Daşdəmir Əliyev: “Ermənilərin özləri həmin prosesdə iştirak edən adamların qatı cinayətkar olduğunu ortaya qoyurlarsa, beynəlxalq dairələr əməli fəaliyyətə keçməlidirlər”
Azərbaycan torpaqlarının işğalında öncül şəxslərdən olmuş general Manvel Qriqoryan həbs edilib. Milli Məclisin üzvü olan generalın toxunulmazlığının ləğvinə parlament iyunun 19-da razılıq verib, həbs qərarını həmin gün paytaxt İrəvanda məhkəmə çıxarıb.
İyunun 16-da Milli Təhlükəsizlik Xidmətinin tutduğu Manvel Qriqoryan qanunsuz silah-sursat saxlamaqda, özgə əmlakını talamaqda təqsirli bilinir. Ona məxsus ev və ərazilərdən külli miqdarda silah-sursat, hərbi və xüsusi texnika, cəbhə bölgəsi üçün yığılmış tibbi ləvazimat, ərzaq aşkarlanıb. Generalın onlarca maşına, hətta şəxsi zooparka sahib olduğu açıqlanıb. M.Qriqoryan 1956-cı ildə Eçmiədzinin Arşaluys kəndində doğulub. İrəvan Dövlət Universitetinin hüquq fakültəsini bitirib. Azərbaycan torpaqlarının qanlı işğalının fəal iştirakçısıdır. Dağlıq Qarabağda müxtəlif hərbi hissələrə komandirlik edib, Ermənistan ordusunda korpus komandiri olub. 1996-cı ildə general-mayor, 2000-ci ildə general-leytenant ali hərbi rütbəsi alıb. 2000-2008-ci illərdə müdafiə nazirinin müavini postunu tutub. 2012 və 2017-ci illərdə Ermənistan Respublika Partiyasının proporsional siyahısından parlamentin deputatı seçilib. “Yerkrapa” könüllülər birliyinin sədridir. M.Qriqoryanın oğlu Karen Qriqoryan həbsdən sonra Eçmiədzin meri postundan istefa verib.
Ermənistan müdafiə nazirinin sabiq müavini, deputat M.Qriqoryanın həbsinə münasibət bildirən Azərbaycan XİN-in mətbuat xidmətinin rəhbəri Hikmət Hacıyev deyib ki, Ermənistanın milli qəhrəmanı M.Qriqoryan Xocalı soyqırımının törədilməsi, Azərbaycanın Füzuli və Cəbrayıl rayonlarının işğalı zamanı azərbaycanlı sakinlərin mülkiyyətinin talan edilməsi, hərbi əsirlərə işgəncələrin verilməsi, kütləvi qətlə yetirilməsi, həmçinin, mülki şəxslərin girov götürülməsi, işgəncələrə məruz qoyulması və öldürülməsi kimi çoxsaylı hərbi cinayətlərin törədilməsində iştirak edib.
H.Hacıyev xatırladıb ki, 2014-cü ilin noyabrında "Azadlıq" radiosunun erməni bürosuna verdiyi müsahibəsində M.Qriqoryan Qarabağ döyüşlərindən yüzlərlə azərbaycanlı girovla geri qayıtdığını və hətta onları şəxsi evində işlətdiyini açıq şəkildə və “fəxrlə” bəyan edib: “Bu etirafına görə hətta erməni hüquq müdafiəçiləri tərəfindən tənqid olunan və bu kimi əməlləri ilə Cenevrə konvensiyalarının pozulmasında ittiham olunan M.Qriqoryan həqarətlə Cenevrə konvensiyaları-filan tanımadığını bəyan etmiş, erməni olması ilə fəxr etdiyini demişdi. Ermənistanın milli qəhrəmanı olan bu şəxs həmin açıqlamalarından sonra da Ermənistanın Respublika Partiyasının imtiyazlı üzvü kimi fəaliyyətini davam etdirmişdi. Demokratiyadan və insan hüquqlarından dəm vuran Ermənistanın yeni hakimiyyəti əsl mahiyyətini indi sübut etməlidir. Təəssüf ki, M.Qriqoryana qarşı başlanan cinayət işi onun yalnız Ermənistanda törətdiyi iqtisadi cinayətlərlə məhdudlaşır. Cinayət işinin tərkib hissəsi olaraq onun müharibə dövründə törətdiyi hərbi cinayətləri, xüsusilə özünün etiraf etdiyi kimi, əsir və girov götürülmüş yüzlərlə azərbaycanlının taleyi və onlara qarşı törədilmiş əməllər araşdırılmalıdır. Ümid etmək istərdik ki, beynəlxalq insan hüquqlarının müdafiəsi təşkilatları, o cümlədən Avropa Şurası bu məsələdə fəallıq nümayiş etdirəcəklər”.
