Ermənistan hökumətində son çoxsaylı kadr dəyişiklikləri ölkədə həm ictimai-siyasi, həm də sosial-iqtisadi sferada yeni vəziyyət yaradır. Belə görünür, qarşıdakı dövr Ermənistan prezidenti Serj Sarkisyan üçün heç də asan olmayacaq.
Buna əsas səbəb istefaya göndərilmiş nazirlərin və digər məmurların prezidentə qarşı müxalif mövqeyə keçməyə başlamasıdır. Kifayət qədər kapitala malik bu şəxslərin müxalifətə keçməsi isə Sarkisyana yaxşı heç nə vəd etmir. Hazırda Sarkisyanın əsas qorxusu keçmiş müdafiə naziri Seyran Ohanyanla bağlıdır. Çünki bu şəxsin müxalif mövqedə olması Sarkisyan üçün qətiyyən sərfəli sayılmır. Amma son məlumatlardan bəlli olur ki, Sarkisyandan incik düşən Ohanyan artıq seçimini edib.
Ermənistan mediasının yazdığına görə, Serj Sarkisyan hökuməti buraxdıqdan sonra keçmiş müdafiə nazirinə bir neçə vəzifə təklif edib. Qeyd olunur ki, hökumətin istefasından sonra Sarkisyan onu iki dəfə danışığa çağırıb. Məlumata görə, Sarkisyan Ohanyana Kollektiv Təhlükəsizlik Müqaviləsi Təşkilatının (KTMT) baş katibi, Ermənistan Silahlı Qüvvələri Baş Qərargahının rəisi, Təhlükəsizlik Şurasının katibi kimi vəzifələri təklif edib. Ancaq keçmiş müdafiə naziri bu təkliflərin hamısından imtina edib. Seyran Ohanyanın onu müdafiə naziri postundan başqa heç bir vəzifənin maraqlandırmadığını söylədiyi qeyd edilir. Bu fonda Ohanyanın da müxalifət cərgəsində olacağı dəqiqləşib. Belə ki, keçmiş müdafiə naziri müxalifətə keçib. Ermənistanın "Hraparak" qəzeti yazır ki, o, Prezident Aparatı sədrinin müavini Viktor Dallakyan tərəfindən yaradılması planlaşdırılan "Şrdjadarts" (Dönüş) Partiyasının sədri olacaq. Hakim Respublika Partiyasında bunu mümkünsüz hesab etsələr də, S.Ohanyanın prezident Serj Sarkisyandan narazı qalması tamam fərqli mənzərə yaradır. Şayiələrə görə, yeni partiya Rusiya mənbələri tərəfindən maliyyələşdiriləcək. "Hraparak" yazır: "Ohanyanla Sarkisyan arasında artıq inciklik yaranıb. Viktor Dallakyan Sarkisyanın son iclasında iştirak etsə də, Ohanyanın ətrafında birləşməyə məmnuniyyətlə razı olacaq. Şayiələrə görə, "Şrdjadarts" Partiyası Rusiyadan maliyyələşəcək. Bunun ilk nümunəsi artıq bir müddət əvvəl açılmış "politinfo.am" saytıdır".
Qeyd edək ki, Seyran Ohanyanın yerinə müdafiə naziri vəzifəsinə Vigen Sarkisyan təyin olunub. Ohayanın mövqeləri isə bu ilin aprelində cəbhədə məlum hadisələrdən sonra zəifləmişdi. Xatırladaq ki, aprelin 26-da Serj Sarkisyanın fərmanı ilə müdafiə nazirinin maddi-texniki təchizat məsələləri üzrə müavini Alik Mirzəbekyan, Baş Qərargahın Kəşfyyat İdarəsinin rəisi, general-mayor Arşak Karapetyan, Rabitə qoşunlarının və avtomatik idarəetmə sistemlərinin rəisi, general-mayor Komitas Muradyan işdən azad edilib. Onların hamısı Ohanyana yaxın şəxslər olub. Beləliklə, Sarkisyanı yeni çətinliklər gözləyir. Bu arada isə Serj Sarkisyan yeni hökumətin ilk iclasını keçirib və burada əvvəlki hökumətdən narazılığını etiraf edib: "Parlament idarəetmə formasına keçid nəinki dövlət idarəetmə sistemini dəyişmir, həm də ilk növbədə kollektiv düşünmə və məsələyə münasibəti dəyişir. Ola bilsin, cəmiyyət sona kimi bu dəyişikliklərin hansı ölçüdə olacağını tam anlamır. Sizə keçid dövrünün pionerləri olmaq nəsib olub. Mən sizin gücünüzə inanıram, inanıram ki, bu hökumət əvvəlkilərin edə bilməyəcəyini edəcək. Bu işdə digər dövlət orqanları hökumətlə birgə addımlayacaq". Amma ekspertlər Sarkisyan və yeni komandasının hansısa yeniliyə imza atmasını mümkünsüz sayır. Məsələn, "Atlas" Araşdırmalar Mərkəzindən qeyd olunur ki, Sarksiyanın təyin etdiyi Ermənistanın yeni baş naziri Karen Karapetyan ölkəsini ağır iqtisadi böhrandan qurtarmaq üçün 3 ciddi maneəni aşmalıdır: "Birincisi idarəetmədəki korrupsiyadır. Bunu aşmaq üçün az qala bütün idarəetmə sistemi yenidən qurulmalıdır. Ancaq çətin ki, Sarkisyan Karapetyana belə bir imkan tanısın. İkincisi iqtisadiyyatdakı monopoliyalardır. Karapetyan heç bir monopoliya ilə bağlı deyil. O, baş nazir vəzifəsinə Rusiyadan gətirilib. Ona görə də məntiqlə Karapetyanın Ermənistandakı monopoliyalarla mübarizə aparması mümkündür. Ancaq o, yenə qarşısında Sarkiysanı görəcək. Çünki Ermənistanda monopoliyalar onun və keçmiş prezident Robert Köçəryanın dövründə kök salıb və onlar bundan imtina etmək istəmirlər. Üçüncüsü Ermənistanda maliyyə və insan resurslarının tükənməsidir. Bu, digər iki maneədən ən mürəkkəbidir. Kaparetyan "islahat aparacam" desə də, bu iş üçün onun nə kifayət qədər maliyyəsi, nə də insan resursu var. Ona görə də Karapetyan yerində sayacaq".
Tahir TAĞIYEV
