“Məktəblərdə dərs saatı az olan müəllimlərin sayı çoxdur”. Bunu təhsil naziri Emin Əmirullayev deyib. Nazir həmçinin vurğulayıb ki, süni şəkildə müəllimlərin dərs saatını aşağı salmaqla çox sayda müəllim işə götürməyin tərəfdarı deyil.
Məktəblərdə dərs saatı az olan müəllimlərin sayınının çox olmasında Bakı Şəhər Təhsil İdarəsi, yoxsa məktəb direktorları günahkardır? Bu süni artımın yaranmasının səbəbkarı kimlərdir?
Bəzi təhsil ekspertləri hesab edir ki, nazir əslində dərs saatı az olan müəllimlərin sayının süni şəkildə çoxaldıldığına işarə vurub. Ekspertlər deyir ki, bir sıra hallarda məktəb direktorları ehtiyac olmadığı halda məktəblərə müəllimlər götürür, bu da saatların azalmasına səbəb olur.
“Bu məsələdə nə Bakı Şəhər Təhsil İdarəsinin, nə Təhsil Nazirliyinin, nə də məktəb direktorunun...”
Tanınmış təhsil eksperti Kamran Əsədov isə fərqli düşünür. K.Əsədov “Bakı-Xəbər”ə bildirdi ki, müəllimlərin dərs saatının az olmasının bir neçə səbəbi var: “Birinci səbəbi demoqrafik vəziyyətlə bağlıdır. Elə məktəb olur ki, orada şagird sayı çox olur, elə məktəblər də var az olur. Şagirdlər ya məktəbi dəyişlirlər, ya da 9-cu sinifdən çıxırlar, təhsillərini davam etdirməkdən imtina edirlər. Digər bir səbəb isə müəllimlərin repetitorluq fəaliyyətilə məşğul olmasıdır. Dərs saatı az olan müəllimlər əsasən kənarda repititorluq fəaliyyəti ilə məşğul olanlardır, onlar özlərinə az dərs saatı yazdırırlar. Dərs saatını az yazdırıb gedib başqa yerlərdə repetitorluqla, özlərinin başqa işləri ilə məşğul olurlar. Müəllimlərin dərs saatının az olmasına bir neçə amil ciddi təsir göstərir. Ümumilikdə, dərs saatı az olan müəllimlərin sayının artmasını biz müəllim çoxluğunda axtara bilmərik”.
Hazırda ölkədə 1,6 milyon şagird, 150 min müəllim olduğunu deyən K.Əsədovun sözlərinə görə, paytaxtda hər 9-10 şagirdə bir müəllim düşsə də, balans ibtidai siniflərdə pozulur. Bakı şəhərində 320 məktəb olduğunu və burada 48 min müəllimin dərs dediyini vurğulayan K.Əsədov qeyd edir ki, paytaxtda bir şagirdə 9-10 müəllm düşdüyü halda, bölgələrdə 11-12 şagirdə bir müəllimdir. O hesab edir ki, müəllimlərə az dərs saatının düşməsi həm də şagird sayından asılıdır: “Bu məsələdə nə Bakı Şəhər Təhsil İdarəsinin, nə Təhsil Nazirliyinin, nə də məktəb direktorunun günahı var. Məsələn, məktəbin dərs saatı hər tədris ilinə görə fərqli olur. Bəzi məktəblərdə sinif sayı azalır, bəzilərində isə çoxalır. Problemin aradan qaldırılması yolu kimi təklif edirəm ki, müəllimlərin əməkhaqqları stabil olsun. Yəni 12 saat dərsini deyib, ayda 500 manat maaşını alsın”-deyə K.Əsədov qeyd etdi.
İradə SARIYEVA