Bütün bu faktlar Azərbaycan torpaqlarının cinayətkar xislətli erməni məmurları tərəfindən işğal olunduğunun, talan edildiyinin ən bariz nümunəsi sayıla bilərmi? Bu hal beynəlxalq ictimaiyyətə Azərbaycan torpaqlarının işğaldan azad olunması üçün əlavə hansı əsasları vermiş olur?
Hərbi ekspert Daşdəmir Əliyev qəzetimizə bildirdi ki, bu faktların özü bizimlə kimlərin hansı üsullarla mübarizə apardığını təsdiqləmiş olur: “Biz dəfələrlə bəyan etmişik ki, Azərbaycan torpaqlarının işğalı zamanı ermənilər tərəfindən misli görünməmiş vəhşiliklər, vandallıqlar törədilib. Hətta müharibə qanunları ilə belə uzlaşmayan vəhşiliklərin şahidi olmuşuq. Barəsində sual verdiyiniz M.Qriqoryan Dağlıq Qarabağda gedən hərbi əməliyyatlara başçılıq edib və xüsusi qəddarlığı ilə seçilən generallardan olub. İndi Ermənistan hakimiyyətinin özü rəsmi olaraq onun törətdiyi cinayətlər barədə cəmiyyətə məlumat verir. Məlum olur ki, həmin adam əsl cinayətkar mafiya bosları kimi həyat tərzi sürüb. Hələ ki, Ermənistan rəhbərliyi onun İrəvanda, dinc dövrdə törətdiyi cinayətlərin xırda bir qismini ictimailəşdirib. Nəticədə bütün dünyanı heyrət bürüyüb. İndi görün bu adam müharibə gedən ərazilərdə nələr edib? Onun əli bizim vətəndaşlarımızın qanına batıb. Bu adam Dağlıq Qarabağda bəşəriyyət əleyhinə törədilən cinayətlərə rəhbərlik edib. Təbiidir ki, Ermənistan rəhbərliyi həbs edilən generalın Dağlıq Qarabağdakı əməllərinə hüquqi qiymət verilməsində maraqlı olmayacaq. Ancaq biz bütün resurslarla həmin adamın kimliyini açıqlamalıyıq və beynəlxalq ictimaiyyətdən onun beynəlxalq konvensiyaların tələblərinə uyğun şəkildə cəzalandırılmasını tələb etməliyik. Bir faktı da qeyd edim ki, həmin adam Ermənistanın sabiq prezidenti Serj Sarkisyanın ən yaxın silahdaşı olub. Bu faktın özü uzun illər ərzində Ermənistanın kimlər tərəfindən idarə olunmasına bir işarə vermiş olur. Əminəm ki, nə vaxtsa sarkisyanlar, balayanlar, qriqoryanlar layiq olduqları cəzanı alacaqlar. Bu faktlar, eyni zamanda, beynəlxalq ictimaiyyət üçün Azərbaycan torpaqlarının işğaldan azad olunması ilə bağlı əməli fəaliyyətə keçmək üçün tam əsas verir. Ermənilərin özləri həmin prosesdə iştirak edən adamların qatı cinayətkar olduğunu ortaya qoyurlarsa, beynəlxalq dairələr əməli fəaliyyətə keçməlidirlər”.
Məhəmmədəli QƏRİBLİ
