Ermənilər işğal edilmiş ərazilərə açıq investisiya qoyuluşunu, iri layihələrin həyata keçirilməsini davam etdirirlər. Məlum olduğu kimi, Ermənistan bu günlərdə Qarabağa Arazboyu əraziləri birləşdirəcək yeni Qafan-Xocavənd yolunun çəkilişinə başlayacağını elan edib. Bu, Qarabağı Ermənistana birləşdirən üçüncü yol olacaq və Arazboyu işğal edilmiş ərazilərin məskunlaşdırılmasına hesablanıb. Bunun ardınca isə onlar işğal etdikləri Azərbaycan ərazilərində daha bir irimiqyaslı infrastruktur layihəsi başladıblar.
Erməni KİV-nin verdiyi məlumata görə, bu dəfə işğalçılar Matagis kəndini Ağdərə şəhəri ilə birləşdirən su kanalı çəkirlər. Məqsəd həm də işğal edilmiş Ağdam rayonunun əkin sahələrini suvarmaqdır. Layihə barədə qondarma “DQR”in keçmiş “baş naziri”, hazırda “Sərsəng SES”in rəhbəri olan Araik Arutyunyan məlumat verib. O deyib ki, layihə Sərsəng SES-in davamı olacaq. 4 yeni su elektrik stansiyası və 2 kanal tikiləcək, ardınca beşinci SES inşa ediləcək və nəticədə 200 milyon kilovatt saat elektrik enerjisi hasil olunacaq. Habelə 10 min hektar əkin sahəsi suvarılacaq. Layihəyə 100 milyon dollar investisiya qoyulacaq, bu Qarabağda son illərdə həyata keçirilən ən iri layihələrdən biridir.
Arutyunyan deyib ki, su kanalının tikintisi Ağdərə, Ağdam, Xocavənd rayonlarında indiyə qədər susuzluqdan əkilib-becərilməyən əkin sahələrinin suvarılması problemini həll edəcək.
Qeyd edək ki, indiyə qədər ermənilər onsuz da Sərsəng su anbarından Azərbaycanın nəzarətində olan ərazilərə yaz-yay aylarında suyun ötürülməsinə məhdudiyyətlər yaradırdılar, payız-qış aylarında isə artıq suyu anbardan buraxmaqla Tərtər ərazisində subasmaya səbəb olurdular. Azərbaycan dəfələrlə ATƏT və digər beynəlxalq təşkilatlar qarşısında Sərsəng su anbarı ilə bağlı məsələni qaldırıb.
İndi isə belə görünür ki, yeni su kanalının çəkilməsi ilə işğalçılar Azərbaycanın nəzarətində olan ərazilərə gələn suyu daha çox məhdudlaşdıracaqlar. O cümlədən işğal altındakı Ağdamın əkin sahələrini suvarmaya yönəldiləcək və beləliklə də Ağdamda məskunlaşdırma üçün daha geniş imkan yaranacaq.
Çox maraqlıdır ki, bütün bu proseslər dünya birliyi və vasitəçilik missiyasını üzərinə götürən ölkələrin gözü qarşısında baş verir. Ermənilərin işğal faktını açıq sübut edən bu əməllərinə niyə beynəlxalq reaksiya verilmir, bu proseslərin dayandırılması üçün hansı addımlar atılmalıdır?
- Hatəm Cabbarlı: “Azərbaycan yeri gəlsə hərbi vasitələrdən istifadə etməklə Ermənistanın bu layihəsini əngəlləməlidir”
Siyasi elmlər doktoru Hatəm Cabbarlı baki-xeber.com-a bildirdi ki, Azərbaycan torpaqlarının Ermənistan tərəfindən işğal edilməsi faktına bölgədə marağı olan böyük dövlətlər təəssüf ki, barmaqarası baxır: “Bunu başqa cür ifadə etmək mümkün deyil. Bu biganəlik uzun müddətdir ki, davam edir. Azərbaycan torpaqları Ermənistan tərəfindən işğal edildiyi vaxtdan indiyə qədər dünyanın nüvuzlu ölkələri və təşkilatları Ermənistana qarşı heç bir siyasi və iqtisadi embarqo tətbiq etməyiblər. Vəziyyət belə olan təqdirdə, əlbəttə ki, Ermənistan işğalçı siyasətini davam etdirəcək və həmin ərazilərin potensialından maksimum istifadəyə çalışacaq. Erməni KİV-ində yeni su kanalının tikilməsi barədə informasiyalar gedir. Bu, kanal Ağdam ərazisinin suvarılması və yeni su elektrik stansiyalarının tikilməsi üçün nəzərdə tutulur. Bu barədə, hətta “DQR” rəsmiləri də məlumat verib və layihənin əhəmiyyətini yüksək dəyərləndiriblər. Bu amil həm də Sərsəng su anbarından Azərbaycanın istifadə etmə imkanlarını maksimum məhdudlaşdırır. Xatırlayırsınızsa bir neçə il əvvəl Ermənistan tərəfi Sərsəng su anbarının Azərbaycanla birgə işlətmək məsələsini gündəmə gətirmişdi. İşğalın davam etdiyi zamanda Azərbaycanın belə təklifə müsbət cavab verməsi mümkün deyildi. Ancaq bu gün Ermənistan bütün beynəlxalq hüquqa məhəl qoymadan, işğal etdiyi ərazilərdə abadlaşdırma adı ilə mühüm iqtisadi layihələr həyata keçirir. Verilən məlumatdan görünür ki, layihənin dəyəri 100 milyonla ölçülür. Bu olduqca yüksək bir rəqəmdir. Qondarma rejim və Ermənistanın iqtisadi problem içində çabaladığı bir vaxtda belə bir məbləğin ayrılması olduqca şübhəlidir. Azərbaycan bununla bağlı problemin həlli ilə məşğul olan ATƏT-in Minsk Qrupuna, Avropa Şurasına müraciət edib, onlar qarşısında Ermənistanın konkret olaraq bu layihələrin dayandırılması ilə bağlı tələb qoymalıdır. Sözügedən qurumların məsələyə münasibətinin necə olacağından asılı olmayaraq bu addımlar atılmalıdır. Ermənistan layihəni həyata keçirərsə, bu Azərbaycanın həmin əraziyə yaxın rayonlarında ciddi su probleminə gətirib çıxara bilər. Bu, həm də bizə qarşı ekoloji, iqtisadi cinayətdir. Azərbaycan yeri gəlsə hərbi vasitələrdən istifadə etməklə Ermənistanın bu layihəsini əngəlləməlidir”.
Məhəmmədəli QƏRİBLİ
