Sahib Məmmədov: “ABŞ nəhəng dövlət olaraq qəbul edilsə də, yürütdüyü bu cür siyasətlə özü-özünü cılızlaşdırmış olur”
ABŞ BMT-nin İnsan Hüquqları Şurasını tərk etməyə qərar verib. Bu barədə ABŞ-ın BMT-dəki daimi nümayəndəsi Nikki Heyli bildirib. “ABŞ rəsmi olaraq BMT İHŞ-ni tərk edir”, - deyə N.Heyli Dövlət Departamentinin mətbuat konfransında bildirib.
ABŞ dövlət katibi Mayk Pompeo isə BMT İHŞ-nin ölkənin milli maraqlarını pozduğunu vurğulayıb: “N.Heyli isə artıq bir ildən çoxdur ki, bu təşkilatda islahatlar həyata keçirməyə çalışır. Əgər təşkilat bizim və müttəfiqlərimizin milli maraqlarını pozursa, biz onun üzvü olmaqdan imtina edirik”.
ABŞ-ın bu addımını necə şərh etmək olar və bu, gələcəkdə hansı yeniliklərə səbəb ola bilər?
Hüquq müdafiəçisi Sahib Məmmədov qəzetimizə açıqlamasında ABŞ-ın bu hərəkətini beynəlxalq hüquqa bəslənən saymamazlıq və etinasızlıq kimi şərh etdi. Onun sözlərinə görə, ABŞ-ın siyasətində belə tendensiya Trampın hakimiyyətə gəlişindən sonra başlayıb: “Sözügedən qurum 1945-ci ildə yaradılıb. Onun da ilk rəhbəri o vaxt yenicə dünyasını dəyişən Franklin Ruzveltin həyat yoldaşı Elyanora Ruzvelt olub. Bu komissiyanın yaranmasında başlıca məqsəd insan hüquqları ilə bağlı bəyannamənin mətninin hazırlanması olub. Sonradan həmin qurum daimi orqana çevrildi və insan hüquqları komissiyası kimi fəaliyyət göstərməyə başladı. 2006-cı ilin martında isə bu qurum İnsan Hüquqları Şurası kimi fəaliyyətə başladı. Bununla da bir qədər statusu da dəyişdi və qurum Baş Assambleyaya tabe oldu. İnsan Hüquqları Şurası BMT-nin bu sahədə olan əsas nizamnamə orqanı hesab edilir. Orada 47 üzv dövlət təmsil olunur. ABŞ həmin komissiya yaranandan 2006-cı ilə kimi üzv olub. Dövlətlər hamısı dəyişirdi, yalnız ABŞ yerində qalırdı. 2006-cı ildə qurum şuraya çevriləndə ABŞ ora seçilə bilmədi. Rəsmi Vaşinqtonun da ilk incikliyi məhz bundan sonra başlayıb. Sonra isə Trampın seçkiləri zamanı BMT-nin insan hüquqları üzrə ali komissarı ABŞ prezidenti haqda xoşagəlməz fikir bildirdi. Buna səbəb Trampın irəli sürdüyü irqçi şüarlar olmuşdu. Tramp da bunu unutmadı, gələn kimi Ali Komissarlığın maliyyəsini kəsdi. ABŞ əsas donor olduğu üçün qurumun vəziyyəti xeyli pisləşdi. ABŞ bundan qabaq da həmin qurumdan özünə xeyir edən qərarların qəbulunu istəyib. Belə olmayanda şantaja və digər təzyiq üsullarına əl atırdı. Bütün bu deyilənlər yığışıb, sonda belə mənzərə alınıb. Tramp administrasiyası bunu qurumun İsraillə bağlı tutduğu mövqe ilə izah etsə də, məsələnin kökündə sadaladığım faktorlar dayanır. Əslində, burda ABŞ demarş edib və beynəlxalq münasibətlərə etinadsızlığını ortaya qoyub. Onsuz da BMT-nin insan haqları ilə bağlı qərarlarına ABŞ qoşulmurdu. Heç bir ciddi dövlət belə hərəkət etmir. ABŞ nəhəng dövlət olaraq qəbul edilsə də, yürütdüyü bu cür siyasətlə özü-özünü cılızlaşdırmış olur. ABŞ-ın şuranı tərk etməsi heç nəyi dəyişən deyil. Onsuz da ABŞ həmin qurumun qərarlarına əhəmiyyət vermirdi”.
Məhəmmədəli QƏRİBLİ
