Suriya və İraqda sıxışdırılan İŞİD terror qruplaşması indi fəaliyyətini başqa ölkələrin ərazisində davam etdirməyi qarşıya əsas məqsəd qoyub. Təəssüf ki, bu sıraya artıq MDB ölkələri də aiddir. Belə görünür ki, qarşısı alınmasa, İŞİD Mərkəzi Asiya, Qafqaz, Rusiyanın müəyyən ərazilərinə sızmağa çalışacaq. Hazırda əsas təhlükə Mərkəzi Asiya və Qafqaz üzərində cəmləşməkdədir. Rusiya xarici işlər nazirinin müavini Oleq Sıromolotov da bu xüsusda xəbərdarlıqlar edir.
Əfqanıstanda mövcud duruma toxunan Sıromolotov İŞİD terror təşkilatının məhz buradan Mərkəzi Asiyaya girmək istədiyini bildirib: "Onlar özləri də bəyan edirlər ki, Əfqanıstan faktiki olaraq onları maraqlandırmır. Onları Mərkəzi Asiya maraqlandırır. Niyə? Ona görə ki, İŞİD döyüşçülərinin 50-60%-i Mərkəzi Asiya və Şimali Qafqazdan olanlardır. Bu terrorçu qruplaşma Mərkəzi Asiyaya sızmağa çalışır. Bəli, İŞİD Əfqanıstana da sızmağa cəhd edir. Lakin orada ayrı spesifika mövcuddur. İŞİD Əfqanıstana gələrək bəyan edir ki, onlara Əfqanıstan faktiki maraqlı deyil. Onların marağı Mərkəzi Asiyaya yönəlib".
İŞİD-in yuxarıda qeyd olunan bölgələr üçün təhdid yaratdığı bu günlərdə Bakıda da etiraf olunub. Belə ki, MDB üzvü olan dövlətlərin təhlükəsizlik və xüsusi xidmət orqanları rəhbərləri Şurasının Bakıda keçirilən iclasında Rusiya Federal Təhlükəsizlik Xidmətinin direktoru Aleksandr Bortnikov bildirib ki, hazırkı geosiyasi vəziyyət mənfi ssenari üzrə inkişaf edir. O vurğulayıb ki, MDB ölkələrinin birbaşa sərhədində yerləşən Əfqanıstan və Yaxın Şərq regionunda vəziyyət xüsusi narahatlıq yaradır: "İŞİD, "Cəbhat-ən-Nüsra" kimi terror təşkilatlarının genişlənməsi bu günün reallığıdır. MDB üzvü və digər ölkələr üçün ən böyük təhdid mühacir terrorçuların çıxdıqları ölkələrə geri qayıtması və bu ölkələrdə aktivləşməsidir. Son vaxtlar biz Yaxın Şərq ölkələrini zəbt etmiş terror təşkilatları rəhbərlərinin öz fəaliyyətlərini Şimali Qafqaz regionunda genişləndirmək istəmələri barədə sənədlər əldə etmişik. Bizim ölkələrdən kənarda fəaliyyət göstərən beynəlxalq terror təşkilatlarının funksionerləri öz terror şəbəkələrini uzaqdan idarə edir. Bunun üçün onlar bir çox vasitələrdən, o cümlədən agentlərdən, peyk əlaqə vasitələrindən, internetin imkanlarından yararlanır. Ona görə də hesab edirəm ki, bizim əməkdaşlığımızın effektivliyini və nəticəsini artırmaq üçün daha sıx və çoxsəviyyəli qarşılıqlı fəaliyyət həyata keçirmək, operativ fəaliyyət göstərmək, daimi informasiya mübadiləsi sahəsində yeni imkanlar axtarmaq lazımdır".
Rusiya Silahlı Qüvvələrinin Baş Qərargah rəisi, ordu generalı Valeri Gerasimov MDB ölkələrini terrorizmə qarşı mübarizədə müdafiə və təhlükəsizlik sahəsində əməkdaşlığı genişləndirməyə çağırıb: "Birliyin xarici sərhədlərində vəziyyətin sabit olmadığını nəzərə alsaq, qarşımızda MDB məkanında terrorizmin yayılmasının qarşısını almaq kimi ortaq vəzifə durur". O, yaranmış çətin vəziyyətdə müdafiə və təhlükəsizlik sahəsində əməkdaşlığı genişləndirməyin zəruriliyini vurğulayıb. V.Gerasimov həmçinin qeyd edib ki, MDB formatında hərbi əməkdaşlıq geniş spektrli istiqamətlərdə qarşılıqlı əlaqəni uğurla inkişaf etditməyə şərait yaradır.
Gerasimovun fikrincə, belə əməkdaşlıq üçün hüquqi baza MDB ölkələrinin müddəti 2020-ci ilə qədər olan hərbi əməkdaşlıq konsepsiyasıdır. Qeyd edək ki, bu görüşdə iştirak etmək üçün Azərbaycan Silahlı Qüvvələrinin Baş Qərargah rəisi, general-polkovnik Nəcməddin Sadıqov Rusiya müdafiə nazirinin birinci müavini, Silahlı Qüvvələrin Baş Qərargah rəisi, ordu generalı Valeri Gerasimovun dəvətilə Sankt-Peterburqa gedib.
Hazırda yaranmış vəziyyətdə İŞİD-i İraq və Suriyada məhv etmək daha səmərəli sayılır. Özü də o da nəzərə alınmalıdır ki, İŞİD təhdidi Qərb üçün də artır. Elə bu günlərdə ABŞ-ın Federal Təhqiqat Bürosunun (FTB) direktoru Ceyms Komey bildirib ki, İŞİD terror təşkilatı İraq və Suriyada məğlubiyyətə uğrasa da, dünyada, xüsusilə də Qərb ölkələrində terror təhdidi davam edəcək. O deyib ki, "xilafətin" məhv edilməsinin təsiri altında terror təhdidi hələ daha 5 il də davam edəcək:"Vaxt gələcək, İŞİD-in həbs edilən qatilləri həbsxanadan çıxacaq və daha sonra onlar Qərb ölkələrinə, o cümlədən Parisə və Brüsselə gedərək yenə də dəhşətli terror aktları törədəcək. ABŞ da oxşar terror hücumlarına məruz qala bilər".
Nahid SALAYEV
