Qabil Hüseynli: “Bunu Dağlıq Qarabağ probleminin həllinə doğru dönüş də adlandırmaq olar”
“Azərbaycan Cənubi Qafqazda Rusiyanın yeganə müttəfiqidir” konfransının iştirakçıları cəbhə xəttində Lələtəpə strateji yüksəkliyini ziyarət ediblər.
Xatırladaq ki, 1994-cü ilin fevral ayında gedən döyüşlər nəticəsində Ermənistan silahlı qüvvələri Lələtəpə yüksəkliyi üzərində nəzarəti ələ keçirmişdilər və bu ərazi qondarma “DQR”in “Hadrut rayonu”nun tərkibinə daxil edilmişdi. 2016-cı ilin aprel ayında hərbi toqquşmaların nəticəsində Azərbaycan Silahlı Qüvvələri yüksəkliyə nəzarəti ələ keçirdilər. Ərazi Azərbaycanın Cəbrayıl rayonunun tərkibinə qaytarılıb. Cocuq Mərcanlı kəndində konfrans başa çatdıqdan sonra Beynəlxalq Avrasiya Hərəkatının lideri Aleksandr Duqin, RF Dövlət Dumasının deputatı Dmitri Savelyev, ictimai xadim Maksim Şevçenko və məşhur hərbi ekspert İqor Korotçenko Lələtəpə strateji yüksəkliyinə qalxıblar. Konfrans iştirakçıları bu mövqelərdə xidmət göstərən Azərbaycan SQ şəxsi heyəti ilə görüşüblər, hərbi növbətçilik şəraiti ilə tanış olublar, həmçinin, hərbçilərin kazarmalarında olublar. Görüşün sonunda rusiyalı deputatlar və ictimai xadimlər azərbaycanlı əsgərlərə uğurlu xidmət arzulayıblar. Bu konfransla bağlı diqqətçəkən bir neçə mühüm məqam mövcuddur. Əvvəla konfransın adı olduqca cəlbedici və maraqlıdır. “Azərbaycan Cənubi Qafqazda Rusiyanın yeganə müttəfiqidir” adı ilə keçirilən konfransda Rusiya siyasi elitasının təmsilçilərinin iştirakı təqdirəlayiq hal kimi dəyərləndirilə bilər. Digər tərəfdən isə konfransın keçirildiyi yer olduqca maraqlıdır. Azərbaycanın işğaldan azad edilən Cocuq Mərcanlı kəndində belə mötəbər tədbirin məhz “Azərbaycan Cənubi Qafqazda Rusiyanın yeganə müttəfiqidir” adı ilə keçirilməsi nəyin göstəricisi və əlaməti sayıla bilər?
Politoloq Qabil Hüseynlinin sözlərinə görə, Rusiya siyasi elitasında Azərbaycana, eləcə də Dağlıq Qarabağ probleminin həllinə münasibətdə obyektivliyin ilkin işartıları görünməkdədir: “Tədbirin Cocuq Mərcanlıda keçirilməsinin prinsipial əhəmiyyəti var. Bununla da açıq mesaj verildi ki, Bakı sülhün, dincliyin tərəfdarıdır və Cocuq Mərcanlıda aparılan dəyişikliklər də bunun bariz sübutudur. Xüsusilə də Duqin və Savelyevin Dağlıq Qarabağ və ətrafındakı rayonların qaytarılmasını birmənalı və açıq dilə gətirməsi birbaşa Moskvanın mövqeyini əks etdirir. Bu, açıq şəkildə BMT qətnamələrinin ruhuna uyğundur. Rusiya tərəfindən 7 rayonun qaytarılması təklifi Moskvanın ermənipərəst siyasətinə qarşı cəsarətli addım hesab oluna bilər. Belə nəticəyə gəlmək olar ki, səsləndirilən bu fikirlər gec-tez Rusiya xarici siyasətinin prioritetinə çevrilə bilər”.
Qabil Hüseynli hesab edir ki, konfransda səsləndirilən fikirlər Azərbaycan-Rusiya münasibətlərində inqilabi dəyişikliklərə səbəb olacaq: “Xüsusən də Rusiyanın yüksək dövlət rəsmilərinin açıqlamaları göstərir ki, Rusiya ilə Azərbaycan arasındakı strateji bağlar inkişaf etməkdə və keyfiyyətcə yeni mərhələyə daxil olmaqdadır. Bir məsələni də xüsusilə qeyd etməliyik. Bu tədbirin Azərbaycan Prezidentinin Rusiyaya gözlənilən səfəri ərəfəsində keçirilməsi Əliyev-Putin görüşündə mühüm razılaşmalara şahidlik edəcəyimizdən xəbər verir. Söhbət Azərbaycanla Rusiya arasında əlaqələrin daha yüksək mərhələyə qaldırılmasından gedir. Rusiyalı rəsmilər Azərbaycanın Cənubi Qafqazda Rusiyanın yeganə müttəfiqi olduğunu vurğuladılar. Bu, təsadüfi səsləndirilmiş fikir deyil və hər halda, Kremlin müəyyən dairələrinin mövqeyini əks etdirir. Cəsarətlə deməliyik ki, Rusiya ictimai rəyində ciddi dönüşlər baş verir. Bunu Dağlıq Qarabağ probleminin həllinə doğru dönüş də adlandırmaq olar. Ən başlıcası isə odur ki, Rusiya Azərbaycanla münasibətləri yenidən qurmaq istəyir. Bu yenidənqurma iki ölkə əlaqələrini keyfiyyətcə yeni bir mərhələyə qaldıracaq”.
Məhəmmədəli QƏRİBLİ
