“Akkord” Şirkətlər Qrupunun işçiləri Prezident İlham Əliyevə şikayət ünvanlayıb. Onlar bildirir ki, aylardır əmək haqlarını ala bilmirlər. İşçilər onu da qeyd edir ki, şirkət rəhbəri onların əmək haqqını verməməklə yanaşı, həm də onlarla maraqlanmır.
İşçilər bildirir ki, şirkət 2019-cu ildən bugünə kimi onların nə əmək haqqını, nə məzuniyyət pulunu ödəyib. Yaranmış vəziyyətlə əlaqədar şirkət rəhbərinə müraciət etsələr də, onlara müsbət cavab verilməyib.
Şikayətçilərin bildirdiyinə görə, əməkhaqlarının verilməməsi işçilərin sosial durumunu ağırlaşdırıb: “Borc-xərclə yaşayırıq: “Akkord” Şirkətlər Qrupundan heç kim bir dəfə də olsun işçilərlə görüş keçirərək əməkhaqlarının gecikdirilməsinin səbəblərini izah etməyib, məktub və ya bəyanat formasında işçilərə məlumat verməyib”.
Qeyd etdiyimiz kimi, əmək haqlarını ala bilməyən bir qrup şikayətçi ölkə başçısı İlham Əliyevə müraciət ünvanlayıb. Müraciətdə deyilir: “Hörmətli Cənab Prezident!
Sizə bildirmək istəyirik ki, biz bir neçə ildir ki, “Akkord” Şirkətlər Qrupunda müxtəlif vəzifələrdə işləyirik. Biz əmək haqqımızı tələb etmək üçün iyulun 23-də və bu gün - avqustun 3-də “Akkord” Plazada rəhbərliklə görüşmək istəsək də, mühafizə xidmətindən başqa bizi qarşılayıb problemimizlə maraqlanan olmadı. Biz şirkətin binasında sözümüzü deməyə bir adam da tapmırıq. 2019-cu ildən indiyə kimi biz şirkətdən maaş və məzuniyyət pulumuzu ala bilmirik. Kimə də zəng vurursan, utanmaz-utanmaz cavabında deyir ki, maaş verməyə pulumuz yoxdur. Getsinlər o pulu yeyən adamlardan bunu soruşsunlar. Biz qara fəhləyik, 140 dərəcə asfaltın istisində işləmişik, amma deyirlər ki, pulumuz yoxdur. Heç bir səbəb göstərmədən bizim iş müqaviləmizə xitam verilib.
Bizim özümüzün də banklara kredit borcumuz var. Biz “Akkord”un Şəmkir, Qazax, Özbəkistan, Qazaxıstan və Gürcüstan layihələrində çalışmışıq. İş yoldaşlarımızın bir çoxu əmək haqlarını ala bilmədikləri üçün ölkəyə qayıda bilmir. İşçilərimizdən qəzaya düşənləri var və heç səhhətləri ilə maraqlanan yoxdur. Əksinə, bizi şərləyib böhtan atırlar, məhkəməyə verib hədələyirlər.
Hörmətli Cənab Prezident!
Bu gün bir vətəndaş kimi Sizin rəhbərliyiniz altında ordumuzun Qarabağ torpaqlarını işğaldan azad etməsinə ürəkdən sevinir və Sizə buna görə təşəkkürümüzü bildiririk. Vətən torpağımızın hər bir qarışı bizim üçün əzizdir. Amma çox təəssüflər olsun ki, bu cür şirkət rəhbərləri bizi dövlətimizdən narazı salmaq üçün əlindən gələni edir. Axı belə olmaz. Sizdən xahişimiz odur ki, əmək haqlarımızın verilməsi üçün “Akkord” Şirkətlər Qrupunun rəhbərliyinə öz ciddi tapşırıqlarınızı verəsiniz”.
Məsələ ilə bağlı “Akkord" şirkəti ilə əlaqə saxlamağa çalışsaq da, şirkətdən zənglərimizə cavab verən olmadı.
Günel CƏLİLOVA
