Bu günlərdə bir qrup feminist fəal əri tərəfindən öldürülən Sevinc Məhərrəmovanın qətli ilə bağlı Xəzər rayon Polis İdarəsinin qarşısında aksiya keçirməyə cəhd edib. Onlar simvolik olaraq idarənin qapısına qırmızı boya atıblar. Məsələ ilə bağlı Daxili İşlər Nazirliyinin mətbuat xidmətinin şöbə rəisi Elşad Hacıyev bildirib ki, hadisə zamanı saxlanılan olmayıb.
Polis İdarəsinin qarşısına toplaşan fəalların iddiasına görə, onlar daha sonra inzibati binaya çağırılaraq zorakılığa məruz qalıblar. Sözügedən İdarənin Elmir İbrahimov və Pərviz adlı polis əməkdaşlarından şikayətçi olan qadınlar döyüldüklərini və şəxslərinə qarşı təhqiredici ifadələrə yol verildiyini iddia ediblər. Elşad Hacıyev bu iddialara da münasibət bildirib: “Sözügedən şəxslərin iddiaları əsassızdır və həqiqəti əks etdirmir. Heç bir şəxsə bu və ya digər baxımdan təzyiq göstərilməyib”.
Xatırladaq ki, avqustun 3-də 1997-ci il təvəllüdlü Sevinc Məhərrəmova əri Füzuli Qarayev tərəfindən paytaxtın Xəzər rayonu, Zirə qəsəbəsi ərazisində çoxsaylı bıçaq zərbələri nəticəsində öldürülüb. Hələ mart ayında S. Məhərrəmovanın əri Füzuli Qarayev tərəfindən işgəncələrə məruz qalması ilə bağlı sosial şəbəkədə məlumat yayılmışdı. Ötən gün DİN növbəti dəfə açıqlama yayaraq bu məsələdə polisin daha çox müzakirə edilməsinə aydınlıq gətirmişdi. Elşad Hacıyev hadisəni ağır, faciəvi adlandıraraq bu halın baş verməməli olduğunu qeyd etmişdi.
Hansısa ailədə baş verən münaqişənin sonu qətl hadisəsilə nəticələnirsə, burada polisin günahı nədir? Biz şahid oluruq ki, analoji cinayətlər dünyanın bütün ölkələrində baş verir. Buna görə feministlərin polisi hədəf seçməsi nə dərəcədə doğrudur?
Hüquqşunas Şəmsəddin Əliyev “Bakı-Xəbər” ə açıqlamasında bildirdi ki, tarixin bütün formasiyalarında cinayətlər olub: “Onları müxtəlif cür təsnifatlandırmaq olar. Həmin cinayətlər müxtəlif xarakterlidir. Sırasında qadın və kişi ölümləri də var. Dövlətin işi həmin cinayətləri törədənlərə layiqli cəzanı verməkdir. Cinayət varsa, mütləq cəza da var. Bizim ölkədə də bu sahədə hüququn aliliyi tam təmin edilir. Bütün bu məsələyə görə məsuliyyəti yalnız bir qurumun üzərinə yıxmaq doğru deyil. Bü düşüncə hüquqi biliklərin dayazlığına dəlalət edir. Son günlər bir qrup qadının belə ağır cinayətlərə görə polisə qarşı əxlaqi dəyərlərə sığmayan aksiyalar keçirmələri təşkil edilmiş provokasiyadır. Cinayətlərin baş verməsinə səbəb sosial amillərdi. Bunu da polis tənzimləmir. Azərbaycanda baş verən cinayətlərin sayı və onların açılma dərəcəsinə görə polisimizin göstəriciləri qənaətbəxşdi. Hətta bu sırada biz bütün MDB ölkələrindən irəlidəyik. Cinayətlər də zamanın tələbinə görə öz xarakterini dəyişir. Tutaq ki, 30 il əvvəl insan alveri yox idisə, hazırda var. Azərbaycan polisinin davranışından cəmiyyətimiz məmnundur. Bir qrup qadının polisi nüfuzfan salmaq cəhdi heç bir fayda verməyəcək. Bu qərəzli münasibət və hərəkətlərə mütləq hüquqi qiymət verilməlidir. Zərif cinsin nümayəndələrinə belə hərəkətləri ümumiyyətlə yaraşdırmıram”.
Ekspertin sözlərinə görə bu cür hadisələrin cəmiyyətdə az olması üçün məsələyə elmi yanaşma ortaya qoyulmalıdır: “ Təklif edirəm ki, Milli Elmlər Akademiyasında ailə münasibətlərini öyrənən bir elmi-tədqiqat institutu yaradılsın. Münaqişəli ailələr var, ancaq onların heç də hamısı qeydiyyatda deyil. Həmin ailələrdəki vəziyyət öyrənilsə, belə cinayətlərin qarşısı mütləq alınar”.
Məhəmmədəli QƏRİBLİ
