Qırğızıstanın sabiq prezidentinin iqamətgahında tərəfdarları ilə xüsusi təyinatlılar arasında qanlı toqquşma... Atambayev xüsusi təyinatlılara şəxsən özü atəş açdı - YENİLƏNDİ
Avqustun 7-də Qırğızıstan xüsusi təyinatlıları ölkənin sabiq prezidenti Almazbek Atambayevin saxlanılması üçün paytaxt Bişkekdən 12 km aralıda olan Koy-Taş kəndində yerləşən iqamətgahına basqın edib.
Baki-xeber.com xəbər verir ki, əməliyyat zamanı Atambayevin tərəfdarları ilə xüsusi təyinatlılar arasında qarşıdurma yaranıb. Məlumatlara görə, xüsusi təyinatlılar sabiq prezidentin tərəfdarlarına qarşı xüsusi vasitələrdən istifadə ediblər. Atambayevin tərəfdarları isə cavab atəşi açıblar. Sabiq prezidentin tərəfdarları isə bildirir ki, xüsusi təyinatlılar əməliyyat zamanı əvvəl rezin güllələrdən, daha sonra isə həqiqi güllələrdən istifadə ediblər. Ancaq qarşıdurmalarda yaralanmalar və bir nəfərin öldürülməsindən sonra əməliyyat yarımçıq dayandırılıb. Keçmiş prezidenti saxlamaq mümkün olmayıb. Bir neçə xüsusi təyinatlı da əsir düşüb.
Atambayevin xüsusi əməliyyatda 52 nəfər xəsarət alıb. Sputnik Azərbaycan RİA Novosti-yə istinadən məlumat verir ki, Səhiyyə Nazirliyi, əməliyyat zamanı bir xüsusi təyinatlının həlak olduğunu bildirib. Bundan başqa, Daxili İşlər Nazirliyinin Çuy vilayəti üzrə idarəsinin rəisi Samat Kurmankulov travma alıb. Hazırda onun komada olduğu bildirilir.
Əməliyyat dayandırıldıqdan sonra Koy-Taş kəndindəki evindən telefonla xalqa müraciət edən Atambayev onu dəstəkləyənlərə təşəkkür edib. O, polisə yazılı bir ifadə vermək istəyini deyib: “Sizə böyük bir acı ilə müraciət edirəm. Hökumət konstitusiyanı pozaraq məni saxlamaq istədi. Məni susdurmaq istədi. Axşam saatlarında silahlarla gəldilər. Öncə rezin güllələrdən, sonra isə əsl güllələrdən istifadə etdilər. Çox təəssüflənirəm və utanıram. Atambayev terrorçu deyil. Məni dəstəkləməyə gələn vətəndaşlar terrorçu deyil. İqtidar öz xalqına qarşı silahdan istifadə etdi.
İqtidara səslənirəm - dayanın».
Qırğızıstanın Baş Prokurorluğu "Kütləvi iğtişaşlar" və "Xuliqanlıq" maddələri üzrə cinayət işi açıb.
Sputnik Qırğızıstan xəbər verir ki, ölkə prezidenti Sooronbay Jeenbekov Təhlükəsizlik Şurasının bu səhər keçirilmiş iclasında bildirib ki, Atambayev qanun çərçivəsində aparılan istintaq tədbirlərinə sərt silahlı müqavimət göstərməklə, Qırğızıstan Konstitusiyasını və qanunlarını kobud şəkildə pozub. Təhlükəsizlik Şurası son hadisələrlə bağlı qərar da qəbul edib. Lakin qərarın mətni açıqlanmır.
Bu arada, Atambayev onun Koy-Taş kəndində yerləşən iqamətgahına xüsusi təyinatlılar tərəfindən hazırlanmış əməliyyat zamanı tərəfdarlarının girov götürdüyü şəxsləri azad edəcəklərini bildirib. Sabiq prezident artıq onların bəzilərinin azad edildiyini qeyd edib. A.Atambayev deyib: "Onlar da kiminsə övladlarıdır, biz başa düşürük. Biz onları mütləq buraxacağıq. Əksəriyyətini artıq dünən sərbəst buraxmışıq".
Almazbek Atambayev, həmçinin xüsusi təyinatlılara şəxsən atəş açdığını və tərəfdarlarında silah olmadığını bildirib: “Mənim ətrafımdakı insanların silahı yox idi, ona görə də şəxsən özüm atəş açmalı oldum”.
A.Atambayev insanları hədəf almadığını deyib və saxlanan xüsusi əməliyyatçıların azad olumasında kömək göstərməyə hazır olduğunu vurğulayıb.
Ölkə parlamentinin bu gün çağırılmış növbədənkənar iclasında isə Qırğızıstan Dövlət Milli Təhlükəsizlik Komitəsinin sədri Orozbek Opumbayev istefa verməyə hazır olduğunu bildirib. O.Opumbayev bildirib ki, Qırğızıstanın sabiq prezidenti Almazbek Atambayevin saxlanması üçün təşkil edilmiş əməliyyatın uğursuz olması onun səhvidir. Ölkə prezidenti Sooronbay Jeenbekov isə O.Opumbayevin istefa qərarını qəbul etmək niyyətində olmadığını deyib.
Eyni zamanda A.Atambayevin tərəfdarları əməliyyat zamanı ələ keçirilmiş yaralı xüsusi təyinatlıların buraxıldığını bildirib. Qeyd olunur ki, 6 xüsusi təyinatlı tibbi müayinədən keçirildikdən sonra hökumətə təhvil verilib.
Qeyd edək ki, iyunun 20-də Qırğızıstan parlamenti sabiq prezidentə qarşı irəli sürülmüş ittihamların siyahısını prokurorluq orqanlarına təqdim edib. Siyahı deputatlardan ibarət xüsusi komissiya tərəfindən yaradılıb.
Atambayev paytaxt Bişkekin istilik elektrik mərkəzinin təkmilləşdirilməsi zamanı korrupsiya, mütəşəkkil cinayət dəstəsinin başçısı Əziz Batukayevin saxta tibbi arayışla azadlığa buraxılması və digər qanundankənar fəaliyyətdə günahlandırılır. Atambayevin bu cinayətlərdə əlinin olduğu aşkar olunarsa, o, ömürlük həbs oluna bilər.
Sabiq prezident bu ittihamları "absurd" adlandırıb və xalq qarşısında təmiz olduğunu bildirib.
Almazbek Atambayev 2011-ci ildən 2017-ci ilədək Qırğızıstanın prezidenti olub.
