Ötən həftə ATƏT-in KİV azadlığı üzrə nümayəndəsi Arlem Dezir təşkilatın üzvü olan Azərbaycan kimi bəzi dövlətləri müstəqil KİV-in səsini boğmağa son qoymağa çağırıb, bunun yolverilməz olduğunu qeyd edib. Onun sözlərinə görə, liderlər jurnalistlərin kritik əhəmiyyət kəsb edən roluna hörmət etməli və onları qorumalıdırlar.
"Azərbaycandakı vəziyyət bizdə dərin narahatlıq hissi yaradır", - deyə Dezir Vaşinqtonda Konqres qarşısında çıxışında bildirib. O bununla bağlı Azərbaycana yönəlik bir sıra qərəzli xarakterli tənqidi fikirlər səsləndirib: “Biz həqiqətən Azərbaycanın ATƏT qarşısında müstəqil kütləvi informasiya vasitələri və müxtəlif səslər - ölkədəki vəziyyətlə bağlı öz mövqeyini bildirmək imkanına malik olanlarla bağlı öhdəliklərinə riayət etməsini istəyirik”.
Dezir bildirib ki, guya ölkədə çox az sayda müstəqil KİV qalıb və müstəqil KİV-in əksəriyyəti isə xaricdən işləyir.
ATƏT nümayəndəsi, həmçinin, Azərbaycana səfər etmək planından bəhs edib. Onun sözlərinə görə, bu məsələ Azərbaycan XİN-lə müzakirə olunub: “Biz bu məsələni müzakirə etmişik, amma hələ də bu səfərlə bağlı konkret qərar gözləyirik”.
O da məlum olub ki, ATƏT-in hesabatlarına əsasən, 2019-cu ilin ilk 6 ayı ərzində iki jurnalist öldürülüb, 92 jurnalist isə hücum və təhdidlərə məruz qalıb.
Göründüyü kimi, ATƏT nümayəndəsi, açıq-aşkar, Azərbaycana qarşı qərəzli mövqe sərgiləyir. Azərbaycanda son illər istər internet, istərsə də çap medianın inkişafında ciddi irəliləyiş müşahidə edilir. Hər kəs öz fikirlərini sərbəst şəkildə ifadə edir. Belə olan halda, ATƏT təmsilçisinin Azərbaycan mediası barədə səsləndirdiyi həqiqətə uyğun olmayan fikirlərə ekspertlər necə yanaşırlar?
Azər Həsrət: “Arlem Dezirin səsləndirdiyi qərəzli fikirlər də bu qəbildəndir”
Məsələyə münasibət bildirən media eksperti Azər Həsrətin sözlərinə görə, birinci dəfə deyil ATƏT təmsilçisi Azərbaycanla bağlı belə qərəzli mövqe sərgiləyir: “Mən özüm də bir sıra beynəlxalq tədbirlərdə onların yalan-yanlış fikirlərini ifşa etmişəm. Təbii ki, bu adamlar meydanı boş görəndə sağdan-soldan topladıqları əsassız və qərəzli informasiyaları ciddi informasiya kimi təqdim etməyə çalışırlar. Bu minvalla, Azərbaycanın üzərinə gəlirlər. Bu günlərdə “Human Rights Watch” təşkilatının təmsilçisinin yazısını oxudum. Yazıda İkram Rəhimov kimi bəlli səbəblərdən həbs olunan “jurnalistin” həbsini Azərbaycanda mətbuat azadlığına basqı kimi qeyd edirlər. Yəni bu cür əsassız informasiyalardan istifadə edirlər. Bu məsələdə, birincisi, məlumatı uyduran tərəflərlə əməkdaşlıq edirlər, ikincisi, bu məlumatların yalan olduğunu bilə-bilə Azərbaycanın üzərinə gəlirlər. Yəni bu adamlar, birmənalı şəkildə, Azərbaycanda yaxşı heç nəyin olmadığını iddia etməyə qərarlıdırlar. Arlem Dezirin səsləndirdiyi qərəzli fikirlər də bu qəbildəndir. Onlara görə, guya Azərbaycanda mətbuat azadlığı yoxdur. Varsa belə, bunu təkzib etməlidirlər. Bunların qərəzli yanaşması belədir. Ancaq Azərbaycan, başda Prezident İlham Əliyev olmaqla, mətbuatın inkişafı üçün əlindən gələni edir. Azərbaycan dövləti, ümumiyyətlə, normal, azad və məsuliyyətli medianın inkişafında maraqlıdır. Ona görə də səslənən fikirlərin heç bir əsası yoxdur”.
Vidadi ORDAHALLI
