Oktyabrın 8-də Gürcüstanda keçiriləcək parlament seçkiləri bu ölkənin sonrakı həyatında mühüm rol oynayacaq. Çünki bu seçkilərə Qafqazda marağı olan qüvvələr də aktiv formada müdaxilə edir, özlərinə yaxın qüvvələrin iqtidara gəlməsinə böyük maraq göstərirlər. Gürcüstanın Azərbaycan üçün tranzit əhəmiyyəti, burada xeyli sayda soydaşımızın yaşaması fonunda seçkilər ölkəmiz üçün də müəyyən maraq kəsb edir.
Xatırladaq ki, artıq 40-a yaxın azərbaycanlının deputatlığa namizədliyi ölkənin Mərkəzi Seçki Komissiyası (MSK) tərəfindən qeydə alınıb.
MSK üzvü Dimitri Cavaxadze deyib ki, bu seçkilərdə milli azlıqların nümayəndələri də sərbəst iştirak edəcək. Onlar üçün heç bir məhdudiyyət qoyulmayıb: "Yaşı 21-dən çox olan hər bir Gürcüstan vətəndaşı qanunla nəzərdə tutulmuş qaydada parlament seçkilərində, 35-dən yuxarı olanlar isə prezident seçkilərində iştirak edə bilər. Bələdiyyə seçkilərində isə hətta 18 yaşdan yuxarı olanlar da iştirak edə bilər. Bu gün Gürcüstanın inkişafında xüsusi yeri və rolu olan azərbaycanlılar da deputat mandatı uğrunda mübarizəyə qoşulub. Artıq 40-a yaxın azərbaycanlının həm proporsional, həm də majoritar sistemdə namizədliyi qeydiyyata alınıb".
D.Cavaxadze bildirib ki, seçkilərdə 24 siyasi subyekt iştirak edir və onlardan 12-də azərbaycanlılar var: "Təxminən 32 siyasi partiya seçki marafonuna qoşulub. Onların bəziləri birləşərək seçkilərdə blok halında iştirak etmək barədə qərar qəbul edib. Hər partiyadan və blokdan isə ən çoxu 200 nəfərin namizədliyi irəli sürülə bilər. Bəzi siyasi partiyalar 200, bəziləri isə 150, 160 və 190 namizədlə seçkilərə gedir". Qeyd edək ki, hazırda Gürcüstanda 73 dairə, 3 636 məntəqə seçki komissiyaları yaradılıb. Seçki məntəqələrindən 207-si birbaşa azərbaycanlılar yaşayan ərazilərdə, bir neçəsi isə azərbaycanlıların gürcü və digər millətlərin nümayəndələri ilə birgə yaşadıqları ərazilərdə yaradılıb.
Yuxarıda qeyd olunduğu kimi isə, seçkilərə kənar təsirlər də çoxdur və yenə Rusiya ilə Qərb amili burada önə çıxır. Qərbin dəstək verdiyi əsas qüvvə sabiq prezident Mixeil Saakaşvilinin lideri olduğu Vahid Milli Hərəkat Partiyasıdır (VMH). Yeri gəlmişkən qeyd edək ki,Tiflisdə Vahid Milli Hərəkat Partiyası seçkiqabağı yekun aksiyasını keçirib. Tədbirdə Saakaşvilinin həyat yoldaşı, Zuqdidi bölgəsindən parlament seçkilərində deputatlığa namizəd irəli sürülən Sandra Rulofs və digər partiya üzvləri çıxış edib. Sandra Rulofs çıxışında Mixeil Saakaşvilinin Gürcüstana gəlişindən söhbət açıb. Onun sözlərinə görə, VMH partiyası yenə hakimiyyətə qayıdacaq: "Biz inkişaf prosesinə qayıdacaq və Gürcüstanı gücləndirəcəyik."
