General, Milli Qəhrəman Rövşən Əkbərovun həbs səbəbi kimi göstərilən qətl hadisəsi ilə bağlı yeni faktlar üzə çıxıb. Məlum olduğu kimi, Rövşən Əkbərovun barəsində olan cinayət işi üzrə Baş Prokurorluq tərəfindən aparılan istintaq yekunlaşdırılıb. İş hazırda Bakı Hərbi Məhkəməsində məhkəmənin sədri Həbib Həsənovun icraatındadır.
Aparılmış istintaqla Rövşən Əkbərovun 2001-ci il mayın 31-dən iyunun 1-nə keçən gecə Kiyev şəhəri, Deqtyaryov küçəsi 7 ünvanda yerləşən “Sikora” kafesində yeyib-içdikdən sonra, saat 4 radələrində həmin kafenin yaxınlığında Elçin Əliyev ilə aralarında yaranmış cüzi münaqişə səbəbindən xuliqanlıq niyyəti ilə sonuncunun ürək nahiyəsinə kəsici-deşici predmetlə xəsarət yetirərək Elçin Əliyevi qəsdən öldürməsinə əsaslı şübhələr müəyyən edilib. Rövşən Əkbərova Cinayət Məcəlləsinin 12.1, 120.2.2 (qəsdən adam öldürmə) və 12.1, 221.3-cü (xuliqanlıq) maddələri ilə ittiham elan edilərək, barəsində məhkəmənin qərarı ilə həbs qətimkan tədbiri seçilib.
Cinayət işi üzrə şahid qismində Diasporla İş üzrə Dövlət Komitəsinin sabiq rəhbəri Nazim İbrahimov və fövqəladə hallar nazirinin müavini Orucəli Hacıyev də dindirilib. Onlar Elçin Əliyevi Rövşən Ələkbərovun qətlə yetirdiyini deyiblər. Amma sözügedən şəxslər buna qədər istintaqa verdikləri ifadələrdə qətlin kim tərəfindən törədildiyindən xəbərsiz olduqlarını demişdilər.
Göründüyü kimi, Azərbaycanda kifayət qədər tanınan şəxslərin bu cinayət işi ilə bağlı daban-dabana zidd olan ifadələr verdikləri üzə çıxır. Xüsusilə ağır cinayət sayılan bu işlə bağlı indiki və sabiq məmurların verdikləri ziddiyyətli ifadələr onların özünə hüquqi məsuliyyət yarada bilərmi?
Azərbaycan Vəkillər Kollegiyasının üzvü, hüquqşunas Mehman Muradlı “Bakı-Xəbər”ə açıqlamasında bildirdi ki, hər iki şəxs bu qətl hadisəsilə bağlı fərqli şahid ifadələri veriblər: “Hüquqi müstəvidə bu yolverilməzdir. Çünki biz görürük ki, məhz onların ifadəsi əsasında istinaqın gedişi dəyişib. İstinaqa cəlb edilən istənilən şəxsə hüquqları izah olunur. Onlara bildirilib ki, bilə-bilə yalan ifadə vermək onların barəsində hüquqi məsuliyyət yaradır. İstənilən şahidə bu iltizama imza etdirirlər. Əminəm ki, hər iki şəxsə bu hüquqları izah olunub. Üstəlik də sözügedən hər iki şəxs kifayət qədər yüksək dövlət postları tutan adamlardı. Onlar hüquqlarını gözəl bilməlidirlər. Şahid ifadəsinin dəyişməyin özü problemli məsələdi. Belə hallarla bağlı istintaq həmin adamlar barədə cinayət təqibinə başlaya bilər. Onlarla bağlı ayrı icraatda iş açılır və məsuliyyət dərəcələri müəyynləşir. Yalan ifadə verməklə bağlı işin araşdırılmasını prokurorluq həyata keçirir. Hazırda bu cinayət işi məhkəmə istinaqı mərhələsindədir. İstinaq həmin adamaları şahid kimi tanıyıbsa, deməli, onlara hər hansı iddiası olmayıb. Hüquqi prosedura görə, təqsirləndirilən şəxslə bağlı ittiham aktı tərtib edilirək məhkəməyə göndərilir. Həmin ittihamnamədə şahidlərin adı qeyd olunur. Yəni bu adamların məhkəmədə iştirakı mütləqdir. Çünki iş üzrə əsas şahid gedirlər. Hətta prosesdə iştirakdan yayınsalar belə, təqsirləndirənin vəkilləri və ya özü onların iştirakını tələb edə bilər. Məhkəmənin səlahiyyəti var ki, şahidlərin ziddiyyətli ifadə verməsilə bağlı ibtidai istintaq qarşısında onlar barədə hüquqi ölçünün götürülməsi tələbilə vəsatətlə çəxış etsin”.
Məhəmmədəli QƏRİBLİ
