Kənan Qubadzadə: “Keçirilən parad, həmçinin, əhalidə ruh yüksəkliyinin artırılması, xüsusilə gənc nəslin vətənpərvərlik hisslərinin gücləndirilməsi baxımından da çox əhəmiyyətlidir”
Azərbaycan Respublikası Silahlı Qüvvələrinin yaradılmasının 100 illik yubileyi münasibətilə srağagün Bakının Azadlıq meydanında hərbi parad keçirilib. Möhtəşəm hərbi parad sayəsində Azərbaycan Ordusunun gücünü, Silahlı Qüvvələrimizin nələrə qadir olduğunu bütün dünya izlədi və yaxud xəbər tutdu.
240-dan çox hərbi texnika, 70-dən artıq uçuş vasitəsi, silahlanmaya yeni qəbul edilmiş ən müasir zirehli texnikalar, raket və artilleriya qurğuları, hava hücumundan müdafiə sistemləri, helikopterlər, pilotsuz uçuş aparatları kimi müxtəlif növ ən yeni silah və texnikaların nümayiş olunduğu paradda Türkiyə, Pakistan, Belarus, Bəhreyn, Birləşmiş Ərəb Əmirlikləri, Gürcüstan, İran, İsrail, Qazaxıstan, Özbəkistan, Rusiya, Səudiyyə Ərəbistanı və Ukraynadan olan 100-dək nümayəndə iştirak etdi.
Azərbaycan Ordusunun yaradılmasının 100 illik yubileyi münasibətilə keçirilən hərbi paradın gənc nəslin vətənpərvərlik tərbiyəsində necə rol oynayacağını öyrənmək məqsədilə Gənclər Mərkəzi İctimai Birliyinin icraçı direktoru Kənan Qubadzadəyə müraciət etdik. O, “Bakı-Xəbər”ə açıqlamasında qeyd etdi ki, keçirilən hərbi parad öz möhtəşəmliyi ilə seçildi və bütün dünyanın gözü yalnız Azərbaycanda idi: “Keçirilən parad, həmçinin, əhalidə ruh yüksəkliyinin artırılması, xüsusilə gənc nəslin vətənpərvərlik hisslərinin gücləndirilməsi baxımından da çox əhəmiyyətlidir. Ərazi bütövlüyümüzün və təhlükəsizliyimizin qarantı olan ordumuz həqiqətən də millətimizin qürur mənbəyidir”.
K.Qubadzadənin fikrincə, Azərbaycan Ordusunun 100 illiyi münasibətilə təşkil olunmuş parad, əslində, ölkəmizdə həyata keçirilən ordu quruculuğu işinin necə yüksək səviyyədə təşkil olunmasının əyani nümayişi idi: “Bəllidir ki, bu gün Azərbaycan Ordusu dünyanın ən güclü orduları sırasındadır. Ordumuzun son qələbələri isə bir daha göstərir ki, Azərbaycanın öz torpaqlarını erməni işğalından azad edəcəyi gün uzaqda deyil.
Bu gün hər bir bir azərbaycanlı ordumuzla fəxr edir. Heç də təsadüfi deyil ki, bu gün Azərbaycan Ordusu dünyanın ən güclü orduları sırasındadır. Ordumuzun son qələbələri isə bir daha göstərir ki, Azərbaycan öz torpaqlarını erməni işğalından azad edəcək. Azərbaycan gəncləri torpaqlarımızın azad olunması üçün öz potensial güclərini ortaya qoymağa hazırdırlar. Gənclərimiz həm fiziki güclə onlara qalib gələ bilərlər, həm də elmi zəka ilə düşmən tərəfi susdurmaq gücünə malikdirlər”.
Həmsöhbətimiz onu da bildirdi ki, hərbi paradın ən mühüm nəticəsi Azərbaycan Pespublikası Silahlı Qüvvələrinin Ali Baş Komandanının xalqımıza və dünyaya çatdırılan mesajında tam dolğunluğu ilə ifadə edilib: “Gün gələcək, işğaldan azad olunmuş torpaqlarda qaldırılan Azərbaycan bayrağı Azadlıq meydanına gətiriləcək və hərbi paradda nümayiş etdiriləcək”. Bu ifadə bir daha dünyaya göstərir ki, Azərbaycan tərəfi işğal altında olan torpağını azad edəcək”.
Birliyin icraçı direktoru qeyd etdi ki, Azərbaycan Ordusunun 100 illik yubileyi münasibətilə təşkil olunan hərbi parad Azərbaycan Ordusunun nəyə qadir olduğunu bir daha göstərdi. Bu güc nümayişi, ölkə başçısının çıxışında ünvanladığı cəsarətli mesajlar, xəbərdarlıqlar düşmənə qarşı yönəlib. Erməni cəmiyyəti, Ermənistan rəhbərliyi bütün bunlardan dərs götürməlidir.
Günel CƏLİLOVA
