Orta ümumtəhsil məktəblərinin bir çoxunda direktor təyinatlarının reallaşmaması ictimai müzakirələrə səbəb olub. Bununla bağlı bir çox mülahizələr irəli sürülür.
Qeyd edilir ki, 2014-2015-ci tədris ilindən etibarən Təhsil Nazirliyi orta ümumtəhsil məktəblərində işləmək üçün direktorları ilk dəfə olaraq bir neçə mərhələli müsabiqə ilə seçməyə başladı. Bakı üzrə 310 məktəbdən 90-a yaxınının direktoru müsabiqə yolu ilə seçilib. Azərbaycan üzrə isə 4500 məktəbdən cəmi 740-a yaxınının direktoru bu müsabiqə ilə təyin olunub.
Təhsil ekspertləri hesab edir ki, son illərdə həm paytaxt Bakıda, həm də regionlarda 500-dən çox məktəbin hələ də direktorsuz qalması Təhsil Nazirliyinin müasir tələblərə cavab verən, fəaliyyətini məktəbin, təhsilin inkişafına yönəldə biləcək kadrların tapılmasında çətinlik çəkməsi ilə bağlıdır. Hələ də müsabiqə və müsahibədən uğurla keçənlərin təyin olunmaması direktorların təyinatı sahəsindəki şəffaflığı şübhə altına alır. Statistikaya görə əhəmiyyətli sayda məktəbin direktorsuz qalmasının səbəbini başqa hansı amillərlə izah etmək olar?
Təhsil məsələləri üzrə ekspert, professor Məhərrəm Zülfüqarlı “Bakı-Xəbər”ə açıqlamasında bildirdi ki, məktəb direktorları son illərdə imtahanla seçilir: “Diaqnostik qiymətləndirmədən keçən müəllimləri direktor qoyurlar. Mən sistemi əvvəllər də tənqid etmişəm. Yalnız imtahanda müsbət nəticə əldə edən adam insanlara, kollektivə rəhbərlik edə bilməz. Bunun üçün böyük təcrübə lazımdır. Təkcə savad kifayət etmir. Tutaq ki, bir cavan adam gəldi və test suallarına əla cavab verdi oldu direktor. Bu yanaşma doğru deyil. Əvvəllər məktəblərdə rüşvət, korrupsiya halları vardısa, son illər bunu yığışdırıblar. Bununla paralel direktorluq kimi məsul vəzifəni daşıyacaq adamın əməkhaqqı artırılmalıdır. Ona elə bir əməkhaqqı vermək lazımdır ki, gözü başqa yerdə olmasın. Hesab edirəm ki, son dövrlər məktəblərdə olan direktor çatışmazlığı bu amillə əlaqəlidir. Əməkhaqqı normal olsa, korrupsiyadan uzaq olan adamların direktor işləmək həvəsi daha da artar. Qısası, müəllimlər əməkhaqqı az, məsuliyyəti çox olan yerdə işləmək istəmir. Çıxış yolu var. Sınaq müddəti qoyulmalıdır. Imtahanı verəndən sonra şəxs bir müddət direktor vəzifəsinin icrasını həyata keçirə bilərsə, onun işinə davam demək olar. Ali məktəblərdə olan təcrübəli müəllimlərin təcrübəsindən istifadə etmək olar. Yalnız cavan kadrlara önəm vermək lazım deyil. Ola bilər ki, yaşlı kadrdı, amma bu işə cavandan çox yarayır. Biz görürük ki, bir çox hallarda QHT kimi gənc nazirlərə etdiyimiz müraciətlər cavabsız qalır. Belə halların nəticəsində bütün yük Prezident Administrasiyasının üzərinə düşür. Çalışmaq lazımdır ki, idarəetmə mexanizmi tam təkmilləşsin. Vəzifələrə təyinat yalnız yaş amilinə görə deyil, həm də şəxsi göstəricilərə, təcrübəyə görə olsun. Belə vəzifələrdə işləmək üçün stimullaşdırıcı tədbirlər olmalıdır”.
Məhəmmədəli QƏRİBLİ
