Şikayət edilən dairələr sivil araşdırılırsa, küçə-meydan aksiyaları nəyə xidmət edir...
Məlum olduğu kimi, MSK tərəfindən bir neçə seçki dairəsində seçkilərin nəticələri ləğv edilib. 4 dairədə nəticələrin ləğv edilməsindən sonra bəzi deputatlığa namizədlər “etirazçı” obrazında meydana çıxıblar və onlar namizədliklərini verdikləri dairənin də nəticələrinin ləğv edilməsini tələb edirlər. Hətta müəyyən deputatlığa namizədlər bununla bağlı MSK-nın qarşısında aksiyalar keçirməyə də cəhd göstərirlər. Bundan əlavə, radikal müxalifət də fevralın 16-da aksiya keçirməklə bağlı iddia ortaya qoyub.
Onu da qeyd edək ki, Prezident İlham Əliyev Kürdəmirdə səfərdə olarkən seçkinin nəticələri ilə bağlı narazılıqların araşdırılacağını, günahkarların cəzalandırılacağını bildirib. Bu o deməkdir ki, seçki prosesində müəyyən dairələrdə baş verən qanun pozuntusuna göz yumulmayacaq və buna rəvac verənlər cəzasını alacaq, ədalət öz yerini tutacaq. Açıq görünür ki, dövlət başçısı da, hökumət də bu məsələdə baş verən neqativ halların aradan qaldırılmasında maraqlıdır.
Bu halda, bəzi namizədlərin, eləcə də radikal müxalifətin kütləvi aksiya keçirmək istəyi, cəhdi nə dərəcədə məntiqlidir?
- “Radikalların, eləcə də onlar kimi şou xatirinə aksiya keçirməyə cəhd göstərənlərin davranışlarında heç bir məntiq görmürəm”
“İki Sahil” qəzetinin baş redaktoru Vüqar Rəhimzadə “Bakı-Xəbər”ə bildirdi ki, bəzi deputatlığa namizədlərin aksiya keçirməyə cəhd göstərməsi və radikal müxalifətin aksiya keçirmək niyyəti şoudan başqa bir şey deyil: “Bəzi namizədlərin və radikal müxalifətin aksiya keçirmək istəyi şoudan başqa bir şey deyil, onlar növbəti dəfə şou yaratmaq istəyirlər. Bilirsiniz ki, artıq 4 seçki dairəsinin nəticələri ləğv edilib. Cənab Prezident də qeyd edib ki, seçki prosesində baş verən bütün narazılıqlar, şikayətlər araşdırılacaq və neqativ hallara yol verənlər cəzalandırılacaq. Ortaya kifayət qədər iradə qoyulub və dövlət özü bu sahədə baş verən neqativ halların araşdırılmasına, günahkarların üzə çıxarılıb cəzalandırılmasına maraq göstərir. 1500 nəfər deputatlığa namizədin hamısı deputat ola bilməz ki? Deputatlığa namizədlərin hamısı “seçkini mən udmuşam” iddiasını irəli sürür. Bu da çox məntiqsiz və ədalətsiz yanaşmadır. 125 yerə 1500 nəfərin yerləşdirilməsi mümkün deyil. Seçkidə qalib olanlar bəllidir, qüsurlara yol verilən dairələr də məlumdur. Onların da nəticələrinin ləğv olunmasına dair qərar var. Seçkidə yol verilən qüsurların tam olaraq araşdırılması üçün ortada siyasi iradə mövcuddur. Ortada siyasi iradə olduğu halda, radikalların, eləcə də bəzi deputatlığa namizədlərin nə istədiyi məlum deyil. Radikalların məqsədi yalnız ara qatmaq, sabitliyi pozmaq və bəzi havadarlarının sifarişini yerinə yetirməkdən ibarətdir. Radikalların, eləcə də onlar kimi şou xatirinə aksiya keçirməyə cəhd göstərənlərin davranışlarında heç bir məntiq görmürəm”.
V.Rəhimzadə qeyd etdi ki, bəzi deputatlığa namizədlərin və radikal müxalifət qüvvələrinin qanunu pozmaq cəhdləri yolverilməzdir və bütün vətəndaşlar qanun qarşısında bərabərdir. Onun sözlərinə görə, kimliyindən asılı olmayaraq, qanunların pozulmasına cəhd edən insanlar birmənalı şəkildə qanun qarşısında cavab verməlidirlər.
İradə SARIYEVA