Tədbirdə Mixeil Saakaşvilinin video-müraciəti səsləndirilib. O, oktyabrın 8-də baş tutacaq parlament seçkilərini tarixi gün adlandırıb və seçkilərdə qələbə qazanacaqlarına ümid etdiyini qeyd edib. M.Saakaşvili yekun aksiyada canlı şəkildə tədbir iştirakçılarına Gürcüstanın gələcəkdə inkişaf edəcəyini bildirib. Amma Rusiyameylli qüvvələr də xeyli aktivləşib. Bu sırada əsasən Gürcüstanın eks-spikeri Nino Burcanadzenin tərəfdarları ön planda yer alır. Nino Burcanadze özü bildirib ki, Vahid Milli Hərəkat Partiyası gürcü xalqını şantaj edir. O, hakimiyyətə gələcəyi təqdirdə, bir çox siyasətçini cəzalandıracağını bildirib: "Vahid Milli Hərəkat Partiyası yaxşı bilir ki, Burcanadze hakimiyyətə gəlsə, onların yenidən hakimiyyətə qayıtmaq şansları olmayacaq. Böyük ehtimalla, onlar heç siyasətdə də qalmayacaqlar. Mən ədaləti bərpa edib, cinayətkarları məsuliyyətə cəlb edəcəyəm. Onlarla birgə məsuliyyəti Gürcü Arzusu Partiyası da daşıyacaq". Qeyd edək ki, Burcanadze Moskvanın Gürcüstandakı əsas müttəfiqi hesab edilir. Milyarder Bidzina İvanişvilinin faktiki rəhbəri olduğu iqtidardakı "Gürcü arzusu" koalsiyası da əsas favoritlər sırasındadır. Bu qüvvələr də Rusiyaya daha çox meyl edir. Amma seçkilərin tam aşkar favoriti yoxdur. Barışmaz rəqiblər Saakaşvilinin Vahid Milli Hərəkat Partiyası ilə iqtidardakı "Gürcü arzusu" arasında bərabərlik var. Çoxsaylı sorğuların bəzilərində Vahid Milli Hərəkat, digərlərində isə "Gürcü arzusu" önə çıxır.
"Vesti Kavkaza" nəşri isə bu parlament seçkilərində üç əsas qaynar mərkəzin olacağını vurğulayıb: 1) Ölkənin paytaxtı Tiflis; 2) Eks-prezident Mixeil Saakaşvilinin həyat yoldaşı Sandra Rulofsun namizədliyini irəli sürdüyü Zuqdidi rayonu; 3) Türkiyə ilə sərhəd olan Acarıstan Muxtar Respublikası. Vətənpərvərlər Alyansı qeyri-hökumət təşkilatının sədri İrma İnaşvili məsələ ilə bağlı bildirir: "Ənənəyə sadiq qalaraq, seçkilərdən sonra Gürcüstanda vəziyyət mürəkkəb ola bilər". Onun sözlərinə görə, Saakaşvili ölkədə növbəti dövlət çevrilişi hazırlayır. Mixeil Saakaşvili özü isə iddia edir ki, Vahid Milli Hərəkat Partiyası 8 oktyabrda parlament seçkilərində qazandığı səslərini müdafiə edəcək. O bildirib ki, sabiq baş nazir və milyarder Bidzina İvanişvili onun Gürcüstana gəlişindən qorxur: "Mən Gürcüstana gəlməyə və seçkilərin nəticələrini müdafiə etməyə hazırlaşıram. İvanişvili mənim gəlişimdən bərk qorxur". Qeyd edək ki, Saakaşvili 2013-cü ildə ölkənin yeni prezidenti Georgi Marqvelaşvilinin vəzifəsinə başlamasından dərhal sonra ölkəni tərk edib. O, əvvəlcə ABŞ-a gedib və Amerika universitetlərindən birində mühazirələr oxuyub. Keçmiş prezident daha sonra Kiyevə köçüb və tezliklə Ukrayna vətəndaşlığını alaraq Odessa vilayətinin qubernatoru təyin edilib. Gürcüstanda Saakaşviliyə qarşı dörd cinayət işi qaldırılıb. Onun barəsində ölkədaxili axtarış elan edilib. Seçkilərə gəlincə, hesab edilir ki, onun nəticələrinin müəyyən olunmasında kənar faktorların təsiri kifayət qədər güclü olacaq.
Nahid SALAYEV
