Aqşin Əliyev: "Yəni münaqişə tərəflərinin birinə ABŞ, digərinə isə Rusiya kömək edəcək və bu iki superdövlət arasında Suriya savaşı yeni mərhələyə qədəm qoyacaq"
Birləşmiş Ştatlar bəyan edib ki, Suriyada qan tökülməsinin qarşısının alınması üçün Rusiya ilə aparılan danışıqlardan çıxır. Vaşinqton bu qərarını Moskvanın öz öhdəliklərinə əməl etməməsi ilə əlaqələndirib.
Oktyabrın 3-də yayılmış bəyanatında Dövlət Departamentinin sözçüsü John Kirby Rusiyanı və onun müttəfiqi olan Dəməşq rejimini dinc əhali yaşayan ərazilərə hücum etməkdə günahlandırıb. Sözçü deyib ki, Rusiya və Suriya hərbi əməliyyatların dayandırılması məqsədinə uyğun olmayaraq özlərinin hərbi kurslarını davam etdirir. Kirby deyib ki, Vaşinqton danışıqlardan çıxmaq qərarını asanlıqla qəbul etməyib.
Rusiya Xarici İşlər Nazirliyi Birləşmiş Ştatların bu qərarından təəssüfləndiyini bildirib və əlavə edib ki, Vaşinqton öz uğursuzluğunun günahını Moskvanın üzərinə atmaq istəyir. Rusiya XİN-in sözçüsü Mariya Zaxarova deyib ki, Vaşinqton razılaşmanın əsas müddəalarının həyata keçirilməsi sahəsində heç bir addım atmayıb. Bununla yanaşı, ABŞ Dövlət Departamentinin sözçüsü Elizabeth Trudeau bildirib ki, danışqların ləğv olunmasına baxmayaraq, ABŞ və Rusiya hərbçiləri bir-birilə təmasda olmaqda davam edəcək. Bu, iki tərəfin Suriya səmasında hər hansı toqquşmasının və xoşagəlməz insidentlərin qarşısının alınması üçün zəruridir.
Dövlət Departamenti bunu da bildirib ki, Birləşmiş Ştatlar ABŞ-Rusiya birgə mərkəzinin yaradılması üçün göndərilmiş kontingentini geri çağırıb.
Amerikanın bu qərarından bir neçə saat əvvəl Rusiya prezidenti Vladimir Putin bəyan etmişdi ki, Moskva nüvə silahı üçün yararlı plutonium ehtiyatlarının məhv edilməsinə dair Vaşinqtonla 16 il bundan əvvəl bağlanmış sazişdən çıxır.
Təhlilçilər Moskvanın bu addımını Rusiya və ABŞ arasında artmaqda olan gərginliyin təzahürü kimi qiymətləndirib. Vladimir Putin bu qərarını Birləşmiş Ştatların Rusiyaya qarşı qeyri-dost hərəkətləri ilə izah edib.
ABŞ-la Rusiyanın Suriyada əməkdaşlığı dayandırması həmin bölgənin gələcəyi üçün nə vəd edir?
Konfliktoloq Aqşin Əliyev qəzetimizə açıqlamasında bildirdi ki, bu amil həmin bölgədəki hərbi vəziyyətin gərginləşməsinə aparacaq: "Eyni zamanda, Rusiya ilə ABŞ arasında münasibətləri bir qədər də ziddiyyətə kökləyəcək. Təəssüf ki, Suriyada Rusiya və ABŞ arasında hərbi münaqişə mümkündür. Bu həm də dolayısi ilə artıq baş verib. Rusiya tərəfi terrorçuları bombalayırdı, amma bazada amerikalılar var idi. Amerikalılar Suriyanın hökumət qoşunlarının bölmələrinə atəş açır və bombalayırdılar, amma orada rusiyalı hərbçilər də vardı. Hər iki tərəf bunu pərdələməyə çalışsa da, mümkün olmurdu. Faktiki olaraq tərəflər gizli üsulla bir-birilə müharibə aparırdı. Yaranmış vəziyyət ciddidir.
Qlobal hərbi münaqişə baş verməyəcək. Rusiya ilə Amerika silahlı qüvvələrinin birbaşa toqquşması olmayacaq. Vəziyyət əvvəlki stadiyasına qayıdacaq. Yəni münaqişə tərəflərinin birinə ABŞ, digərinə isə Rusiya kömək edəcək və bu iki superdövlət arasında Suriya savaşı yeni mərhələyə qədəm qoyacaq".
Məhəmmədəli QƏRİBLİ
