Son günlər bütün dünyada, o cümlədən də Azərbaycanda koronavirusa yoluxma halları artıb. Bu gün bir çox Avropa ölkəsində, eləcə də qonşu İran, Türkiyə, Rusiya, Ermənistan və Gürcüstanda da virusa yoluxma hallarının sürətlə artdığını müşahidə edirik. Sözügedən ölkələrdə virusdan ölüm halları kütləvi olsa da, Azərbaycanda ölüm halları 1-2 nəfər nisbətində dəyişir. Ölkəmizdə şagirdlər və məktəb işçiləri arasında da virusa yoluxanlar var. Son məlumata görə, 11 məktəbli virusa yoluxub.
Qeyd edək ki, hələ bir neçə ay əvvəl Ümumdünya Səhiyyə Təşkilatı (ÜST) dünyaya çağırış edərək payızda koronavirus pandemiyasının daha sürətlə yayılacağını, virusun yeni dalğasının çox təhlükəli olduğunu elan edib.
Bilirik ki, virusun yayılmasına səbəb kimi əsasən müxtəlif ölkələrdə, o cümlədən də Azərbaycanda yumşalmaya gedilməsi, müəyyən obyektlərin, ictimai iaşə müəssisələrinin açılması göstərilir.
Bir çox ekspert hesab edir ki, əvvəlki kimi kütləvi olmasa da, bu gün də sosial məsafə saxlamayan, maska taxmayan, gigiyenik tələblərə əməl etməyənlər var, eyni zamanda da ictimai nəqliyyatda sıxlıq hələ də mövcuddur. Bu kimi amillərin də virusun artmasına təkan verdiyini deyən ekspertlərin fikrincə, insanlar bu təhlükəli virusun ikinci dalğasından özlərini mümkün qədər qorumalıdırlar.
“Karantin qaydalarının pozulması, virusun yayılması risqi ictimai nəqliyyatda baş verir”
Tanınmış tibb mütəxəssisi, professor Adil Qeybulla “Bakı-Xəbər”ə bildirdi ki, əslində, payız aylarında virusa yoluxma hallarının artacağı əvvəldən məlum idi. Məktəblərin açılması ilə əlaqədar olaraq şagirdlərin, müəllim və digər məktəb işçilərinin virusa yoluxma risqinin olacağının əvvəlcədən deyildiyini bildirən A.Qeybullanın sözlərinə görə, kollektivdə bu cür hallar baş verə bilir. “Əlbəttə, şagirdlər arasında virusun yayılması əvvəlcədən proqnozlaşdırılırdı. İstənilən halda, məktəb müəyyən bir ünsiyyət yaradır və infeksiyanın da keçmə mənbəyi təmaslardır. Amma məktəblərdə karantin qaydalarının tam ideal şəkildə gözlənilməsi düşüncəsində deyiləm. Çünki orta məktəb müəllimlərinin özlərinin buna necə əməl etməsinin özü yoxlanılmalı, dəqiqləşdirilməlidir. Şagirdlər sinif otaqlarında necə yerləşdirilir, hər sinif otağının sahəsinə görə orada şagird varmı, bütün bunlar araşdırılmalıdır. İkincisi, başdan demişdim, ən çox karantin qaydalarının pozulması, virusun yayılması risqi ictimai nəqliyyatda baş verir. İctimai nəqliyyatda çox böyük sıxlıq var, bununla yanaşı, insanlar maska taxmadan, fiziki məsafə gözləmədən, girişdə-çıxışda dezinfeksiyaedici məhlullardan istifadə etmədən ictimai nəqliyyatdan istifadə edirlər. Bu da, təbii ki, yoluxmanın artmasına təsir edir. Düzdür, COVID-19 mutasiya edir, öz əvvəlki təsirini itirir. Son vaxtlar həm də soyuqdəymə xəstəliyinin də artması müşahidə edilir. Çünki hər il bu baş verir, xalq arasında qrip adlandırılan çoxsaylı infeksiya olur və tənəffüs yollarında baş verir”.
A.Qeybulla qeyd etdi ki, soyuqdəymə xəstəliyi də koronavirusla yanaşı baş verə bilər. Mütəxəssis deyir ki, xəstəliklərarası differensial diaqnostika çox vacibdir. “Bu baxımdan da daha diqqətli olmaq lazımdır. ÜST tərəfindən karantinin “son zəngi” vurulana qədər biz davranışlara, qaydalara əməl etməliyik, buna riayət etməyə məcburuq” - deyə müsahibimiz vurğuladı.
İradə SARIYEVA
