Vəfa Hüseynli: "Saakaşvili vaxtilə ABŞ-ın fəal dəstəyi ilə hakimiyyətə gəlmişdi"
Gürcüstanda keçirilən son parlament seçkilərində Mixeil Saakaşvilinin partiyası yenidən məğlubiyyətə uğrayıb. Bəzi ekspertlər bunu Rusiyanın Qərb üzərindəki qələbəsi kimi səciyyələndirir. Saakaşvili seçkinin nəticələrinə etiraz edir və xalqı öz səsləri uğrunda mübarizəyə səsləyir. Bu, Gürcüstanda yeni "məxməri inqilab"ın başlanmasına səbəb ola bilərmi?
Politoloq Vəfa Hüseynli hesab edir ki, Gürcüstanda keçirilən parlament seçkilərində Rusiyaya bağlı İvanaşvilinin kölgəsində olan "Gürcü arzusu" qalib gəldi: "Gürcüstanda xalq hakimiyyətin dəyişilməsində maraqlı olmadı.
Buna görə də Gürcüstanın xarici, o cümlədən Azərbaycanla bağlı siyasətində dəyişiklik olmayacaq. Ancaq, əlbəttə, Vahid Milli Hərəkat Partiyası ana müxalifət kimi proseslərə təsir imkanını saxlayacaq. İvanaşvili Kremlə bağlı bir siyasətçi olaraq, rəsmi Moskvanın siyasəti ilə uzlaşacaq. Seçkidən sonra Rusiya ilə yarıgizli və yarıaçıq təmasları inkişaf etdirəcək. Qərbin Gürcüstanda mövqeləri zəifləyəcək. Eks-prezident M.Saakaşvilinin lideri olduğu Vahid Milli Hərəkata qalib olmaq üçün imkan verilmədi. Çünki, ABŞ və Qərb, əvvəlki illərdə olduğu kimi, yetərincə dəstək vermir. Saakaşvili vaxtilə ABŞ-ın fəal dəstəyi ilə hakimiyyətə gəlmişdi. Hazırda isə ABŞ tərəfindən ciddi dəstək yoxdur. Bu da Vahid Milli Hərəkatın məğlubiyyəti ilə nəticələndi. Gürcüstanda siyasi situasiya mürəkkəbdir. Seçkidən sonra İvanaşvili dəstəkli yeni hakimiyyət Ermənistana Rusiyanın hərbi dəhlizini inkişaf etdirəcək. Quru yolla Rusiyadan Ermənistana hərbi təyinatlı yüklər daşınacaq. "Gürcü arzusu" Gürcüstanı arzuladığı inkişafa yox, geriyə aparacaq. Regionda güclü Qərb-Rusiya soyuq savaşı yaşanır. Rusiya, istənilən halda, "Gürcü arzusu"na tam dəstəyini ifadə edib və edəcək. Yenidən Azərbaycanla enerji sahəsində problemlər olacağını istisna etmirəm. Bu səbəbdən də fövqəladə nəyinsə baş verəcəyinə inanmıram. Xüsusilə də yeni "məxməri inqilab"ın baş tutacağı real görünmür".
Məhəmmədəli QƏRİBLİ
