Narkomaniya uzun illərdir dünyanın ən böyük problemlərindən biri kimi bəşəriyyəti düşündürür və narahat edir. Cəmiyyətin ciddi bəlasına, xalqın, millətin təhlükə mənbəyinə çevrilən narkomaniyaya meyl, təəssüflər olsun ki, günü-gündən artmaqdadır.
Əksərən də yeniyetmə və gənclər arasında. Çünki onlar daha çılğın və emosionaldırlar, istəklərini həyata keçirmək üçün ən gözlənilməz yollara da əl atırlar. Bu da, təbii ki, onları könüllü olaraq narkotik alverçilərinin müştərisi edir. Hazırda bəşəriyyət qarşısında duran ən mühüm məsələlərdən biri narkotiklərin qanunsuz dövriyyəsi kimi təhlükəli cinayətkarlıqla qətiyyətli mübarizə aparmaqdır.
Azərbaycanda "patı", "şüşə", "metamfetamin", "kakos" kimi süni narkotik istifadəçilərinin sayı durmadan artır
Narkobiznes hazırda çox mənfəətli kriminal sahələrdən biridir. Ondan əldə edilən gəlirlər başqa transmilli cinayətlərə, xüsusən də terrorçuluğun maliyyələşdirilməsinə və törədilməsinə yönəldilir. Bu da, öz növbəsində, onun təhlükəliliyini daha da artırır. Təəssüflə qeyd etməliyik ki, bizdən asılı olmayan səbəblər ucbatından Azərbaycan da bu gün ən ağrılı problemlərdən birinə çevrilmiş narkotizm bəlasına düçar olmuş ölkələr sırasındadır.
Son illər Azərbaycanda narkomaniyadan əziyyət çəkənlərin sayı artıb. Bunu statistik rəqəmlər də sübut edir. Statistikaya əsasən, 2000-2005-ci illər arasında bu bəladan əziyyət çəkənlərin sayı 14 min civarında idisə, son beş ildə 20 mindən yuxarı olub, hətta 2017-ci ildə 30 min 131, 2018-ci ildə isə 31 min 432 nəfər müalicə-profilaktika müəssisələrində qeydiyyatda olub. Son vaxtlar Azərbaycanda "patı", "şüşə", "metamfetamin", "kakos" kimi süni narkotik istifadəçilərin sayı durmadan artır. Ən pisi odur ki, yeniyetmələr, gənclər də bu şəbəkəyə cəlb olunur. Müasir dünyanın bəlasına çevrilən bütün digər ölümlərin - qəzaların, xəstəliklərin və s. bərabərində bütün zamanların bəlası olan "Ağ ölüm" kimi ad verdiyimiz narkomaniya, təəssüflər olsun ki, hər zamankı kimi bu gün də aktualdır.
Onunla mübarizə bütün bəşəriyyətin xilası üçün vacibdir
Narkomaniya tək bir cəmiyyətin deyil, dinindən, irqindən, milli mənsubiyyətindən asılı olmayaraq bütün bəşər övladlarının bəlasıdır və onunla mübarizə bütün bəşəriyyətin xilası üçün vacibdir. Məhz buna görə də bütün dövlətlərin əsas marağı insanların rifahının yaxşılaşdırılması və maraqlarının təmin olunmasına yönəlib. İnsan amili dedikdə ilk növbədə ağıla gələn insanların sağlamlığıdır. Yalnız fiziki deyil, həm də mənəvi cəhətdən sağlam cəmiyyətin formalaşdırılması bütün dövlətlərin siyasətinin prioritet istiqamətlərindəndir.
Tarix boyu müəyyən dövrlərdə insanların kütləvi məhvinə səbəb olan müxtəlif xəstəliklər zaman-zaman olmuş və bütün dünya ölkələri onlarla mübarizəyə səfərbər olmuşlar. Bu işdə həm cəmiyyətin ayrı-ayrı üzvlərinin, həm dövlət siyasətinin, həm də ictimai birliklər, qeyri-hökumət təşkilatlarının birliyi daha müsbət nəticələrin əldə olunmasını stimullaşdırır.
İlk növbədə isə ailə içindən fərdi olaraq buna təkan verməli, övladlarımızın sosial maraqlarına diqqət etməli, onları faydalı istiqamətlərə yönləndirməliyik. Onların fiziki və ya yaradıcı imkanlarına uyğun olaraq istiqamət verməklə sağlam həyat tərzi, düzgün həyat rejimini təmin edəcək maraq dairələrinin formalaşmasına dəstək olmalıyıq. Məsələn, müxtəlif idman sahələrinə maraq göstərən uşaqların fiziki üstünlüklərini nəzərə alaraq bu yöndə dəstək göstərməliyik. Hər hansı yaradıcılıq qabiliyyəti olanları həmin sahə üzrə istiqamətləndirməliyik.
Ermənilər Azərbaycan gənclərini “patı” ilə zəhərləyir
Son zamanlar “patı” adlandırılan narkotik vasitənin Azərbaycanda geniş yayılması bir sıra arzuolunmaz hadisələrə yol açıb. Hüquq-mühafizə orqanları bu təhlükəli sintetik narkotik vasitəni satanlarla bağlı ciddi tədbirlər görsələr də, hələ də “patı” ciddi fəsadlar törədir. Maraqlıdır ki, bu günlərdə sözügedən narkotikin ermənilərin yaşadığı Xankəndidəki xüsusi laboratoriyalarda hazırlandıqdan sonra İran vasitəsilə Azərbayacana keçirildiyi haqda fikirlər yayılıb. Dünya Azərbaycanlıları Assambleyasının sədri Rəşad Quliyevin Almaniyadakı etibarlı mənbələrə əsaslanaraq yaydığı bu informasiyaya diqqət artmaqdadır. Artıq Türkiyə media orqanları da hadisənin təfərrüatlarını araşdırır.
Türkiyənin tanınmış media orqanı olan “Yeni Akit” qəzeti məsələni ölkə gündəminə daşıyıb. Nəşrin "Ermənilər Azərbaycan gənclərini zəhərləyir" başlığı ilə xəbəri manşetə çıxarması qardaş ölkənin məsələyə biganə qalmadığını göstərir.
Gənclərimizin fiziki sağlamlığının və mənəvi saflığının qorunması bütün cəmiyyət olaraq əsas qayğılarımızdan biridir. Gələcəyimizi hər cəhətdən sağlam və uğurlu görmək ən böyük arzumuzdur, bu səbəbdən insan həyatını hər mənada iflic edən bu ümumbəşəri bəlaya qarşı mübarizədə hər zaman birlik göstərməli və qətiyyətli olmalıyıq!
Məhəmmədəli QƏRİBLİ
Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
