“Son iki il ərzində Ermənistandakı hakimiyyət dəyişikliyindən sonra Ermənistan-ABŞ əlaqələrində müsbət yerdəyişmələr olmayıb”. Erməni KİV-nin məlumatına görə, bunu erməni ekspert Suren Sarkisyan deyib.
Erməni amerikaşünas qeyd edib ki, son iki ildə Ermənistan hərbi-siyasi əməkdaşlıq baxımından Birləşmiş Ştatlardan sıfır dollar, Azərbaycan isə 100 milyon dollar hərbi yardım alıb: “Son yüksək səviyyəli görüş 2010-cu ildəki Serj Sarkisyan - Obama və 2012-ci ildəki Baş nazir Tiqran Sarkisyan - ABŞ vitse-prezidenti Co Bayden görüşü idi. Ondan sonra yüksək səviyyəli görüşlər demək olar olmayıb”.
Sarkisyanın sözlərinə görə, ikitərəfli əlaqələrin müsbət dinamikası barədə danışmaq cəfəngiyyatdır.
O da məlum olub ki, 2001-ci ildə ABŞ-ın Azərbaycana ayırdığı 3.6 mlyon dollardan başlayan yardım, 2019-cu ildə 42.9 milyon dollara çatıb. ABŞ-ın Azərbaycana hərbi yardımının həcmi 2008-ci ildə 48.9 milyon dollar, 2018-ci ildə isə 59.6 milyon dollar təşkil edib. Beləliklə, Ermənistanda baş tutan “məxməri” hakimiyyət dəyişikliyi illərində ABŞ tərəfindən Azərbaycana ayrılan yardımın ən yüksək həddi baş verib.
Belə görünür ki, “məxməri inqilabdan” sonra Paşinyan hakimiyyəti ABŞ-ın gözləntilərini doğrultmadı. Bununla belə, ABŞ hesab edir ki, Ermənistan Cənubi Qafqazda hansısa əhəmiyyətə malik deyil.
Maraqlıdır, bəs ekspertlər mövcud mənzərəni necə dəyərləndirir?
Sözügedən məsələni baki-xeber.com-a şərh edən politoloq Məhəmməd Əsədullazadə bununla bağlı bir sıra məqamlara toxundu: “Bu onu göstərir ki, ABŞ-ın Cənubi Qafqaz ölkələri sırasında əsas önəm verdiyi ölkə Azərbaycandır. Məhz 100 milyon dollar hərbi yardımı ayrıması bundan irəli gəlir. Vaşinqtonun regionda əsas strateji planında Azərbaycan xüsusi çəkiyə malikdir. Hesab edirəm ki, ABŞ çalışır, regionda Ermənistan daxil, siyasi bir təhlükəsizlik çəmbəri formalaşdırsın. Bununla bağlı Ermənistanda Paşinyan inqilabına verdiyi dəstək məhz bu amillə bağlı idi. Paşinyanın götürdüyü öhdəlikləri pozması və Vaşinqtonun siyasətini sabotaj etməsi Ermənistana zərbədir. Bu da sözügedən ölkəyə nəzərdə tutulan yardımların dayandırılmasına gətirib çıxardı. Çünki, Paşinyan Rusiya yönümlü siyasətə sadiq qalaraq daha da regionda deastiblizasiyaya xidmət edən addımlar atdı. Buna görə də Vaşinqton Azərbaycan amilinə üstünlük verərək bu qədər yardımı ölkəmizə ayırdı. Ümumiyyətlə, Ermənistanın siyasətində qeyri-müəyyənlik və forpost dövlət olması bu ölkənin müstəqil siyasət aparmasına ciddi maneədir. Bunun da əsas səbəbi Ermənistanın apardığı işğalçılıq siyasəti ilə bağlıdır. Moskva Qarabağ kartından istifadə edərək Ermənistanı öz əlində saxlayır. Hesab edirəm ki, Vaşinqtonun siyasəti ilə Ermənistan hərəkət etsəydi, bu gün regionda daha da fərqli vəziyyət yarana bilərdi. Ancaq Ermənistanın işğalçı siyasəti davam etdirməsi bu gün regionda sülhü ciddi təhdid edir. Həmçinin, Vaşinqton artıq sülh və əməkdaşlıq mərkəzi kimi Azərbaycanı görür”.
Vidadi ORDAHALLI
