Türkün ən böyük düşməni olan ermənilərə (haylara) Türkiyənin bəzi sənətçiləri tərəfindən xüsusi sevgi sərgilənir. Məşhur türkiyəli müğənni və bəstəkarlarından biri olan S.Aksu özünün erməni sevgisilə xüsusilə seçilir. Bir müddət əvvəl erməni müğənni ilə duet oxuyan S.Aksu erməni mahnısı ifasından şərəf (?) duyduğunu dilə gətirmişdisə, indi də ermənilərə yalvarışları ilə gündəmə gəlib. Müğənni konsertlərindən birində 1996-cı ildə təyyarə qəzasında həlak olan erməni əsilli əri Onno Tunçu xatırlayaraq bunları deyib: “Bilirsiniz, Onno ermənidir və mən də 10 il ermənilərin gəlini oldum. Onlara canım qurban! Dolayısıyla bütün ermənilər, təbii ki, mənim qohumlarımdır”.
Bunu Türkiyə vətəndaşı, müğənnisi S.Aksunun deməyi həqiqətən də çoxları üçün gözlənilməz olsa da, bəziləri sənətçinin illərdir erməni xəstəliyinə tutulduğunu qeyd edirlər. Ermənilərin Türkiyəyə qarşı əsassız “erməni soyqırımı” iddialarını irəli sürdüyü bir dönəmdə bunun müqabilində bir türk sənətçisinin ermənilərə canını qurban etməsi heç cür anlaşılan deyil.
Zəka Vilayətoğlu: “Türkiyə vətəndaşı olan bir sənətçinin öz ölkəsinin maraqlarını daha çox müdafiə etməli olduğu halda, ermənilərin təəssübünü çəkməsi təəssüf doğurur”
S.Aksunun bu açıqlamasının Türk dünyasına böyük zərbə olduğunu deyən sənət adamları hesab edirlər ki, ümumiyyətlə, S.Aksuya qarşı sərt mövqe göstərilməlidir. Erməni sevgisinə yoluxan sənətçinin açıq şəkildə ermənilərə dəstək verməsinin qəbuledilməz olduğunu deyən tanınmış bəstəkar-müğənni Zəka Vilayətoğlu bizimlə söhbətində bildirdi ki, ünlü bir türk sənətçisinin belə bir sevgi sərgiləməsi onun qınanmasına səbəb olub. “Doğrusu, Sezen xanımın hansı millətə mənsub olması haqda yetərli bilgim yoxdur. Türkiyədə başqa millətlərdən olan, türk dilində danışan çoxsaylı insan var və bu da ilk tanışlıqda onları bizə yaxınlaşdırır, doğmalaşdırır. Ürəkdə, düşüncədə olanlar isə gizli qatda qalır. Təbii, Sezen xanım bir türk övladıdırsa, onun erməni sevgisi qəbulolunmazdır. O ermənilər ki, tarix boyu türkə düşmən olublar, hər fürsətdə qanımızı içməyə çalışıblar. Sezen xanımın bu erməni sevgisi onun yalnız erməni ruhlu, erməni kökənli olmağından və ya hansı tellərləsə onlara bağlılığından xəbər verir. Əsl türk övladının qəlbində qaniçən erməni yox, insan, insanlıq sevgisi ola bilər, olmalıdır da. Bir musiqi adamı kimi isə deyə bilərəm ki, Sezen xanım gəncliyimdə çox dinlədiyim, bəyəndiyim bir bəstəçi və müğənnidir. Bununla belə, S.Aksunun erməni sevgisinə heç cür bəraət qazandırmaq mümkün deyil. Türkiyə vətəndaşı olan bir sənətçinin öz ölkəsinin maraqlarını daha çox müdafiə etməli olduğu halda, ermənilərin təəssübünü çəkməsi təəssüf doğurur. Sən nə qədər böyük sənətkar olsan da, ermənilərin maraqlarını öz xalqının, dövlətinin maraqlarından üstün tutursansa, nə qiymətin ola bilər? Hesab edirəm ki, ermənilərə xüsusi sevgi bəsləmək bir türk sənətçisinə yaraşmayan haldır. Təəssüf edirəm” - deyə Z.Vilayətoğlu qeyd etdi.
Baba Vəziroğlu: “Yadımdadır ki, o zamanlar mərhum şairimiz Nüsrət Kəsəmənli hardansa S.Aksunun ərinin erməni olmasına dair məlumatı tapıb ortaya çıxardı”
Əməkdar incəsənət xadimi, tanınmış şair Baba Vəziroğlu isə “Bakı-Xəbər” açıqlamasında dedi ki, S.Aksunun erməni sevgisi yeni deyil, sənətçi 30-40 ildir bu “xəstəlikdən” əziyyət çəkir. “S.Aksu 30-40 ildir erməni sevgisi “xəstəliyinə” tutulub. O, ermənilərə sonsuz sevgi bəslədiyini dəfələrlə bəyan edib və bu sevgidən qürur duyduğunu deyib. Bu da təsadüfi deyil. O vaxt mən Yazıçılar Birliyində işləyəndə S.Aksunu Azərbaycanda sevənlər həddən artıq çox idi və onun mahnılarını hər yerdə axtarırdılar. Yadımdadır ki, o zamanlar mərhum şairimiz Nüsrət Kəsəmənli hardansa S.Aksunun ərinin erməni olmasına dair məlumatı tapıb ortaya çıxardı. O vaxtdan bildik ki, S.Aksunun əri ermənidir. Bəlkə də heç əri deyildi, sevgilisi idi. Həmin dövrdən biz S.Aksuya qulaq asmaqdan imtina etdik. Çünki onda vətənpərvərlik çox güclü idi, indi, deyəsən, bir az kosmopolitləşmişik.
O, ermənilərə hər zaman xüsusi sevgi ilə yanaşıb, çünki artıq erməniləşib. Erməniləşməsəydi, türk düşmənlərinə bu qədər sevgi bəsləməzdi. S.Aksu kimlərinin “xəstəliyi” sağalmazdır. Türkiyənin çörəyini yeyib ona xəyanət edən adamdan hər cür pis davranış gözləmək təbiidir” - deyə B.Vəziroğlu vurğuladı.
İradə SARIYEVA
