Mübariz Əhmədoğlu: “Məhz buna görədir ki, Rusiya bu məsələdə tələsmək istəmir”
Rusiya xarici işlər naziri Sergey Lavrov Ermənistan xarici işlər naziri Edvard Nalbandyanla görüşdən sonra keçirilən mətbuat konfransında deyib ki, danışıqlarla bağlı təcrübəmiz göstərir ki, onlar tezliklə başa çatmayacaq.
O bildirib ki, 2007-ci ildən etibarən münaqişənin həlli ilə bağlı bütün komponentlər bir sıra sənədlərdə öz əksini tapıb: “O zaman, həmçinin, 2009 və 2011-ci illərdə olan sənədlər ATƏT baş katibinə məruzə edilib. Bunlar həmsədrlərin təklifləri kimi masa üzərindədir və paket şəklindədir. Bunlardan bir və ya ikisini götürmək və demək ki, gəlin bu istiqamətdə müzakirə aparaq, çətindir. Çünki o zaman balans itir. Belə olan halda, istəyimiz nəticə verməyəcək. Hər iki ölkə prezidenti ötən ay Cenevrədə baş tutan görüşü müsbət qiymətləndirib. Çox yaxşı olardı ki, bu pozitiv yanaşma bizə münaqişənin həlli istiqamətində irəliləmək üçün kömək etsin”.
Lavrov qeyd edib ki, həmsədrlər bu istiqamətdə iş aparır: “Moskvada həmsədrlərin Azərbaycan və Ermənistan xarici işlər nazirləri ilə ayrılıqda görüşü oldu. Biz amerikalı və fransalı həmkarlarımızla birlikdə bu istiqamətdə hazırda hansı vəziyyətdə olduğumuzu təhlil edəcəyik. Çalışacağıq ki, münaqişənin həlli istiqamətində irəliləyişə nail olmaq üçün səylər göstərək. Mən xüsusi optimizm nümayiş etdirmək istəmirəm. Problem mürəkkəbdir, danışıqlarla bağlı təcrübəmiz göstərir ki, onlar tezliklə başa çatmayacaq”.
Lavrovun bu pessimist ovqatını nə ilə əlaqələndirmək olar?
Politoloq Mübariz Əhmədoğlunun sözlərinə görə, Lavrovun Dağlıq Qarabağ münaqişəsi ilə bağlı pessimist ruhda danışması bir sıra faktorlara bağlı olan məsələdir: “Bilirsiniz ki, o, İrəvənda deyib ki, danışıqlar tezliklə başa çatmayacaq. Mən bunu dünyada baş verən geopolitik dəyişikliklərlə izah edərdim. Məhz buna görədir ki, Rusiya Ermənistanı konstruktivliyə məcbur etmir.
Yaxın Şərqdə kürd faktorunun sıradan çıxması Dağlıq Qarabağ münaqişəsində Rusiyanın mövqeyində kardinal dəyişiklik yaratdı. Kürd faktorunun sıradan çıxması Rusiya üçün çox ciddi itkidir. Putinin Yaxın Şərq üzrə siyasi arxitekturasının fundamenti yaxın illərdə aradan qaldırılması mümkün olmayan ciddi zədə alıb. İran Türkiyə ilə birlikdə Rusiyanı Yaxın Şərqdən sıxışdırıb çıxarmaq gücündədir. RF-nin son zamanlar ziddiyyətli siyasəti bunu göstərir. Putin bir əli ilə amerikalı həmkarı Donald Trampla İranı və “Hizbullah”ı Suriyadan qovub çıxarmaq barədə müqavilə imzalayır, digər əli ilə İranı onun Suriyadakı mövqeyinin güclənməsi barədə danışıqlar aparmağa çağırır. Belə vəziyyətdə Azərbaycanla müttəfiqlik Rusiya üçün həyati əhəmiyyətli məsələyə çevrilir. Dağlıq Qarabağ münaqişəsi regionunda istənilən əlavə hərbi təxribat Putini hakimiyyəti dövründə Yaxın Şərq istiqamətində qazandıqlarından məhrum edə bilər. Suriya istiqamətində Rusiya üçün ən böyük təhlükə Dağlıq Qarabağ məsələsidir. Bu dəfələrlə Kreml tərəfindən də bildirilib. Məhz buna görədir ki, Rusiya bu məsələdə tələsmək istəmir”.
Məhəmmədəli QƏRİBLİ
