01/04/2020 14:45
728 x 90

Merkel iki il əvvəl Paşinyana yönəlik Qarabağla bağlı dediklərini “unutdumu” - Paşinyan Almaniyada...

img

Almaniyanın paytaxtı Berlində işgüzar səfərdə olan Ermənistanın Baş naziri Nikol Paşinyan Fridrix Ebert Fondunda çıxış edərkən yenidən sərsəm bəyanat verib.

Qarabağ probleminə toxunan Paşinyan növbəti dəfə öz işğalçılıq xislətinə sığınaraq sərsəm fikirlər səsləndirməkdən çəkinməyib: “Qarabağ Ermənistandır və nöqtə” bəyanatının çox dəqiq və konkret izahatı var”.

Baş nazir məsələni birtərəfli yanaşma ilə həll etməyin mümkün olmadığını vurğulayıb. Onun sözlərinə görə, birtərəfli həll nəinki problemi həll etməyəcək, əksinə, onu daha da ağırlaşdıracaq:

“Qarabağın Ermənistanın olması ilə bağlı açıqlamama gəlincə, bunun çox sadə və konkret izahı var. Azərbaycanın Qarabağa hücumunu Ermənistan Respublikasına hücum kimi qəbul edəcəyik. Ermənistan Respublikası Qarabağın təhlükəsizliyinin təminatçısıdır”.

Ancaq, digər tərəfdən, Paşinyan cəbhə xəttində gərginliyi azaltmaq üçün Azərbaycan Prezidenti İlham Əliyevlə əldə olunmuş razılığı yüksək qiymətləndirib. Qeyd edib ki, bunun sayəsində hər iki tərəfdən əsgər ölümlərinin sayını azaltmaq mümkün olub: “2018-ci ilin sentyabrından ilk dəfə bölgədə gərginlik əvvəllər görünməmiş dərəcədə azaldı. Ümid edirəm ki, konstruktiv müzakirələr nəticəsində nəinki bu nisbi sabitliyi qoruyub saxlaya, həm də münaqişənin hüquqi həllinə doğru irəliləyə bilərik ”.

Çox maraqlıdır ki, Paşinyanla görüşdə Merkel ona lazım olan tərzdə irad tutmayıb. Çünki 2018-ci ilin yayında Merkelin Cənubi Qafqaza turnesi baş tutdu. Həmin turne çərçivəsində Merkel Paşinyanla görüşündən sonra bildirdi ki, Ermənistanda baş verən “məxməri inqilab”dan sonra danışıqlar prosesində yeni mərhələ başlayacaq. O bunu yenicə inqilab olmuş ölkənin lideri Paşinyanla görüşündən sonra Bakıda bəyan etmişdi. Ancaq həmin zamandan bəri Paşinyan nəinki yeni mərhələ açdı, əksinə, danışıqlar prosesini köhnədən də pis vəziyyətə gətirdi. Hətta verdiyi sərsəm bəyanatı Berlində belə təkrarladı. Merkelin bütün bu oyunbazlığa susması nə dərəcədə doğrudur?

Politoloq Elşən Mustafayevin sözlərinə görə, çox təəssüflər olsun Merkel də bu məsələdə  səmimiyyətlə deyil, diplomatik tərzdə davranır: “Ermənistan və Azərbaycan 20 ildən çoxdur Dağlıq Qarabağ uğrunda silahlı münaqişədədir. 1994-cü ildə Rusiyanın vasitəçiliyilə imzalanmış atəşkəs razılaşmasından sonra Dağlıq Qarabağ və ətrafındakı Azərbaycan əraziləri erməni silahlılarının əlinə keçib.

BMT qəbul etdiyi 4 qətnamə ilə erməni silahlı qüvvələrinin geri çəkilməsini tələb edib.

Həmin dövrdən bəri tez-tez atəşkəs pozulması halları baş verir və tərəflər münaqişənin həll edilməməsinə görə bir-birini ittiham edir. ABŞ, Fransa və Rusiyanın daxil olduğu Minsk Qrupu həmin vaxtdan etibarən münaqişəni həll etməyə çalışır. Ancaq ortada heç bir nəticə yoxdur. Almaniya Avropanın və dünyanın nüfuzlu ölkəsidir. Daim Dağlıq Qarabağ konfliktinin nizama salınmasına maraq göstərib. Ancaq Merkelin gözü qarşısında Paşinyan bu cür tryuklar göstərirsə, mütləq cavabı verilməli idi. Çünki Merkel Paşinyana böyük ümidlər bəsləyirdi. Onu demokrat sayırdı və ümidvarıydı ki, onun tərəfindən hansısa əməli addımlar atılacaq. Əvəzində biz tam fərqli mənzərəni gördük. Hətta Paşinyan bir qədər də irəli gedərək danışıqları müharibəyə sürükləyəcək “nida” bəyanatını yenidən səsləndirdi. Merkelin bu cür davranışlara susqun qalması qeyri-səmimilikdən xəbər verir və təmsil etdiyi ölkənin adına xələl gətirmiş olur”.

Məhəmmədəli QƏRİBLİ

Son xəbərlər