Ermənistanda cərəyan edən son hadisələr bu ölkə daxilində vətəndaş qarşıdurması ehtimalının daha böyük sürətlə artdığını deməyə əsas verir. Söhbət ondan gedir ki, Ermənistanın baş naziri Nikol Paşinyanın rəhbərlik etdiyi hakimiyyət sabiq prezident Serj Sarksiyanın tərəfdarlarına, onun dövründə iqtidarda olanlara qarşı repressiv mübarizəyə start verib.
Bu isə Sarkisyan tərəfdarlarını əks tədbirlər görməyə vadar edir və belə vəziyyət ölkədə qanlı qarşıdurma ehtimalını daha da yüksəldir. Milli Təhlükəsizlik Xidmətinin direktoru Artur Vanetsyan qeyd edir ki, artıq bir sıra qruplar Nikol Paşinyanı aradan götürmək istəyir. Baş nazirin şəxsi təhlükəsizliyinə aid suala cavab verərkən Artur Vanetsyan bildirib ki, onlarda olan məlumata görə, bəzi qruplar Nikol Paşinyanı aradan götürməyi planlaşdırıb: “Düşünmürəm ki, kimsə bu cür nüfuza malik olan baş nazirə qarşı hər hansı addım atmağa cürət etsin. Amma belə niyyətlərdə olanlar var”.
Qeyd edək ki, vəziyyət Ermənistanı 20 il idarə etmiş “Qarabağ klanı”nın əsas dayaqlarından biri, deputat, Azərbaycan ərazilərinin işğalına başçılıq edən və çoxsaylı hərbi cinayətlər törədərək ad çıxaran general Manvel Qriqoryanın biabırçı həbsindən sonra gərginləşib. Bu günlərdə Ermənistan Milli Təhlükəsizlik Xidməti Manvel Qriqoryanın malikanəsində aparılmış axtarışa dair maraqlı videokadrlar yayıb. Burada Qriqoryanın 2016-cı ilin aprel döyüşləri zamanı Qarabağda erməni əsgərlərinə göndərilən ərzaq yardımlarını, o cümlədən Rusiya ermənilərinin göndərdiyi avtomobil texnikasını da talayıb anbarlarına yığdığı əks olunur. Milli Təhlükəsizlik Xidməti bildirir ki, general istirahət zonasını silah anbarına, onlarla retro və müasir avtomobilin, çoxsaylı motosikllərin, qarda özüyeriyən maşınların, Qarabağa göndərilmək üçün nəzərdə tutulan UAZ və təcili yardım avtomobillərinin qarajına çevirib. Axtarış zamanı Manvelin malikanəsinin anbarlarından əsgər paylarının qablaşdırıldığı çoxsaylı qutular tapılıb. Qutuların içərisinə qoyulan məktublardan bəlli olur ki, onları 2016-cı ilin aprel döyüşləri zamanı erməni məktəbliləri toplayıb və Qarabağa göndərmək üçün Manvelin başçılıq etdiyi “Yerkrapa” könüllülər birliyinə təhvil veriblər. Lakin general bu əsgər paylarını anbarlarına yığıb və onları şəxsi zooparkındakı yırtıcılara - ayılara, pələnglərə yedirdirmiş.
Bağlamaların içərisindən əsgərlər üçün nəzərdə tutulan mal əti konservləri, qatılaşdırılmış süd, makaron, vermişel, tomat pastası, gigeyena vasitələri çıxıb. Qriqoryanın anbarlarından Müdafiə Nazirliyinin hazırladığı və satış üçün nəzərdə tutulmayan əsgər payları da tapılıb. Manvelin Arşaluys kəndindəki istirahət məkanından 18 tank əleyhinə mina, onlarla əl qumbarası, on minlərlə pulemyot və avtomat patronu, çoxsaylı qumbaraatan və onlara aid sursat, müxtəlif markalı 39 pistolet, snayper tüfəngləri, müxtəlif tipli karabinlər və digər silah-sursat tapılıb.
Ermənistanın baş naziri Nikol Paşinyan da məsələyə münasibət bildirib: “Əsaslı şübhələr var ki, Qriqoryan həm Qarabağ əhalisi, həm erməni ordusu üçün nəzərdə tutulmuş humanitar yardımları mənimsəyib. Manvel Qriqoryanın evində və ona məxsus ərazilərdə aparılmış axtarışlar bu şübhələri təsdiqləyir”. Onun sözlərinə görə, ciddi şübhələr var ki, Manvel ordu üçün nəzərdə tutulmuş texnikanı, əsasən maşınları da mənimsəyib. Amma Qriqoryanı ona qarşı irəli sürülmüş ittihamları rədd edir. İsrar edir ki, ona məxsus yerlərdə aşkar olunmuş ərzaq, dava-dərman və başqa ləvazimatın ona heç bir dəxli yoxdur. Qriqoryan bildirir ki, onda sözügedən malların mənimsənilmədiyinə və “Yerkrapa” təşkilatının legitim fəaliyyətinə sərf olunduğuna dair sənədlər var. Elə buna görə də fikirlər səslənir ki, əslində, Milli Təhlükəsizlik Xidməti yuxarıdan gələn sifariş əsasında Qriqoryana qarşı oyun qurub. Serj Sarkisyanın digər qatı tərəfdarlarını da eyni aqibət gözləməsinə dair fikirlər səslənir. Bu isə Ermənistan daxilində yeni qarşıdurmaya rəvac verən hal, mülkiyyətin yenidən bölüşdürülməsi sayılır. Belə vəziyyət, bəzi erməni ekspertlərə görə, Qarabağ münaqişəsinin Ermənistana vurduğu növbəti zərbənin nəticəsidir. Məsələn, onlardan biri olan Yuri Manvelyan qeyd edir ki, Qriqoryan karyerasını müharibədə və müharibədən çıxandan sonra qurub: ”Və onun bütün sərvətlərinin, zənginliyinin başlanğıcı Qarabağda, müharibə gedən ərazilərdə törətdiyi qarətlərdən qaynaqlanır”. Manvelyan deyir ki, Qriqoryanın həbsi Ermənistanda on illərdir hökm sürən mifi dağıdır: ”Bu mifə onu yaradanların özləri də inanmağa başlamışdı. Bu, Manvel və onun kimiləri olmadan Ermənistanın yaşamasının mümkün olmayacağı barədə mif idi. Həmin Serj Sarkisyan da həmişə kamuflyajın və Qarabağın arxasında gizlənirdi. Bəli, indi miflərin dağıdılması baş verir. Və bu adamlar əslində nə müharibədə faydalı olub, nə müharibədən sonra. Bu adamların bir hissəsi hələ də müharibə təhdidi ilə manipulyasiya edərək hakimiyyətdə qalır. Bu baxımdan çox yaxşı simvoldur ki, artıq belə adamlarsız və müharibə ilə alver etmədən keçinməyin mümkün olduğu görünür. Bunlar Qarabağ münaqişəsinin fəsadlarıdır”.
Tahir TAĞIYEV
