“Meridian” MTK tərəfindən inşa olunan və 8 ildir istismara verilən binamızda təhlükəsizliklə bağlı normativlər tamamilə pozulub. Həyətdə qanunsuz tikililər - yeni bina, qaraj inşa olunub, giriş özəlləşdirilərək satılıb, qonşu binanın girişindən istifadə edirik. Hazırda öz təhlükəsizliyimizə görə çox narahatıq”.
Bu sözləri Bakının Xətai rayonu, Nəcəfqulu Rəfiyev 25A ünvanında yerləşən 16 mərtəbəli binanın bir qrup sakini sosial şəbəkədə yazıb. Sakin Rauf Əsgərovun sözlərinə görə, hər hansı təbii fəlakət olsa, böyük faciələr qaçılmaz olacaq: “Biz bu binada mənzil alanda hazırkı vəziyyət yox idi, bizə göstərilən layihədə gözəl park, parkinq yeri və sair var idi. Pullarımızı tam ödəyəndən sonra binanın həyətində başqa bir bina da tikildi. Təhlükəsizlik normativlərinə görə, çoxmərtəbəli binanın yanında bina tikilə bilər, o halda ki, arada binanın hündürlüyü qədər məsafə olsun. Fəlakət, yanğın olsa, ən azı 5 yanğınsöndürən maşın həyətə girib-çıxmalıdır. Bura isə bir maşın belə girsə, çıxa bilməyəcək”.
“Meridian” MTK - Nazim Əhmədov: “Bu yaxınlarda Fövqəladə Hallar Nazirliyinin nümayəndəsi əraziyə baxış keçirib və orada qanunsuz heç bir şeyin olmaması barədə akt tərtib edib”
Sakinlərin şikayəti ilə bağlı “Meridian” MTK-nin rəhbəri Nazim Əhmədov bildirdi ki, bu yaxınlarda Fövqəladə Hallar Nazirliyinin nümayəndəsi əraziyə baxış keçirib və orada qanunsuz heç bir şeyin olmaması barədə akt tərtib edib: “Digər qurumlar da binanın həyətinə baxış keçirib və qanunsuzluq aşkar olunmayıb. Qanunun tələbinə uyğun olaraq orada sakinlərin təhlükəsizliyi təmin olunur”.
Mayis Əliyev: “Bu gün əksər çoxmərtəbəli binalarda təhlükəsizlik təmin olunmur”
Sosial sahə üzrə ekspert Mayis Əliyev bildirdi ki, bu gün əksər çoxmərtəbəli binalarda təhlükəsizlik təmin olunmur: “İstər binanın həyətinə avtomobillərin girişi olsun, istərsə də yanğınla bağlı xüsusi normativlərə əməl olunmur. MTK-lar necə gəldi binanı tikib təhvil verir, sonrasını isə fikirləşmir. Sonradan faciənin yaşanmaması üçün aidiyyəti qurumlar bu tip məsələləri nəzarətə götürməlidir”.
Günel CƏLİLOVAs
