Rusiya Federasiya Şurasının sədri Valentina Matvienko Rusiyanın idarəetmə metodunu dəyişməsinə münasibət bildirib və bunu məqbul saymayıb. Bu xüsusda o, misal kimi, Ermənistanı göstərib.
Qeyd edib ki, oradakı dəyişikliklərdən sonrakı mənzərə göz qabağındadır. Rusiya rəsmisinin bu münasibəti Ermənistandakıları bərk qıcıqlandırıb. Matvienkonun şərhini belə yozurlar ki, Rusiya üçün öz adamlarının olduğu mütləq hakimiyyət daha məqbuldur və guya indi onlar Ermənistana əvvəlki kimi təsir edə bilmirlər. Başqa rəylərdə bildirilir ki, bütün bu cəhdlər müxtəlif yollarla Putinin hakimiyyətini uzatmağa hesablanıb. Bir sözlə, Rusiya rəsmisinin kiçik tənqidindən ermənilər ciddi nəticələr çıxarıblar. Moskvadan verilən neqativ qiymətə Ermənistandan gələn həssas reaksiyaları nə ilə izah etmək olar?
Elşən Mustafayev: “Bütün demokratik ənənələr və idarəetmə metodlarının Ermənistanın nəbzi ilə uzlaşmaması təbiidir”
Ekspert Elşən Mustafayev “Bakı-Xəbər”ə açıqlamasında bildirdi ki, Matvienkonun hansı məqsədlə həmin ifadəni işlətməsini önə çəkmək lazım deyil: “Gəlin görək, Rusiya rəsmisinin bildirdiyi irad nə dərəcədə doğrudur, nə dərəcədə yox? Parlament üsul-idarəsi doğrudan da Ermənistan kimi ölkə üçün xarakterik deyil. Dünyada ölkələrin idarə olunması üçün bir çox klassik model var. Onlardan biri də parlament üsul-idarəsidir. Bu daha çox demokratik ölkələr üçün xarakterikdir. Yəni Ermənistan kimi sözdə demokrat olan dövlətlər üçün yox. Sistem belədir ki, xalqın səs verdiyi deputatar hökumət formalaşdırır. Hökumətin başçısı da parlamentdə seçilir və ölkəyə faktiki rəhbərlik ona tapşırılır. Ermənistanda isə bu proses bic doğulub. Yəni Ermənistan heç də demokratiyanı yüksək səviyyədə mənimsədiyinə görə bu yolu tutmayıb. Orada hakimiyyəti qəsb etmiş klanın nümayəndəsi üçüncü dəfə prezident seçilə bilmirdi. Ona görə də bu yolla hakimiyyətdə qalmaq istəyirdi. Məhz bu imitasiyaya görə də ölkədə inqilab oldu və Paşinyan hakimiyyətə gəldi. Məntiqlə Paşinyan Baş nazir ola bilməzdi. Çünki onu parlament seçməliydi, həmin qurumdakı çoxluq isə Sarkisyan tərəfdarlarında idi. Nəticə nə oldu? Paşinyan parlament üsul-idarəsi vasitəsinin qaydalarını tətbiq etməklə, zor gücü ilə hakimiyyəti qəsb etdi. Yəni Ermənistan tərəqqi yolu ilə bu prosesi mənimsəməyib. Ona zorla bunu yeridiblər. Biriləri hakimiyyətə gəlmək üçün bu üsulu seçib, digərləri isə hakimiyyətdə qalmağa görə. Hazırda Ermənistan rəhbərliyinin özü də bu üsuludan narazıdır. Çünki o cür ölkələri idarə edən adamlar mütləq hakimiyyət istəyirlər. Ermənistanda Prezidentlə Baş nazir arasında olan narazılığın kökündə də bu amil durur. Təsadüfi deyil ki, Ermənistan rəhbərliyi Konstitusiyanın dəyişməsinin vacibliyini dəfələrlə vurğulayır. Açıq şəkildə deyirlər ki, həmin ali qanun saxtakarlar tərəfindən səs verilərək qəbul edilib. Bu ideyanın əsas məqsədi isə köhnə idarəetməyə qayıtmaqdır. Buna görə də Matvienkonun haqq sözünü əbəs yerə qəbul etmək istəmirlər. Bütün demokratik ənənələr və idarəetmə metodlarının Ermənistanın nəbzi ilə uzlaşmaması təbiidir. Çünki ora dövlət funksiyasını çoxdan itirib”.
Məhəmmədəli QƏRİBLİ
