"Sözügedən layihənin reallaşması həm də Qərbin böyük maraq dairəsindədir"
Rusiyanın energetika naziri "Türk axını" boru kəməri ilə bağlı xoş xəbər verib. Aleksandr Novak Türkiyədə keçirilən XXII Dünya Neft Konqresində deyib ki, neft hasilatının azaldılması barədə Vyana sazişindən yumşaq çıxış məntiqlidir: "Proses bir neçə ay davam edə bilər. Bu məsələni Nazirlər Şurasının görüşündə həmkarlarla müzakirə etmək lazımdır".
Xatırladaq ki, ötən il noyabrın 30-da OPEC üzrə gündəlik neft hasilatının 1,2 milyon barrel azaldılaraq 32,5 milyon barrelə endirilməsi barədə razılıq əldə olunub. Dekabrın 10-da isə Vyanada OPEC üzvləri ilə təşkilata daxil olmayan 11 ölkə, o cümlədən Azərbaycan ümumi hasilatın sutkada 558 min barrel azaldılması barədə sazişə imza atıb. Saziş bu ilin birinci yarısı üçün bağlanıb. May ayında müddəti 2018-ci il mart ayının sonuna qədər uzadılıb.
Saziş çərçivəsində Rusiya isə neft hasilatını gündəlik 300 min barrel azaltmaq barədə öhdəlik götürüb. Rusiyanın energetika naziri A.Novak, həmçinin, bildirib ki,
"Türk axını" boru kəmərinin Qara dənizdə 50 kilometrlik hissəsi çəkilib.
Novak tez bir zamanda Türkiyənin türk torpaqlarına çıxış nöqtələri ilə bağlı proqramlar verəcəyini bildirib.
"Türk axını" boru kəməri ilə bağlı proseslər gələcək üçün nə vəd edir?
İqtisadçı Qulu İsmayılov qəzetimizə açıqlamasında bildirdi ki, Rusiya-Türkiyə münasibətlərinin inkişaf tempi çoxalıb: "Son aylar bu daha çox hiss edilir. İki böyük dövlət Suriya məsələsində əməkdaşlığı genişləndirməklə yanaşı, ticarət, iqtisadiyyat və enerji sferalarında da əlaqələri dərinləşdirir. Bu prosesdə "Türk axını" adlanan qaz kəməri layihəsinin reallaşması xüsusi yer tutur. İyun ayında prezident Vladimir Putin qaz kəmərinin dayaz və dərin hissələrinin birləşməsi ilə əlaqədar Rəcəb Tayyib Ərdoğana telefon edib. Bu, Rusiyanın Qara dəniz sahillərindəki gəmidə V.Putinin start düyməsini basmasından sonra olub. Prezidentlər layihənin uğurla reallaşması ilə bağlı bir-birini təbrik edib. Ekspertlər bu hadisəni adi qarşılıqlı təbrik kimi təqdim etmir. Onlar iki dövlət arasında əməkdaşlığın məzmunca yeni səviyyəyə yüksəlməkdə olduğunu vurğulayır. Xatırladaq ki, 2015-ci ilin noyabrında Rusiyaya məxsus "Su-24" tipli döyüş təyyarəsinin Türkiyə tərəfindən vurulmasından sonra layihə ilə bağlı işlər dayandırılmışdı.
"Türk axını" ilə Rusiya qazının Türkiyədən keçməklə Avropaya çatdırılması nəzərdə tutulur. Kəmərlə 16 milyard kubmetr qazın Avropanın, qalan hissəsinin isə Türkiyənin daxili tələbatının ödənilməsi üçün istifadə edilməsi planlaşdırılır. Layihə üzrə iki boru kəmərinin tikilməsi planlaşdırılıb. Verilən son məlumata görə, Türkiyənin "Botaş" və Rusiyanın "Qazprom" şirkətləri "Türk axını" qaz kəmərinin maliyyələşdirilməsinə dair razılığa gəlib. "Türk axını" boru kəmərinin Qara dənizdə 50 kilometrlik hissəsinin çəkilməsi ilə bağlı verilən rəsmi məlumat isə bu meqalayihənin reallaşacağına şübhə yeri qoymur. Sözügedən layihənin reallaşması həm də Qərbin böyük maraq dairəsindədir. İnşa ediləcək iki xətdən biri Türkiyə bazarı, digəri isə ölkə üzərindən keçməklə Avropa ölkələri üçün nəzərdə tutulub. Bu, eyni zamanda, Avropanın qaz təminatında mühüm rol oynayacaq bir layihədir".
Məhəmmədəli QƏRİBLİ
