Bir neçə gün əvvəl Strasburqda Avropa Şurası Parlament Assambleyasının iclasında çıxış edən Ermənistan prezidenti Serj Sarkisyana qumarbaz olub-olmadığı soruşulub. Sualı ona elə Ermənistanın öz deputatı Zarui Postancyan verib.
Zarui Postancyan müxalifətdə olan “İrs” partiyasını təmsil edir və Ermənistanın Avropa Şurası Parlament Assambleyasındakı nümayəndə heyətinin üzvüdür.
Hadisə də oktyabrın 2-də assambleyanın iclaslarının keçirildiyi Strasburq şəhərində baş verib. Postancyan assambleyda çıxış edən Sarkisyandan soruşub: “Məlumdur ki, siz buraya erməni xalqının iradəsi ilə yox, mütəşəkkil cinayətin – 18 fevral seçkilərində erməni xalqının səsinin oğurlanması hesabına gəlib çıxmısız. Ona görə də de-yure siz erməni xalqının iradəsi və haqlarını təmsil edə bilməzsiniz. Mən sizə başqa bir sual verəcəm. Bu yaxınlarda Avropada kazinoda olmusunuzmu? Çünki cəmiyyət sizi qumarbaz olaraq tanıyır. Kazinoda 70 milyon avro uduzmusunuzmu? Sizin əvəzinizdən bu qədər pulu kim verib? Əgər məbləğ başqa olubsa, kazinoda nə qədər uduzduğunuzu açıqlayın”.
İndi Sarkisyana “siz qumarbazsınız?” sualını verən erməni qadın deputat ölkəsində ciddi təhlükə ilə üzləşib. Belə ki, hakim Respublikaçılar Partiyasından olan gənclər Zarui Postancyanı İrəvana qayıdanda aeroportda yumurta və pomidor atəşinə tutmağa qərar veriblər. Hakim partiyanın parlament fraksiyasının sədri Qalust Saakyan isə deyib ki, gənclərin bu qərarında qəribə heç nə yoxdur, onlar bunu ürəklərinin hökmü ilə edirlər.
Ermənistan parlamentinin spikeri Ovik Abramyan isə Postancyanı prezidentə “şər atmaqda” ittiham edib və onu Avropa Şurası Parlament Assambleyasındakı nümayəndə heyətindən çıxarmaq niyyətini ifadə edib. “İrs”in parlamentdəki fraksiyasının rəhbəri Ruben Akopyan isə bildirib ki, bu cür hərəkət ölkənin imicinə zərbə olardı.
Kazino sualı Ermənistanda böyük rezonans doğurub, bir çox deputatlar Postancyanı "ölkəni biabır eləməkdə" günahlandırıblar. Onu hətta təhqir edənlər də olub. Deputatın özü isə “Azadlıq radiosu”nun erməni xidmətinə deyib ki, sualı verməklə öz borcundan çıxıb, çünki prezidentin qumarbaz olub-olmaması ilə bağlı məsələ indi ölkə əhalisinin az qala 80 faizini maraqlandırır.
