilik bazasının olmaması ilə bağlıdır. Qanunvericilik bazasının olmaması təkcə distant təhsil alanların diplomlarının tanınmasına yox, həm də birmənalı olaraq müraciətlərə məhdudiyyət qoyub. Bilirsiz, parlamentin Elm və təhsil komitəsi hazırda “Ali Təhsil Haqqında” Qanun layihəsinin üzərində işləyir. Bu qanun layihəsi sahəvi qanundur və ali təhsillə bağlı bütün qanunvericiliyi özündə cəmləşdirməlidir. Bu elə bir qanun olmalıdır ki, ali təhsillə bağlı bütün məqamları, hüquqi məsələləri tənzimləməlidir, eyni zamanda bu gün öz həllini tapmayan, həllini gözləyən məsələlərə aydınlıq gətirməlidir. Bu baxımdan da, “Ali Təhsil Haqqında” qanun layihəsində məhz distant təhsil alan insanların diplomlarının tanınmasının çox ciddi şəkildə öz əksini tapmasına ehtiyac var. Distant təhsili COVID-19 pandemiyası çox zəruri etdi...”
İradə SARIYEVA
